Paidaaish 50
yaaqoob ko dafan kiya jaata hai
1yoosuf apnay baap kay chiharay say lipat gaya. us nay rotay huay usay bosa diya. 2us kay mulaazimon men say kuchh daaktar thay. us nay unhen hidaayat dee ki meray baap israaeel kee laash ko hanoot karen taaki vah gal na jaaay. unhon nay aisa hee kiya. 3is men 40 din lag gaay. aam taur par hanoot karnay kay liyay itnay hee din lagtay hain. misriyon nay 70 din tak yaaqoob ka maatam kiya.
4jab maatam ka vaqt khatm hua to yoosuf nay baadshaah kay darbaariyon say kaha, “meharbaanee karkay yah khabar baadshaah tak pahuncha den 5ki meray baap nay mujhay qasam dila kar kaha tha, ‘main marnay vaala hoon. mujhay us qabr men dafan karna jo main nay mulk-ay-kan’aan men apnay liyay banvaaee.’ ab mujhay ijaazat den ki main vahaan jaaoon aur apnay baap ko dafan karkay vaapas aaoon.” 6firaaun nay javaab diya, “ja, apnay baap ko dafan kar jis tarah us nay tujhay qasam dilaaee thee.”
7chunaanchay yoosuf apnay baap ko dafnaanay kay liyay kan’aan ravaana hua. baadshaah kay tamaam mulaazim, mahel kay buzurg aur pooray misr kay buzurg us kay saath thay. 8yoosuf kay gharaanay kay afraad, us kay bhaaee aur us kay baap kay gharaanay kay log bhee saath gaay. sirf un kay bachchay, un kee bhed-bakriyaan aur gaay-bail jushan men rahay. 9rath aur ghudsavaar bhee saath gaay. sab mil kar bada lashkar ban gaay.
10jab vah yardan kay qareeb atad kay khaliyaan par pahunchay to unhon nay nihaayat dilsoz noha kiya. vahaan yoosuf nay saat din tak apnay baap ka maatam kiya. 11jab maqaamee kan’aaniyon nay atad kay khaliyaan par maatam ka yah nazaara dekha to unhon nay kaha, “yah to maatam ka bahut bada intizaam hai jo misree karva rahay hain.” is liyay us jagah ka naam abeel-misreem yaanee ‘misriyon ka maatam’ pad gaya. 12yoon yaaqoob kay beton nay apnay baap ka hukm poora kiya. 13unhon nay usay mulk-ay-kan’aan men lay ja kar makfeela kay khet kay ghaar men dafan kiya jo mamray kay mashriq men hai. yah vahee khet hai jo ibraaheem nay ifron hittee say apnay logon ko dafnaanay kay liyay khareeda tha.
14is kay baad yoosuf, us kay bhaaee aur baaqee tamaam log jo janaazay kay liyay saath gaay thay misr ko laut aaay.
yoosuf apnay bhaaiyon ko tasallee deta hai
15jab yaaqoob intiqaal kar gaya to yoosuf kay bhaaee dar gaay. unhon nay kaha, “khatra hai ki ab yoosuf hamaara taaqqub karkay us ghalat kaam ka badla lay jo ham nay us kay saath kiya tha. phir kya hoga?” 16yah soch kar unhon nay yoosuf ko khabar bhejee, “aap kay baap nay marnay say peshtar hidaayat dee 17ki yoosuf ko bataana, ‘apnay bhaaiyon kay us ghalat kaam ko muaaf kar dena jo unhon nay tumhaaray saath kiya.’ ab hamen jo aap kay baap kay khuda kay pairokaar hain muaaf kar den.”
yah khabar sun kar yoosuf ro pada. 18phir us kay bhaaee khud aaay aur us kay saamnay gir gaay. unhon nay kaha, “ham aap kay khaadim hain.” 19lekin yoosuf nay kaha, “mat daro. kya main allaah kee jagah hoon? hargiz naheen! 20tum nay mujhay nuqsaan pahunchaanay ka iraada kiya tha, lekin allaah nay us say bhalaaee paida kee. aur ab is ka maqsad poora ho raha hai. bahut say log maut say bach rahay hain. 21chunaanchay ab darnay kee zaroorat naheen hai. main tumhen aur tumhaaray bachchon ko khuraak muhayya karta rahoonga.”
yoon yoosuf nay unhen tasallee dee aur un say narmee say baat kee.
yoosuf ka intiqaal
22yoosuf apnay baap kay khaandaan samet misr men raha. vah 110 saal zinda raha. 23maut say pahelay us nay na sirf ifraaeem kay bachchon ko balki us kay poton ko bhee dekha. manassee kay betay makeer kay bachchay bhee us kee maujoodgee men paida ho kar us kee god men rakhay gaay. [a] ghaaliban is ka matlab yah hai ki us nay unhen lepaalak banaaya.
24phir ek vaqt aaya ki yoosuf nay apnay bhaaiyon say kaha, “main marnay vaala hoon. lekin allaah zaroor aap kee dekh-bhaal karkay aap ko is mulk say us mulk men lay jaaega jis ka us nay ibraaheem, ishaaq aur yaaqoob say qasam kha kar vaada kiya hai.” 25phir yoosuf nay israaeeliyon ko qasam dila kar kaha, “allaah yaqeenan tumhaaree dekh-bhaal karkay vahaan lay jaaega. us vaqt meree haddiyon ko bhee utha kar saath lay jaana.”
26phir yoosuf faut ho gaya. vah 110 saal ka tha. usay hanoot karkay misr men ek taaboot men rakha gaya.