Paidaaish 49
yaaqoob apnay beton ko barkat deta hai
1yaaqoob nay apnay beton ko bula kar kaha, “meray paas jama ho jaao taaki main tumhen bataaoon ki mustaqbil men tumhaaray saath kya kya hoga. 2ai yaaqoob kay beto, ikatthay ho kar suno, apnay baap israaeel kee baaton par ghaur karo.
3roobin, tum meray pahelauthay ho, meray zor aur meree taaqat ka pahela phal. tum izzat aur quvvat kay lihaaz say bartar ho. 4lekin choonki tum bekaaboo sailaab kee maanind ho is liyay tumhaaree avval haisiyat jaatee rahay. kyoonki tum nay meree haram say hambistar ho kar apnay baap kee behuramtee kee hai.
5shamaaoon aur laavee donon bhaaiyon kee talvaaren zulm-o-tashaddud kay hathiyaar rahay hain. 6meree jaan na un kee majlis men shaamil aur na un kee jamaaat men daakhil ho, kyoonki unhon nay ghussay men a kar doosron ko qatl kiya hai, unhon nay apnee marzee say bailon kee konchen kaatee hain. 7un kay ghussay par laanat ho jo itna zabardast hai aur un kay taish par jo itna sakht hai. main unhen yaaqoob kay mulk men tittar-bittar karoonga, unhen israaeel men muntashir kar doonga.
8yahoodaah, tumhaaray bhaaee tumhaaree taareef karengay. tum apnay dushmanon kee gardan pakday rahogay, aur tumhaaray baap kay betay tumhaaray saamnay jhuk jaaengay. 9yahoodaah sherbabar ka bachcha hai. meray betay, tum abhee abhee shikaar maar kar vaapas aaay ho. yahoodaah sherbabar balki shernee kee tarah dabak kar baith jaata hai. kaun usay chhednay kee jur’at karega? 10shaahee asa yahoodaah say door naheen hoga balki shaahee ikhtiyaar us vaqt tak us kee aulaad kay paas rahega jab tak vah haakim na aaay jis kay taabay qaumen rahengee. 11vah apna javaan gadha angoor kee bel say aur apnee gadhee ka bachcha behtareen angoor kee bel say baandhega. vah apna libaas mai men aur apna kapda angoor kay khoon men dhoega. 12us kee aankhen mai say ziyaada gadlee aur us kay daant doodh say ziyaada safed hongay.
13zabooloon saahil par aabaad hoga jahaan baheree jahaaz hongay. us kee hadd saida tak hogee.
14ishkaar taaqatvar gadha hai jo apnay zeen kay do boron kay darmiyaan baitha hai. 15jab vah dekhega ki us kee aaraamgaah achchhee aur us ka mulk khushnuma hai to vah bojh uthaanay kay liyay tayyaar ho jaaega aur ujrat kay baghair kaam karnay kay liyay majboor kiya jaaega.
16daan apnee qaum ka insaaf karega agarchi vah israaeel kay qabeelon men say ek hee hai. 17daan sadak kay saamp aur raastay kay afaee kee maanind hoga. vah ghoday kee ediyon ko kaatega to us ka savaar peechhay gir jaaega.
18ai rabb, main teree hee najaat kay intizaar men hoon!
19jad par daakuon ka jatha hamla karega, lekin vah palat kar usee par hamla kar dega.
20aashar ko ghizaaiyat vaalee khuraak haasil hogee. vah lazeez shaahee khaana muhayya karega.
21naftaalee aazaad chhodee huee hirnee hai. vah khoobsoorat baaten karta hai. [a] ya khoobsoorat bachchay paida kartee hai.
22yoosuf phaldaar bel hai. vah chashmay par lagee huee phaldaar bel hai jis kee shaakhen deevaar par chadh gaee hain. 23teer’andaazon nay us par teer chala kar usay tang kiya aur us kay peechhay pad gaay, 24lekin us kee kamaan mazboot rahee, aur us kay baazoo yaaqoob kay zoraavar khuda kay sabab say taaqatvar rahay, us charvaahay kay sabab say jo israaeel ka zabardast soorma hai. 25kyoonki teray baap ka khuda teree madad karta hai, allaah qaadir-ay-mutlaq tujhay aasmaan kee barkat, zameen kee gaheraaiyon kee barkat aur aulaad kee barkat deta hai. 26teray baap kee barkat qadeem pahaadon aur abdee pahaadiyon kee marghoob cheezon say ziyaada azeem hai. yah tamaam barkat yoosuf kay sar par ho, us shakhs kay chaand par jo apnay bhaaiyon par shahzaada hai.
27binyameen phaadnay vaala bhediya hai. subah vah apna shikaar kha jaata aur raat ko apna loota hua maal taqseem kar deta hai.”
28yah israaeel kay kul baarah qabeelay hain. aur yah vah kuchh hai jo un kay baap nay un say barkat detay vaqt kaha. us nay har ek ko us kee apnee barkat dee.
yaaqoob ka intiqaal
29phir yaaqoob nay apnay beton ko hukm diya, “ab main kooch karkay apnay baapdaada say ja miloonga. mujhay meray baapdaada kay saath us ghaar men dafnaana jo hittee aadmee ifron kay khet men hai. 30yaanee vah ghaar jo mulk-ay-kan’aan men mamray kay mashriq men makfeela kay khet men hai. ibraaheem nay usay khet samet apnay logon ko dafnaanay kay liyay ifron hittee say khareed liya tha. 31vahaan ibraaheem aur us kee beevee saara dafnaaay gaay, vahaan ishaaq aur us kee beevee ribqa dafnaaay gaay aur vahaan main nay liyaah ko dafan kiya. 32vah khet aur us ka ghaar hittiyon say khareeda gaya tha.”
33in hidaayaat kay baad yaaqoob nay apnay paaon bistar par samet liyay aur dam chhod kar apnay baapdaada say ja mila.