Paidaaish 47

¹yoosuf firaaun kay paas gaya aur usay ittila day kar kaha, “mera baap aur bhaaee apnee bhed-bakriyon, gaay-bailon aur saaray maal samet mulk-ay-kan’aan say a kar jushan men thaheray huay hain.” ²us nay apnay bhaaiyon men say paanch ko chun kar firaaun kay saamnay pesh kiya. ³firaaun nay bhaaiyon say poochha, “tum kya kaam kartay ho?” unhon nay javaab diya, “aap kay khaadim bhed-bakriyon kay charvaahay hain. yah hamaaray baapdaada ka pesha tha aur hamaara bhee hai. ⁴ham yahaan aaay hain taaki kuchh der ajnabee kee haisiyat say aap kay paas thaheren, kyoonki kaal nay kan’aan men bahut zor pakda hai. vahaan aap kay khaadimon kay jaanvaron kay liyay charaagaahen khatm ho gaee hain. is liyay hamen jushan men rahenay kee ijaazat den.”

⁵baadshaah nay yoosuf say kaha, “tera baap aur bhaaee teray paas a gaay hain. ⁶mulk-ay-misr teray saamnay khula hai. unhen behtareen jagah par aabaad kar. vah jushan men rahen. aur agar un men say kuchh hain jo khaas qaabiliyat rakhtay hain to unhen meray maveshiyon kee nigahdaashat par rakh.”

⁷phir yoosuf apnay baap yaaqoob ko lay aaya aur firaaun kay saamnay pesh kiya. yaaqoob nay baadshaah ko barkat dee. ⁸baadshaah nay us say poochha, “tumhaaree umr kya hai?” ⁹yaaqoob nay javaab diya, “main 130 saal say is duniya ka mehamaan hoon. meree zindagee mukhtasar aur takleefdih thee, aur meray baapdaada mujh say ziyaada umrraseeda huay thay jab vah is duniya kay mehamaan thay.” ¹⁰yah kah kar yaaqoob firaaun ko dubaara barkat day kar chala gaya.

¹¹phir yoosuf nay apnay baap aur bhaaiyon ko misr men aabaad kiya. us nay unhen raamsees kay ilaaqay men behtareen zameen dee jis tarah baadshaah nay hukm diya tha. ¹²yoosuf apnay baap kay pooray gharaanay ko khuraak muhayya karta raha. har khaandaan ko us kay bachchon kee taadaad kay mutaabiq khuraak miltee rahee.

kaal ka sakht asar

¹³kaal itna sakht tha ki kaheen bhee rotee naheen miltee thee. misr aur kan’aan men log nidhaal ho gaay.

¹⁴misr aur kan’aan kay tamaam paisay anaaj khareednay kay liyay sarf ho gaay. yoosuf unhen jama karkay firaaun kay mahel men lay aaya. ¹⁵jab misr aur kan’aan kay paisay khatm ho gaay to misriyon nay yoosuf kay paas a kar kaha, “hamen rotee den! ham aap kay saamnay kyoon maren? hamaaray paisay khatm ho gaay hain.” ¹⁶yoosuf nay javaab diya, “agar aap kay paisay khatm hain to mujhay apnay maveshee den. main un kay ivz rotee deta hoon.” ¹⁷chunaanchay vah apnay ghoday, bhed-bakriyaan, gaay-bail aur gadhay yoosuf kay paas lay aaay. in kay ivz us nay unhen khuraak dee. us saal us nay unhen un kay tamaam maveshiyon kay ivz khuraak muhayya kee.

¹⁸aglay saal vah dubaara us kay paas aaay. unhon nay kaha, “janaab-ay-aalee, ham yah baat aap say naheen chhupa saktay ki ab ham sirf apnay aap aur apnee zameen ko aap ko day saktay hain. hamaaray paisay to khatm hain aur aap hamaaray maveshee bhee lay chukay hain. ¹⁹ham kyoon aap kee aankhon kay saamnay mar jaaen? hamaaree zameen kyoon tabaah ho jaaay? hamen rotee den to ham aur hamaaree zameen baadshaah kee hogee. ham firaaun kay ghulaam hongay. hamen beej den taaki ham jeetay bachen aur zameen tabaah na ho jaaay.”

²⁰chunaanchay yoosuf nay firaaun kay liyay misr kee pooree zameen khareed lee. kaal kee sakhtee kay sabab say tamaam misriyon nay apnay khet bech diay. is tareeqay say poora mulk firaaun kee milkiyat men a gaya. ²¹yoosuf nay misr kay ek siray say doosray siray tak kay logon ko shaheron men muntaqil kar diya. ²²sirf pujaariyon kee zameen aazaad rahee. unhen apnee zameen bechanay kee zaroorat hee naheen thee, kyoonki unhen firaaun say itna vazeefa milta tha ki guzaara ho jaata tha.

²³yoosuf nay logon say kaha, “ghaur say sunen. aaj main nay aap ko aur aap kee zameen ko baadshaah kay liyay khareed liya hai. ab yah beej lay kar apnay kheton men bona. ²⁴aap ko firaaun ko fasal ka paanchvaan hissa dena hai. baaqee paidaavaar aap kee hogee. aap is say beej bo saktay hain, aur yah aap kay aur aap kay gharaanon aur bachchon kay khaanay kay liyay hoga.” ²⁵unhon nay javaab diya, “aap nay hamen bachaaya hai. hamaaray maalik ham par meharbaanee karen to ham firaaun kay ghulaam banengay.”

²⁶is tarah yoosuf nay misr men yah qaanoon naafiz kiya ki har fasal ka paanchvaan hissa baadshaah ka hai. yah qaanoon aaj tak jaaree hai. sirf pujaariyon kee zameen baadshaah kee milkiyat men na aaee.

yaaqoob kee aakhiree guzaarish

²⁷israaeelee misr men jushan kay ilaaqay men aabaad huay. vahaan unhen zameen milee, aur vah phalay phoolay aur taadaad men bahut badh gaay.

²⁸yaaqoob 17 saal misr men raha. vah 147 saal ka tha jab faut hua. ²⁹jab marnay ka vaqt qareeb aaya to us nay yoosuf ko bula kar kaha, “meharbaanee karkay apna haath meree raan kay neechay rakh kar qasam kha ki too mujh par shafqat aur vafaadaaree ka is tarah izhaar karega ki mujhay misr men dafan naheen karega. ³⁰jab main mar kar apnay baapdaada say ja miloonga to mujhay misr say lay ja kar meray baapdaada kee qabr men dafnaana.” yoosuf nay javaab diya, “theek hai.” ³¹yaaqoob nay kaha, “qasam kha ki too aisa hee karega.” yoosuf nay qasam khaaee. tab israaeel nay apnay bistar kay sirahaanay par allaah ko sijda kiya.