Paidaaish 6
logon kee ziyaadatiyaan
1duniya men logon kee taadaad badhnay lagee. un kay haan betiyaan paida hueen. 2tab aasmaanee hastiyon nay dekha ki banee nau insaan kee betiyaan khoobsoorat hain, aur unhon nay un men say kuchh chun kar un say shaadee kee. 3phir rabb nay kaha, “meree rooh hamesha kay liyay insaan men na rahay kyoonki vah faanee makhlooq hai. ab say vah 120 saal say ziyaada zinda naheen rahega.” 4un dinon men aur baad men bhee duniya men deo thay jo insaanee aurton aur un aasmaanee hastiyon kee shaadiyon say paida huay thay. yah deo qadeem zamaanay kay mashhoor soorma thay.
5rabb nay dekha ki insaan nihaayat bigad gaya hai, ki us kay tamaam khayaalaat lagaataar buraaee kee taraf maail rahetay hain. 6vah pachhtaaya ki main nay insaan ko bana kar duniya men rakh diya hai, aur usay sakht dukh hua. 7us nay kaha, “go main hee nay insaan ko khalaq kiya main usay roo-ay-zameen par say mita daaloonga. main na sirf logon ko balki zameen par chalnay phirnay aur rengnay vaalay jaanvaron aur hava kay parindon ko bhee halaak kar doonga, kyoonki main pachhtaata hoon ki main nay un ko banaaya.”
baday sailaab kay liyay nooh kee tayyaariyaan
8sirf nooh par rabb kee nazar-ay-karam thee. 9yah us kee zindagee ka bayaan hai.
nooh raastbaaz tha. us zamaanay kay logon men sirf vahee bequsoor tha. vah allaah kay saath saath chalta tha. 10nooh kay teen betay thay, sim, haam aur yaafat. 11lekin duniya allaah kee nazar men bigdee huee aur zulm-o-tashaddud say bharee huee thee. 12jahaan bhee allaah dekhta duniya kharaab thee, kyoonki tamaam jaandaaron nay zameen par apnee ravish ko bigaad diya tha.
13tab allaah nay nooh say kaha, “main nay tamaam jaandaaron ko khatm karnay ka faisla kiya hai, kyoonki un kay sabab say pooree duniya zulm-o-tashaddud say bhar gaee hai. chunaanchay main un ko zameen samet tabaah kar doonga. 14ab apnay liyay sarv [a] ibraanee lafz matrook hai. shaayad is ka matlab sarv ya deodaar kee lakdee ho. kee lakdee kee kashtee bana lay. us men kamray hon aur usay andar aur baahar taarkol laga. 15us kee lambaaee 450 fut, chaudaaee 75 fut aur oonchaaee 45 fut ho. 16kashtee kee chhat ko yoon banaana ki us kay neechay 18 inch khula rahay. ek taraf darvaaza ho, aur us kee teen manzilen hon. 17main paanee ka itna bada sailaab laaoonga ki vah zameen kay tamaam jaandaaron ko halaak kar daalega. zameen par sab kuchh fana ho jaaega. 18lekin teray saath main ahd baandhoonga jis kay tahet too apnay beton, apnee beevee aur bahooon kay saath kashtee men jaaega. 19har qism kay jaanvar ka ek nar aur ek maada bhee apnay saath kashtee men lay jaana taaki vah teray saath jeetay bachen. 20har qism kay par rakhnay vaalay jaanvar aur har qism kay zameen par phirnay ya rengnay vaalay jaanvar do do ho kar teray paas aaengay taaki jeetay bach jaaen. 21jo bhee khuraak darkaar hai usay apnay aur un kay liyay jama karkay kashtee men mahfooz kar lena.”
22nooh nay sab kuchh vaisa hee kiya jaisa allaah nay usay bataaya.