Habakkooq 1

nabee kee shikaayat : har taraf naainsaafee

¹zail men vah kalaam qalamband hai jo habaqqooq nabee ko roya dekh kar mila.

²ai rabb, main mazeed kab tak madad kay liyay pukaaroon? ab tak too nay meree naheen sunee. main mazeed kab tak cheekhen maar maar kar kahoon ki fasaad ho raha hai? ab tak too nay hamen chhutkaara naheen diya. ³too kyoon honay deta hai ki mujhay itnee naainsaafee dekhnee paday? logon ko itna nuqsaan pahunchaaya ja raha hai, lekin too khaamoshee say sab kuchh dekhta raheta hai. jahaan bhee main nazar daaloon, vahaan zulm-o-tashaddud hee nazar aata hai, muqaddamaabaazee aur jhagday sar uthaatay hain. ⁴nateejay men shareeat beasar ho gaee hai, aur ba-insaaf faislay kabhee jaaree naheen hotay. bedeenon nay raastbaazon ko gher liya hai, is liyay adaalat men behooda faislay kiay jaatay hain.

allaah ka javaab

⁵“deegar aqvaam par nigaah daalo, haan un par dhyaan do to hakka-bakka rah jaaogay. kyoonki main tumhaaray jeetay jee ek aisa kaam karoonga jis kee jab khabar sunogay to tumhen yaqeen naheen aaega. ⁶main baabliyon ko khada karoonga. yah zaalim aur talkhroo qaum pooree duniya ko uboor karkay doosray mamaalik par qabza karegee. ⁷log us say sakht dahshat khaaengay, har taraf usee kay qavaaneen aur azmat maannee padegee. ⁸un kay ghoday cheeton say tez hain, aur shaam kay vaqt shikaar karnay vaalay bhedeeay bhee un jaisay phurteelay naheen hotay. vah sarpat daud kar door door say aatay hain. jis tarah uqaab laash par jhapatta maarta hai usee tarah vah apnay shikaar par hamla kartay hain. ⁹sab isee maqsad say aatay hain ki zulm-o-tashaddud karen. jahaan bhee jaaen vahaan aagay badhtay jaatay hain. ret jaisay beshumaar qaidee un kay haath men jama hotay hain. ¹⁰vah deegar baadshaahon ka mazaaq udaatay hain, aur doosron kay buzurg un kay tamaskhur ka nishaana ban jaatay hain. har qilaay ko dekh kar vah hans uthtay hain. jald hee vah un kee deevaaron kay saath mittee kay dher laga kar un par qabza kartay hain. ¹¹phir vah tez hava kee tarah vahaan say guzar kar aagay badh jaatay hain. lekin vah qusoorvaar thaherengay, kyoonki un kee apnee taaqat un ka khuda hai.”

ai rabb, too kyoon khaamosh raheta hai?

¹²ai rabb, kya too qadeem zamaanay say hee mera khuda, mera quddoos naheen hai? ham naheen marengay. ai rabb, too nay unhen saza denay kay liyay muqarrar kiya hai. ai chataan, teree marzee hai ki vah hamaaree tarbiyat karen. ¹³teree aankhen bilkul paak hain, is liyay too bura kaam bardaasht naheen kar sakta, too khaamoshee say zulm-o-tashaddud par nazar naheen daal sakta. to phir too in bevafaaon kee harkaton ko kis tarah bardaasht karta hai? jab bedeen usay hadap kar leta jo us say kaheen ziyaada raastbaaz hai to too khaamosh kyoon raheta hai? ¹⁴too nay honay diya hai ki insaan say machhliyon ka sa sulook kiya jaaay, ki usay un samundaree jaanvaron kee tarah pakda jaaay, jin ka koee maalik naheen. ¹⁵dushman un sab ko kaantay kay zareeay paanee say nikaal leta hai, apna jaal daal kar unhen pakad leta hai. jab un ka bada dher jama ho jaata hai to vah khush ho kar shaadiyaana bajaata hai. ¹⁶tab vah apnay jaal kay saamnay bakhoor jala kar usay jaanvar qurbaan karta hai. kyoonki usee kay vaseelay say vah aish-o-ishrat kee zindagee guzaar sakta hai. ¹⁷kya vah musalsal apna jaal daalta aur qaumon ko berahemee say maut kay ghaat utaarta rahe