Paidaaish 46

yaaqoob misr jaata hai

¹yaaqoob sab kuchh lay kar ravaana hua aur bair-saba pahuncha. vahaan us nay apnay baap ishaaq kay khuda kay huzoor qurbaaniyaan chadhaaeen. ²raat ko allaah roya men us say hamkalaam hua. us nay kaha, “yaaqoob, yaaqoob!” yaaqoob nay javaab diya, “jee, main haazir hoon.” ³allaah nay kaha, “main allaah hoon, teray baap ishaaq ka khuda. misr jaanay say mat dar, kyoonki vahaan main tujh say ek badee qaum banaaoonga. ⁴main teray saath misr jaaoonga aur tujhay is mulk men vaapas bhee lay aaoonga. jab too marega to yoosuf khud teree aankhen band karega.”

⁵is kay baad yaaqoob bair-saba say ravaana hua. us kay beton nay usay aur apnay baal-bachchon ko un gaadiyon men bitha diya jo misr kay baadshaah nay bhijvaaee theen. ⁶yoon yaaqoob aur us kee tamaam aulaad apnay maveshee aur kan’aan men haasil kiya hua maal lay kar misr chalay gaay. ⁷yaaqoob kay betay-betiyaan, potay-potiyaan aur baaqee aulaad sab saath gaay.

⁸israaeel kee aulaad kay naam jo misr chalee gaee yah hain :

yaaqoob kay pahelauthay roobin ⁹kay betay hanook, falloo, hasron aur karmee thay. ¹⁰shamaaoon kay betay yamooel, yameen, uhad, yakeen, suhar aur saaool thay (saaool kan’aanee aurat ka bachcha tha). ¹¹laavee kay betay jairson, qihaat aur miraaree thay. ¹²yahoodaah kay betay er, onaan, sela, faaras aur zaarah thay (er aur onaan kan’aan men mar chukay thay). faaras kay do betay hasron aur hamool thay. ¹³ishkaar kay betay tola, fuvva, yob aur simron thay. ¹⁴zabooloon kay betay sarad, ailon aur yaheleeel thay. ¹⁵in beton kee maan liyaah thee, aur vah masoputaamiya men paida huay. in kay ilaava deena us kee betee thee. kul 33 mard liyaah kee aulaad thay.

¹⁶jad kay betay sifyaan, hajjee, soonee, isboon, eree, aroodee aur arelee thay. ¹⁷aashar kay betay yimna, isvaah, isvee aur bareea thay. aashar kee betee sirah thee, aur bareea kay do betay thay, hibar aur malkeeel. ¹⁸kul 16 afraad zilfa kee aulaad thay jisay laaban nay apnee betee liyaah ko diya tha.

¹⁹raakhil kay betay yoosuf aur binyameen thay. ²⁰yoosuf kay do betay manassee aur ifraaeem misr men paida huay. un kee maan on kay pujaaree foteefira kee betee aasnat thee. ²¹binyameen kay betay baala, bakar, ashbel, jeera, naamaan, ikhee, ros, muffeem, huffeem aur ard thay. ²²kul 14 mard raakhil kee aulaad thay.

²³daan ka beta husheem tha. ²⁴naftaalee kay betay yaheseeel, joonee, yisar aur silleem thay. ²⁵kul 7 mard bilhaah kee aulaad thay jisay laaban nay apnee betee raakhil ko diya tha.

²⁶yaaqoob kee aulaad kay 66 afraad us kay saath misr chalay gaay. is taadaad men beton kee beeviyaan shaamil naheen theen. ²⁷jab ham yaaqoob, yoosuf aur us kay do betay in men shaamil kartay hain to yaaqoob kay gharaanay kay 70 afraad misr gaay.

yaaqoob aur us ka khaandaan misr men

²⁸yaaqoob nay yahoodaah ko apnay aagay yoosuf kay paas bheja taaki vah jushan men un say milay. jab vah vahaan pahunche ²⁹to yoosuf apnay rath par savaar ho kar apnay baap say milnay kay liyay jushan gaya. usay dekh kar vah us kay galay lag kar kaafee der rota raha. ³⁰yaaqoob nay yoosuf say kaha, “ab main marnay kay liyay tayyaar hoon, kyoonki main nay khud dekha hai ki too zinda hai.”

³¹phir yoosuf nay apnay bhaaiyon aur apnay baap kay khaandaan kay baaqee afraad say kaha, “zarooree hai ki main ja kar baadshaah ko ittila doon ki meray bhaaee aur meray baap ka poora khaandaan jo kan’aan kay rahenay vaalay hain meray paas a gaay hain. ³²main us say kahoonga, ‘yah aadmee bhed-bakriyon kay charvaahay hain. vah maveshee paaltay hain, is liyay apnee bhed-bakriyaan, gaay-bail aur baaqee saara maal apnay saath lay aaay hain.’ ³³baadshaah tumhen bula kar poochhega ki tum kya kaam kartay ho? ³⁴phir tum ko javaab dena hai, ‘aap kay khaadim bachpan say maveshee paaltay aaay hain. yah hamaaray baapdaada ka pesha tha aur hamaara bhee hai.’ agar tum yah kaho to tumhen jushan men rahenay kee ijaazat milegee. kyoonki bhed-bakriyon kay charvaahay misriyon kee nazar men qaabil-ay-nafrat hain.”