Habakkooq 2

¹ab main pahera denay kay liyay apnee burjee par chadh jaaoonga, qilaay kee oonchee jagah par khada ho kar chaaron taraf dekhta rahoonga. kyoonki main jaanna chaahata hoon ki allaah mujhay kya kuchh bataaega, ki vah meree shikaayat ka kya javaab dega.

rabb ka javaab

²rabb nay mujhay javaab diya, “jo kuchh too nay roya men dekha hai usay takhton par yoon likh day ki har guzarnay vaala usay ravaanee say padh sakay. ³kyoonki vah fauran pooree naheen ho jaaegee balki muqarrara vaqt par aakhirkaar zaahir hogee, vah jhootee saabit naheen hogee. go der bhee lagay to bhee sabr kar. kyoonki aanay vaala pahunchega, vah der naheen karega.

⁴maghroor aadmee phoola hua hai aur andar say seedhee raah par naheen chalta. lekin raastbaaz eemaan hee say jeeta rahega. ⁵yaqeenan mai ek bevafa saathee hai. maghroor shakhs jeeta naheen rahega, go vah apnay munh ko paataal kee tarah khula rakhta aur us kee bhook maut kee tarah kabhee naheen mittee, vah tamaam aqvaam aur ummaten apnay paas jama karta hai.

bedeenon ka anjaam

⁶lekin yah sab us ka mazaaq uda kar usay laan-taan karengee. vah kahengee, ‘us par afsos jo doosron kee cheezen chheen kar apnee milkiyat men izaafa karta hai, jo qarzdaaron kee zamaanat par qabza karnay say daulatmand ho gaya hai. yah kaar-ravaaee kab tak jaaree rahegee?’ ⁷kyoonki achaanak hee aisay log uthengay jo tujhay kaatengay, aisay log jaag uthengay jin kay saamnay too thartharaanay lagega. tab too khud un ka shikaar ban jaaega. ⁸choonki too nay deegar mut’addid aqvaam ko loot liya hai is liyay ab bachee huee ummaten tujhay hee loot lengee. kyoonki tujh say qatl-o-ghaarat sarzad huee hai, too nay deehaat aur shaher par un kay baashindon samet shadeed zulm kiya hai.

⁹us par afsos jo naajaaiz nafa kama kar apnay ghar par aafat laata hai, haalaanki vah aafat say bachnay kay liyay apna ghonsla bulandiyon par bana leta hai. ¹⁰teray mansoobon say mut’addid qaumen tabaah huee hain, lekin yah teray hee gharaanay kay liyay sharm ka baais ban gaya hai. is gunaah say too apnay aap par maut kee saza laaya hai. ¹¹yaqeenan deevaaron kay patthar cheekh kar iltija karengay aur lakdee kay shaheteer javaab men aah-o-zaaree karengay.

¹²us par afsos jo shaher ko qatl-o-ghaarat kay zareeay taameer karta, jo aabaadee ko naainsaafee kee bunyaad par qaaim karta hai. ¹³rabb-ul-afwaaj nay muqarrar kiya hai ki jo kuchh qaumon nay badee mehanat-mashaqqat say haasil kiya usay nazar-ay-aatish hona hai, jo kuchh paanay kay liyay ummaten thak jaatee hain vah bekaar hee hai. ¹⁴kyoonki jis tarah samundar paanee say bhara hua hai, usee tarah duniya ek din rabb kay jalaal kay irfaan say bhar jaaegee.

¹⁵us par afsos jo apna piyaala zahereelee sharaab say bhar kar usay apnay padosiyon ko pila deta hai taaki unhen nashay men la kar un kee barahenagee say lutf’andoz ho jaaay. ¹⁶lekin ab teree baaree bhee a gaee hai! teree shaan-o-shaukat khatm ho jaaegee, aur tera munh kaala ho jaaega. ab khud pee lay! nashay men a kar apnay kapday utaar lay. ghazab ka jo piyaala rabb kay dahenay haath men hai vah teray paas bhee pahunchega. tab teree itnee rusvaaee ho jaaegee ki teree shaan ka naam-o-nishaan tak naheen rahega.

¹⁷jo zulm too nay lubnaan par kiya vah tujh par hee ghaalib aaega, jin jaanvaron ko too nay vahaan tabaah kiya un kee dahshat tujh hee par taaree ho jaaegee. kyoonki tujh say qatl-o-ghaarat sarzad huee hai, too nay deehaat aur shaheron par un kay baashindon samet shadeed zulm kiya hai.

¹⁸but ka kya faaida? aakhir kisee maahir kaareegar nay usay taraasha ya dhaal liya hai, aur vah jhoot hee jhoot kee hidaayaat deta hai. kaareegar apnay haathon kay but par bharosa rakhta hai, haalaanki vah bol bhee naheen sakta!

¹⁹us par afsos jo lakdee say kaheta hai, ‘jaag uth!’ aur khaamosh patthar say, ‘khada ho ja!’ kya yah cheezen hidaayat day saktee hain? hargiz naheen! un men jaan hee naheen, khwaah un par sona ya chaandee kyoon na chadhaaee gaee ho. ²⁰lekin rabb apnay muqaddas ghar men maujood hai. us kay huzoor pooree duniya khaamosh rahay.”