Paidaaish 48

yaaqoob ifraaeem aur manassee ko barkat deta hai

¹kuchh der kay baad yoosuf ko ittila dee gaee ki aap ka baap beemaar hai. vah apnay do beton manassee aur ifraaeem ko saath lay kar yaaqoob say milnay gaya.

²yaaqoob ko bataaya gaya, “aap ka beta a gaya hai” to vah apnay aap ko sambhaal kar apnay bistar par baith gaya. ³us nay yoosuf say kaha, “jab main kan’aanee shaher looz men tha to allaah qaadir-ay-mutlaq mujh par zaahir hua. us nay mujhay barkat day kar ⁴kaha, ‘main tujhay phalnay phoolnay doonga aur teree aulaad badha doonga balki tujh say bahut see qaumen nikalnay doonga. aur main teree aulaad ko yah mulk hamesha kay liyay day doonga.’ ⁵ab meree baat sun. main chaahata hoon ki teray betay jo meray aanay say pahelay misr men paida huay meray betay hon. ifraaeem aur manassee roobin aur shamaaoon kay baraabar hee meray betay hon. ⁶agar in kay baad teray haan aur betay paida ho jaaen to vah meray betay naheen balki teray thaherengay. jo meeraas vah paaengay vah unhen ifraaeem aur manassee kee meeraas men say milegee. ⁷main yah teree maan raakhil kay sabab say kar raha hoon jo masoputaamiya say vaapsee kay vaqt kan’aan men ifraata kay qareeb mar gaee. main nay usay vaheen raastay men dafan kiya” (aaj ifraata ko bait-lahem kaha jaata hai).

⁸phir yaaqoob nay yoosuf kay beton par nazar daal kar poochha, “yah kaun hain?” ⁹yoosuf nay javaab diya, “yah meray betay hain jo allaah nay mujhay yahaan misr men diay.” yaaqoob nay kaha, “unhen meray qareeb lay a taaki main unhen barkat doon.” ¹⁰boodha honay kay sabab say yaaqoob kee aankhen kamzor theen. vah achchhee tarah dekh naheen sakta tha. yoosuf apnay beton ko yaaqoob kay paas lay aaya to us nay unhen bosa day kar galay lagaayaa ¹¹aur yoosuf say kaha, “mujhay tavaqqo hee naheen thee ki main kabhee tera chihara dekhoonga, aur ab allaah nay mujhay teray beton ko dekhnay ka mauqa bhee diya hai.”

¹²phir yoosuf unhen yaaqoob kee god men say lay kar khud us kay saamnay munh kay bal jhuk gaya. ¹³yoosuf nay ifraaeem ko yaaqoob kay baaen haath rakha aur manassee ko us kay daaen haath. ¹⁴lekin yaaqoob nay apna dahena haath baaeen taraf badha kar ifraaeem kay sar par rakha agarchi vah chhota tha. is tarah us nay apna baayaan haath daaeen taraf badha kar manassee kay sar par rakha jo bada tha. ¹⁵phir us nay yoosuf ko us kay beton kee maarifat barkat dee, “allaah jis kay huzoor meray baapdaada ibraaheem aur ishaaq chaltay rahay aur jo shuroo say aaj tak mera charvaaha raha hai inhen barkat day. ¹⁶jis farishtay nay ivzaana day kar mujhay har nuqsaan say bachaaya hai vah inhen barkat day. allaah karay ki in men mera naam aur meray baapdaada ibraaheem aur ishaaq kay naam jeetay rahen. duniya men in kee aulaad kee taadaad bahut badh jaaay.”

¹⁷jab yoosuf nay dekha ki baap nay apna dahena haath chhotay betay ifraaeem kay sar par rakha hai to yah usay bura laga, is liyay us nay baap ka haath pakda taaki usay ifraaeem kay sar par say utha kar manassee kay sar par rakhay. ¹⁸us nay kaha, “abboo, aisay naheen. doosra ladka bada hai. usee par apna dahena haath rakhen.” ¹⁹lekin baap nay inkaar karkay kaha, “mujhay pata hai beta, mujhay pata hai. vah bhee ek badee qaum banega. phir bhee us ka chhota bhaaee us say bada hoga aur us say qaumon kee badee taadaad niklegee.”

²⁰us din us nay donon beton ko barkat day kar kaha, “israaeelee tumhaara naam lay kar barkat diya karengay. jab vah barkat dengay to kahengay, ‘allaah aap kay saath vaisa karay jaisa us nay ifraaeem aur manassee kay saath kiya hai’.” is tarah yaaqoob nay ifraaeem ko manassee say bada bana diya. ²¹yoosuf say us nay kaha, “main to marnay vaala hoon, lekin allaah tumhaaray saath hoga aur tumhen tumhaaray baapdaada kay mulk men vaapas lay jaaega. ²²ek baat men main tujhay teray bhaaiyon par tarjeeh deta hoon, main tujhay kan’aan men vah qit’a deta hoon jo main nay apnee talvaar aur kamaan say amoriyon say chheena tha.”