Paidaaish 9

allaah ka nooh kay saath ahd

¹phir allaah nay nooh aur us kay beton ko barkat day kar kaha, “phalo phoolo aur taadaad men badhtay jaao. duniya tum say bhar jaae ²zameen par phirnay aur rengnay vaalay jaanvar, parinday aur machhliyaan sab tum say darengay. unhen tumhaaray ikhtiyaar men kar diya gaya hai. ³jis tarah main nay tumhaaray khaanay kay liyay paudon kee paidaavaar muqarrar kee hai isee tarah ab say tumhen har qism kay jaanvar khaanay kee ijaazat bhee hai. ⁴lekin khabardaar! aisa gosht na khaana jis men khoon hai, kyoonki khoon men us kee jaan hai.

⁵kisee kee jaan lena mana hai. jo aisa karega usay apnee jaan denee padegee, khwaah vah insaan ho ya haivaan. main khud is ka mutaalba karoonga. ⁶jo bhee kisee ka khoon bahaaay us ka khoon bhee bahaaya jaaega. kyoonki allaah nay insaan ko apnee soorat par banaaya hai.

⁷ab phalo phoolo aur taadaad men badhtay jaao. duniya men phail jaao.”

⁸tab allaah nay nooh aur us kay beton say kaha, ⁹“ab main tumhaaray aur tumhaaree aulaad kay saath ahd qaaim karta hoon. ¹⁰yah ahd un tamaam jaanvaron kay saath bhee hoga jo kashtee men say niklay hain yaanee parindon, maveshiyon aur zameen par kay tamaam jaanvaron kay saath. ¹¹main tumhaaray saath ahd baandh kar vaada karta hoon ki ab say aisa kabhee naheen hoga ki zameen kee tamaam zindagee sailaab say khatm kar dee jaaegee. ab say aisa sailaab kabhee naheen aaega jo pooree zameen ko tabaah kar day. ¹²is abdee ahd ka nishaan jo main tumhaaray aur tamaam jaandaaron kay saath qaaim kar raha hoon yah hai ki ¹³main apnee kamaan baadlon men rakhta hoon. vah meray duniya kay saath ahd ka nishaan hoga. ¹⁴jab kabhee meray kahenay par aasmaan par baadal chha jaaengay aur qaus-ay-quzah un men say nazar aaegee ¹⁵to main yah ahd yaad karoonga jo tumhaaray aur tamaam jaandaaron kay saath kiya gaya hai. ab kabhee bhee aisa sailaab naheen aaega jo tamaam zindagee ko halaak kar day. ¹⁶qaus-ay-quzah nazar aaegee to main usay dekh kar us daaimee ahd ko yaad karoonga jo meray aur duniya kee tamaam jaandaar makhlooqaat kay darmiyaan hai. ¹⁷yah us ahd ka nishaan hai jo main nay duniya kay tamaam jaandaaron kay saath kiya hai.”

nooh kay bete

¹⁸nooh kay jo betay us kay saath kashtee say niklay sim, haam aur yaafat thay. haam kan’aan ka baap tha. ¹⁹duniya bhar kay tamaam log in teenon kee aulaad hain.

²⁰nooh kisaan tha. shuroo men us nay angoor ka baagh lagaaya. ²¹angoor say mai bana kar us nay itnee pee lee ki vah nashay men dhut apnay deray men nanga pada raha. ²²kan’aan kay baap haam nay usay yoon pada hua dekha to baahar ja kar apnay donon bhaaiyon ko us kay baaray men bataaya. ²³yah sun kar sim aur yaafat nay apnay kandhon par kapda rakha. phir vah ultay chaltay huay deray men daakhil huay aur kapda apnay baap par daal diya. un kay munh doosree taraf muday rahay taaki baap kee barahenagee nazar na aaay.

²⁴jab nooh hosh men aaya to us ko pata chala ki sab say chhotay betay nay kya kiya hai. ²⁵us nay kaha, “kan’aan par laanat! vah apnay bhaaiyon ka zaleeltareen ghulaam hoga.

²⁶mubaarak ho rabb jo sim ka khuda hai. kan’aan sim ka ghulaam ho. ²⁷allaah karay ki yaafat kee hudood badh jaaen. yaafat sim kay deron men rahay aur kan’aan us ka ghulaam ho.”

²⁸sailaab kay baad nooh mazeed 350 saal zinda raha. ²⁹vah 950 saal kee umr men faut hua.