Paidaaish 45
yoosuf apnay aap ko zaahir karta hai
1yah sun kar yoosuf apnay aap par qaaboo na rakh saka. us nay oonchee aavaaz say hukm diya ki tamaam mulaazim kamray say nikal jaaen. koee aur shakhs kamray men naheen tha jab yoosuf nay apnay bhaaiyon ko bataaya ki vah kaun hai. 2vah itnay zor say ro pada ki misriyon nay us kee aavaaz sunee aur firaaun kay gharaanay ko pata chal gaya. 3yoosuf nay apnay bhaaiyon say kaha, “main yoosuf hoon. kya mera baap ab tak zinda hai?”
lekin us kay bhaaee yah sun kar itnay ghabra gaay ki vah javaab na day sakay.
4phir yoosuf nay kaha, “meray qareeb aao.” vah qareeb aaay to us nay kaha, “main tumhaara bhaaee yoosuf hoon jisay tum nay bech kar misr bhijvaaya. 5ab meree baat suno. na ghabraao aur na apnay aap ko ilzaam do ki ham nay yoosuf ko bech diya. asal men allaah nay khud mujhay tumhaaray aagay yahaan bhej diya taaki ham sab bachay rahen. 6yah kaal ka doosra saal hai. paanch aur saal kay dauraan na hal chalega, na fasal kategee. 7allaah nay mujhay tumhaaray aagay bheja taaki duniya men tumhaara ek bacha khacha hissa mahfooz rahay aur tumhaaree jaan ek badee makhlsee kee maarifat chhoot jaae 8chunaanchay tum nay mujhay yahaan naheen bheja balki allaah nay. us nay mujhay firaaun ka baap, us kay pooray gharaanay ka maalik aur misr ka haakim bana diya hai. 9ab jaldee say meray baap kay paas vaapas ja kar un say kaho, ‘aap ka beta yoosuf aap ko ittila deta hai ki allaah nay mujhay misr ka maalik bana diya hai. meray paas a jaaen, der na karen. 10aap jushan kay ilaaqay men rah saktay hain. vahaan aap meray qareeb hongay, aap, aap kee aal-o-aulaad, gaay-bail, bhed-bakriyaan aur jo kuchh bhee aap ka hai. 11vahaan main aap kee zarooriyaat pooree karoonga, kyoonki kaal ko abhee paanch saal aur lagengay. varna aap, aap kay ghar vaalay aur jo bhee aap kay hain badahaal ho jaaengay.’ 12tum khud aur mera bhaaee binyameen dekh saktay ho ki main yoosuf hee hoon jo tumhaaray saath baat kar raha hoon. 13meray baap ko misr men meray asar-o-rasookh kay baaray men ittila do. unhen sab kuchh bataao jo tum nay dekha hai. phir jald hee meray baap ko yahaan lay aao.”
14yah kah kar vah apnay bhaaee binyameen ko galay laga kar ro pada. binyameen bhee us kay galay lag kar ronay laga. 15phir yoosuf nay rotay huay apnay har ek bhaaee ko bosa diya. is kay baad us kay bhaaee us kay saath baaten karnay lagay.
16jab yah khabar baadshaah kay mahel tak pahunchee ki yoosuf kay bhaaee aaay hain to firaaun aur us kay tamaam afsaraan khush huay. 17us nay yoosuf say kaha, “apnay bhaaiyon ko bata ki apnay jaanvaron par ghalla laad kar mulk-ay-kan’aan vaapas chalay jaao. 18vahaan apnay baap aur khaandaanon ko lay kar meray paas a jaao. main tum ko misr kee sab say achchhee zameen day doonga, aur tum is mulk kee behtareen paidaavaar kha sakogay. 19unhen yah hidaayat bhee day ki apnay baal-bachchon kay liyay misr say gaadiyaan lay jaao aur apnay baap ko bhee bitha kar yahaan lay aao. 20apnay maal kee ziyaada fikr na karo, kyoonki tumhen mulk-ay-misr ka behtareen maal milega.”
21yoosuf kay bhaaiyon nay aisa hee kiya. yoosuf nay unhen baadshaah kay hukm kay mutaabiq gaadiyaan aur safar kay liyay khuraak dee. 22us nay har ek bhaaee ko kapdon ka ek joda bhee diya. lekin binyameen ko us nay chaandee kay 300 sikkay aur paanch joday diay. 23us nay apnay baap ko das gadhay bhijva diay jo misr kay behtareen maal say laday huay thay aur das gadhiyaan jo anaaj, rotee aur baap kay safar kay liyay khaanay say ladee huee theen. 24yoon us nay apnay bhaaiyon ko rukhsat karkay kaha, “raastay men jhagda na karna.”
25vah misr say ravaana ho kar mulk-ay-kan’aan men apnay baap kay paas pahunchay. 26unhon nay us say kaha, “yoosuf zinda hai! vah pooray misr ka haakim hai.” lekin yaaqoob hakka-bakka rah gaya, kyoonki usay yaqeen na aaya. 27taaham unhon nay usay sab kuchh bataaya jo yoosuf nay un say kaha tha, aur us nay khud vah gaadiyaan dekheen jo yoosuf nay usay misr lay jaanay kay liyay bhijva dee theen. phir yaaqoob kee jaan men jaan a gaee, 28aur us nay kaha, “mera beta yoosuf zinda hai! yahee kaafee hai. marnay say pahelay main ja kar us say miloonga.”