Paidaaish 43

binyameen kay hamraah doosra safar

¹kaal nay zor pakda. ²jab misr say laaya gaya anaaj khatm ho gaya to yaaqoob nay kaha, “ab vaapas ja kar hamaaray liyay kuchh aur ghalla khareed laao.” ³lekin yahoodaah nay kaha, “us mard nay sakhtee say kaha tha, ‘tum sirf is soorat men meray paas a saktay ho ki tumhaara bhaaee saath ho.’ ⁴agar aap hamaaray bhaaee ko saath bhejen to phir ham ja kar aap kay liyay ghalla khareedenge ⁵varna naheen. kyoonki us aadmee nay kaha tha ki ham sirf is soorat men us kay paas a saktay hain ki hamaara bhaaee saath ho.” ⁶yaaqoob nay kaha, “tum nay usay kyoon bataaya ki hamaara ek aur bhaaee bhee hai? is say tum nay mujhay badee museebat men daal diya hai.” ⁷unhon nay javaab diya, “vah aadmee hamaaray aur hamaaray khaandaan kay baaray men poochhta raha, ‘kya tumhaara baap ab tak zinda hai? kya tumhaara koee aur bhaaee hai?’ phir hamen javaab dena pada. hamen kya pata tha ki vah hamen apnay bhaaee ko saath laanay ko kahega.” ⁸phir yahoodaah nay baap say kaha, “ladkay ko meray saath bhej den to ham abhee ravaana ho jaaengay. varna aap, hamaaray bachchay balki ham sab bhookon mar jaaengay. ⁹main khud us ka zaamin hoonga. aap mujhay us kee jaan ka zimmaadaar thahera saktay hain. agar main usay salaamatee say vaapas na pahunchaaoon to phir main zindagee kay aakhir tak qusoorvaar thaheroonga. ¹⁰jitnee der tak ham jhijaktay rahay hain utnee der men to ham do dafa misr ja kar vaapas a saktay thay.”

¹¹tab un kay baap israaeel nay kaha, “agar aur koee soorat naheen to is mulk kee behtareen paidaavaar men say kuchh tuhfay kay taur par lay kar us aadmee ko day do yaanee kuchh balsaan, shahed, laadan, mur, pista aur baadaam. ¹²apnay saath dugnee raqam lay kar jaao, kyoonki tumhen vah paisay vaapas karnay hain jo tumhaaree boriyon men rakhay gaay thay. shaayad kisee say ghaltee huee ho. ¹³apnay bhaaee ko lay kar seedhay vaapas pahunchna. ¹⁴allaah qaadir-ay-mutlaq karay ki yah aadmee tum par rahem karkay binyameen aur tumhaaray doosray bhaaee ko vaapas bhejay. jahaan tak mera taalluq hai, agar mujhay apnay bachchon say maheroom hona hai to aisa hee ho.”

¹⁵chunaanchay vah tuhfay, dugnee raqam aur binyameen ko saath lay kar chal paday. misr pahunch kar vah yoosuf kay saamnay haazir huay. ¹⁶jab yoosuf nay binyameen ko un kay saath dekha to us nay apnay ghar par muqarrar mulaazim say kaha, “in aadmiyon ko meray ghar lay jaao taaki vah dopaher ka khaana meray saath khaaen. jaanvar ko zabah karkay khaana tayyaar karo.”

¹⁷mulaazim nay aisa hee kiya aur bhaaiyon ko yoosuf kay ghar lay gaya. ¹⁸jab unhen us kay ghar pahunchaaya ja raha tha to vah dar kar sochnay lagay, “hamen un paison kay sabab say yahaan laaya ja raha hai jo pahelee dafa hamaaree boriyon men vaapas kiay gaay thay. vah ham par achaanak hamla karkay hamaaray gadhay chheen lengay aur hamen ghulaam bana lengay.”

¹⁹is liyay ghar kay darvaazay par pahunch kar unhon nay ghar par muqarrar mulaazim say kaha, ²⁰“janaab-ay-aalee, hamaaree baat sun leejiay. is say pahelay ham anaaj khareednay kay liyay yahaan aaay thay. ²¹lekin jab ham yahaan say ravaana ho kar raastay men raat kay liyay thaheray to ham nay apnee boriyaan khol kar dekha ki har boree kay munh men hamaaray paison kee pooree raqam padee hai. ham yah paisay vaapas lay aaay hain. ²²neez, ham mazeed khuraak khareednay kay liyay aur paisay lay aaay hain. khuda jaanay kis nay hamaaray yah paisay hamaaree boriyon men rakh diay.”

²³mulaazim nay kaha, “fikr na karen. mat daren. aap kay aur aap kay baap kay khuda nay aap kay liyay aap kee boriyon men yah khazaana rakha hoga. ba-har-haal mujhay aap kay paisay mil gaay hain.”

mulaazim shamaaoon ko un kay paas baahar lay aaya. ²⁴phir us nay bhaaiyon ko yoosuf kay ghar men lay ja kar unhen paaon dhonay kay liyay paanee aur gadhon ko chaara diya. ²⁵unhon nay apnay tuhfay tayyaar rakhay, kyoonki unhen bataaya gaya, “yoosuf dopaher ka khaana aap kay saath hee khaaega.”

²⁶jab yoosuf ghar pahuncha to vah apnay tuhfay lay kar us kay saamnay aaay aur munh kay bal jhuk gaay. ²⁷us nay un say khairiyat darayaaft kee aur phir kaha, “tum nay apnay boodhay baap ka zikr kiya. kya vah theek hain? kya vah ab tak zinda hain?” ²⁸unhon nay javaab diya, “jee, aap kay khaadim hamaaray baap ab tak zinda hain.” vah dubaara munh kay bal jhuk gaay.

²⁹jab yoosuf nay apnay sagay bhaaee binyameen ko dekha to us nay kaha, “kya yah tumhaara sab say chhota bhaaee hai jis ka tum nay zikr kiya tha? beta, allaah kee nazar-ay-karam tum par ho.” ³⁰yoosuf apnay bhaaee ko dekh kar itna mut’assir hua ki vah ronay ko tha, is liyay vah jaldee say vahaan say nikal kar apnay sonay kay kamray men gaya aur ro pada. ³¹phir vah apna munh dho kar vaapas aaya. apnay aap par qaaboo pa kar us nay hukm diya ki naukar khaana lay aaen.

³²naukron nay yoosuf kay liyay khaanay ka alag intizaam kiya aur bhaaiyon kay liyay alag. misriyon kay liyay bhee khaanay ka alag intizaam tha, kyoonki ibraaniyon kay saath khaana khaana un kee nazar men qaabil-ay-nafrat tha. ³³bhaaiyon ko un kee umr kee tarteeb kay mutaabiq yoosuf kay saamnay bithaaya gaya. yah dekh kar bhaaee nihaayat hairaan huay. ³⁴naukron nay unhen yoosuf kee mez par say khaana lay kar khilaaya. lekin binyameen ko doosron kee nisbat paanch guna ziyaada mila. yoon unhon nay yoosuf kay saath jee bhar kar khaaya aur piya.