Paidaaish 8

sailaab ka ikhtitaam

¹lekin allaah ko nooh aur tamaam jaanvar yaad rahay jo kashtee men thay. us nay hava chala dee jis say paanee kam honay laga. ²zameen kay chashmay aur aasmaan par kay paanee kay dareechay band ho gaay, aur baarish ruk gaee. ³paanee ghatta gaya. 150 din kay baad vah kaafee kam ho gaya tha. ⁴saatven maheenay kay 17ven din kashtee araaraat kay ek pahaad par tik gaee. ⁵dasven maheenay kay pahelay din paanee itna kam ho gaya tha ki pahaadon kee chotiyaan nazar aanay lagee theen.

^6-7 chaalees din kay baad nooh nay kashtee kee khidkee khol kar ek kavva chhod diya, aur vah ud kar chala gaya. lekin jab tak zameen par paanee tha vah aata jaata raha. ⁸phir nooh nay ek kabootar chhod diya taaki pata chalay ki zameen paanee say nikal aaee hai ya naheen. ⁹lekin kabootar ko kaheen bhee baithnay kee jagah na milee, kyoonki ab tak pooree zameen par paanee hee paanee tha. vah kashtee aur nooh kay paas vaapas a gaya, aur nooh nay apna haath badhaaya aur kabootar ko pakad kar apnay paas kashtee men rakh liya.

¹⁰us nay ek hafta aur intizaar karkay kabootar ko dubaara chhod diya. ¹¹shaam kay vaqt vah laut aaya. is dafa us kee chonch men zaitoon ka taaza patta tha. tab nooh ko maaloom hua ki zameen paanee say nikal aaee hai.

¹²us nay mazeed ek haftay kay baad kabootar ko chhod diya. is dafa vah vaapas na aaya.

¹³jab nooh 601 saal ka tha to pahelay maheenay kay pahelay din zameen kee satah par paanee khatm ho gaya. tab nooh nay kashtee kee chhat khol dee aur dekha ki zameen kee satah par paanee naheen hai. ¹⁴doosray maheenay kay 27ven din zameen bilkul khushk ho gaee.

¹⁵phir allaah nay nooh say kaha, ¹⁶“apnee beevee, beton aur bahooon kay saath kashtee say nikal a. ¹⁷jitnay bhee jaanvar saath hain unhen nikaal day, khwaah parinday hon, khwaah zameen par phirnay ya rengnay vaalay jaanvar. vah duniya men phail jaaen, nasal badhaaen aur taadaad men badhtay jaaen.” ¹⁸chunaanchay nooh apnay beton, apnee beevee aur bahooon samet nikal aaya. ¹⁹tamaam jaanvar aur parinday bhee apnee apnee qism kay gurohon men kashtee say niklay.

²⁰us vaqt nooh nay rabb kay liyay qurbaangaah banaaee. us nay tamaam phirnay aur udnay vaalay paak jaanvaron men say kuchh chun kar unhen zabah kiya aur qurbaangaah par pooree tarah jala diya. ²¹yah qurbaaniyaan dekh kar rabb khush hua aur apnay dil men kaha, “ab say main kabhee zameen par insaan kee vajah say laanat naheen bhejoonga, kyoonki us ka dil bachpan hee say buraaee kee taraf maail hai. ab say main kabhee is tarah tamaam jaan rakhnay vaalee makhlooqaat ko roo-ay-zameen par say naheen mitaaoonga. ²²duniya kay muqarrara auqaat jaaree rahengay. beej bonay aur fasal kaatnay ka vaqt, thand aur tapish, garmiyon aur sardiyon ka mausam, din aur raat, yah sab kuchh duniya kay akheer tak qaaim rahega.”