Paidaaish 44

gumshuda piyaalaa

¹yoosuf nay ghar par muqarrar mulaazim ko hukm diya, “un mardon kee boriyaan khuraak say itnee bhar dena jitnee vah utha kar lay ja saken. har ek kay paisay us kee apnee boree kay munh men rakh dena. ²sab say chhotay bhaaee kee boree men na sirf paisay balki meray chaandee kay piyaalay ko bhee rakh dena.” mulaazim nay aisa hee kiya.

³aglee subah jab pau phatnay lagee to bhaaiyon ko un kay gadhon samet rukhsat kar diya gaya. ⁴vah abhee shaher say nikal kar door naheen gaay thay ki yoosuf nay apnay ghar par muqarrar mulaazim say kaha, “jaldee karo. un aadmiyon ka taaqqub karo. un kay paas pahunch kar yah poochhna, ‘aap nay hamaaree bhalaaee kay javaab men ghalat kaam kyoon kiya hai? ⁵aap nay meray maalik ka chaandee ka piyaala kyoon churaaya hai? us say vah na sirf peetay hain balki usay ghaibdaanee kay liyay bhee istemaal kartay hain. aap ek nihaayat sangeen jurm kay murtaqib huay hain’.”

⁶jab mulaazim bhaaiyon kay paas pahuncha to us nay un say yahee baaten keen. ⁷javaab men unhon nay kaha, “hamaaray maalik aisee baaten kyoon kartay hain? kabhee naheen ho sakta ki aap kay khaadim aisa karen. ⁸aap to jaantay hain ki ham mulk-ay-kan’aan say vah paisay vaapas lay aaay jo hamaaree boriyon men thay. to phir ham kyoon aap kay maalik kay ghar say chaandee ya sona churaaengay? ⁹agar vah aap kay khaadimon men say kisee kay paas mil jaaay to usay maar daala jaaay aur baaqee sab aap kay ghulaam banen.”

¹⁰mulaazim nay kaha, “theek hai aisa hee hoga. lekin sirf vahee mera ghulaam banega jis nay piyaala churaaya hai. baaqee sab aazaad hain.” ¹¹unhon nay jaldee say apnee boriyaan utaar kar zameen par rakh deen. har ek nay apnee boree khol dee. ¹²mulaazim boriyon kee talaashee lenay laga. vah baday bhaaee say shuroo karkay aakhirkaar sab say chhotay bhaaee tak pahunch gaya. aur vahaan binyameen kee boree men say piyaala nikla. ¹³bhaaiyon nay yah dekh kar pareshaanee men apnay libaas phaad liyay. vah apnay gadhon ko dubaara laad kar shaher vaapas a gaay.

¹⁴jab yahoodaah aur us kay bhaaee yoosuf kay ghar pahunchay to vah abhee vaheen tha. vah us kay saamnay munh kay bal gir gaay. ¹⁵yoosuf nay kaha, “yah tum nay kya kiya hai? kya tum naheen jaantay ki mujh jaisa aadmee ghaib ka ilm rakhta hai?” ¹⁶yahoodaah nay kaha, “janaab-ay-aalee, ham kya kahen? ab ham apnay difa men kya kahen? allaah hee nay hamen qusoorvaar thaheraaya hai. ab ham sab aap kay ghulaam hain, na sirf vah jis kay paas say piyaala mil gaya.” ¹⁷yoosuf nay kaha, “allaah na karay ki main aisa karoon, balki sirf vahee mera ghulaam hoga jis kay paas piyaala tha. baaqee sab salaamatee say apnay baap kay paas vaapas chalay jaaen.”

yahoodaah binyameen kee sifaarish karta hai

¹⁸lekin yahoodaah nay yoosuf kay qareeb a kar kaha, “meray maalik, meharbaanee karkay apnay banday ko ek baat karnay kee ijaazat den. mujh par ghussa na karen agarchi aap misr kay baadshaah jaisay hain. ¹⁹janaab-ay-aalee, aap nay ham say poochha, ‘kya tumhaara baap ya koee aur bhaaee hai?’ ²⁰ham nay javaab diya, ‘hamaara baap hai. vah boodha hai. hamaara ek chhota bhaaee bhee hai jo us vaqt paida hua jab hamaara baap umrraseeda tha. us ladkay ka bhaaee mar chuka hai. us kee maan kay sirf yah do betay paida huay. ab vah akela hee rah gaya hai. us ka baap usay shiddat say piyaar karta hai.’ ²¹janaab-ay-aalee, aap nay hamen bataaya, ‘usay yahaan lay aao taaki main khud usay dekh sakoon.’ ²²ham nay javaab diya, ‘yah ladka apnay baap ko chhod naheen sakta, varna us ka baap mar jaaega.’ ²³phir aap nay kaha, ‘tum sirf is soorat men meray paas a sakogay ki tumhaara sab say chhota bhaaee tumhaaray saath ho.’ ²⁴jab ham apnay baap kay paas vaapas pahunchay to ham nay unhen sab kuchh bataaya jo aap nay kaha tha. ²⁵phir unhon nay ham say kaha, ‘misr laut kar kuchh ghalla khareed laao.’ ²⁶ham nay javaab diya, ‘ham ja naheen saktay. ham sirf is soorat men us mard kay paas ja saktay hain ki hamaara sab say chhota bhaaee saath ho. ham tab hee ja saktay hain jab vah bhee hamaaray saath chalay.’ ²⁷hamaaray baap nay ham say kaha, ‘tum jaantay ho ki meree beevee raakhil say meray do betay paida huay. ²⁸pahela mujhay chhod chuka hai. kisee janglee jaanvar nay usay phaad khaaya hoga, kyoonki usee vaqt say main nay usay naheen dekha. ²⁹agar is ko bhee mujh say lay jaanay kee vajah say jaanee nuqsaan pahunchay to tum mujh boodhay ko gham kay maaray paataal men pahunchaaogay’.”

^30-31 yahoodaah nay apnee baat jaaree rakhee, “janaab-ay-aalee, ab agar main apnay baap kay paas jaaoon aur vah dekhen ki ladka meray saath naheen hai to vah dam tod dengay. un kee zindagee is qadar ladkay kee zindagee par munhasir hai aur vah itnay boodhay hain ki ham aisee harkat say unhen qabr tak pahuncha dengay. ³²na sirf yah balki main nay baap say kaha, ‘main khud is ka zaamin hoonga. agar main isay salaamatee say vaapas na pahunchaaoon to phir main zindagee kay aakhir tak qusoorvaar thaheroonga.’ ³³ab apnay khaadim kee guzaarish sunen. main yahaan rah kar is ladkay kee jagah ghulaam ban jaata hoon, aur vah doosray bhaaiyon kay saath vaapas chala jaae ³⁴agar ladka meray saath na hua to main kis tarah apnay baap ko munh dikha sakta hoon? main bardaasht naheen kar sakoonga ki vah is museebat men mubtala ho jaaen.”