Paidaaish 42

yoosuf kay bhaaee misr men

¹jab yaaqoob ko maaloom hua ki misr men anaaj hai to us nay apnay beton say kaha, “tum kyoon ek doosray ka munh taktay ho? ²suna hai ki misr men anaaj hai. vahaan ja kar hamaaray liyay kuchh khareed laao taaki ham bhookay na maren.”

³tab yoosuf kay das bhaaee anaaj khareednay kay liyay misr gaay. ⁴lekin yaaqoob nay yoosuf kay sagay bhaaee binyameen ko saath na bheja, kyoonki us nay kaha, “aisa na ho ki usay jaanee nuqsaan pahunchay.” ⁵yoon yaaqoob kay betay bahut saaray aur logon kay saath misr gaay, kyoonki mulk-ay-kan’aan bhee kaal kee girift men tha.

⁶yoosuf misr kay haakim kee haisiyat say logon ko anaaj bechata tha, is liyay us kay bhaaee a kar us kay saamnay munh kay bal jhuk gaay. ⁷jab yoosuf nay apnay bhaaiyon ko dekha to us nay unhen pahechaan liya lekin aisa kiya jaisa un say naavaaqif ho aur sakhtee say un say baat kee, “tum kahaan say aaay ho?” unhon nay javaab diya, “ham mulk-ay-kan’aan say anaaj khareednay kay liyay aaay hain.” ⁸go yoosuf nay apnay bhaaiyon ko pahechaan liya, lekin unhon nay usay na pahechaana. ⁹usay vah khwaab yaad aaay jo us nay un kay baaray men dekhay thay. us nay kaha, “tum jaasoos ho. tum yah dekhnay aaay ho ki hamaara mulk kin kin jagahon par ghairmahfooz hai.”

¹⁰unhon nay kaha, “janaab, hargiz naheen. aap kay ghulaam ghalla khareednay aaay hain. ¹¹ham sab ek hee mard kay betay hain. aap kay khaadim shareef log hain, jaasoos naheen hain.” ¹²lekin yoosuf nay israar kiya, “naheen, tum dekhnay aaay ho ki hamaara mulk kin kin jagahon par ghairmahfooz hai.”

¹³unhon nay arz kee, “aap kay khaadim kul baarah bhaaee hain. ham ek hee aadmee kay betay hain jo kan’aan men raheta hai. sab say chhota bhaaee is vaqt hamaaray baap kay paas hai jabki ek mar gaya hai.” ¹⁴lekin yoosuf nay apna ilzaam duharaaya, “aisa hee hai jaisa main nay kaha hai ki tum jaasoos ho. ¹⁵main tumhaaree baaten jaanch loonga. firaaun kee hayaat kee qasam, pahelay tumhaara sab say chhota bhaaee aaay, varna tum is jagah say kabhee naheen ja sakogay. ¹⁶ek bhaaee ko usay laanay kay liyay bhej do. baaqee sab yahaan giriftaar rahengay. phir pata chalega ki tumhaaree baaten sachch hain ki naheen. agar naheen to firaaun kee hayaat kee qasam, is ka matlab yah hoga ki tum jaasoos ho.”

¹⁷yah kah kar yoosuf nay unhen teen din kay liyay qaidkhaanay men daal diya. ¹⁸teesray din us nay un say kaha, “main allaah ka khauf maanta hoon, is liyay tum ko ek shart par jeeta chhodoonga. ¹⁹agar tum vaaqaee shareef log ho to aisa karo ki tum men say ek yahaan qaidkhaanay men rahay jabki baaqee sab anaaj lay kar apnay bhookay ghar vaalon kay paas vaapas jaaen. ²⁰lekin laazim hai ki tum apnay sab say chhotay bhaaee ko meray paas lay aao. sirf is say tumhaaree baaten sachch saabit hongee aur tum maut say bach jaaogay.”

yoosuf kay bhaaee raazee ho gaay. ²¹vah aapas men kahenay lagay, “beshak yah hamaaray apnay bhaaee par zulm kee saza hai. jab vah iltija kar raha tha ki mujh par rahem karen to ham nay us kee badee museebat dekh kar bhee us kee na sunee. is liyay yah museebat ham par a gaee hai.” ²²aur roobin nay kaha, “kya main nay naheen kaha tha ki ladkay par zulm mat karo, lekin tum nay meree ek na maanee. ab us kee maut ka hisaab-kitaab kiya ja raha hai.”

²³unhen maaloom naheen tha ki yoosuf hamaaree baaten samajh sakta hai, kyoonki vah mutarjim kee maarifat un say baat karta tha. ²⁴yah baaten sun kar vah unhen chhod kar ronay laga. phir vah sambhal kar vaapas aaya. us nay shamaaoon ko chun kar usay un kay saamnay hee baandh liya.

yoosuf kay bhaaee kan’aan vaapas jaatay hain

²⁵yoosuf nay hukm diya ki mulaazim un kee boriyaan anaaj say bhar kar har ek bhaaee kay paisay us kee boree men vaapas rakh den aur unhen safar kay liyay khaana bhee den. unhon nay aisa hee kiya. ²⁶phir yoosuf kay bhaaee apnay gadhon par anaaj laad kar ravaana ho gaay.

²⁷jab vah raat kay liyay kisee jagah par thaheray to ek bhaaee nay apnay gadhay kay liyay chaara nikaalnay kee gharaz say apnee boree kholee to dekha ki boree kay munh men us kay paisay paday hain. ²⁸us nay apnay bhaaiyon say kaha, “meray paisay vaapas kar diay gaay hain! vah meree boree men hain.” yah dekh kar un kay hosh ud gaay. kaamptay huay vah ek doosray ko dekhnay aur kahenay lagay, “yah kya hai jo allaah nay hamaaray saath kiya hai?”

²⁹mulk-ay-kan’aan men apnay baap kay paas pahunch kar unhon nay usay sab kuchh sunaaya jo un kay saath hua tha. unhon nay kaha, ³⁰“us mulk kay maalik nay badee sakhtee say hamaaray saath baat kee. us nay hamen jaasoos qaraar diya. ³¹lekin ham nay us say kaha, ‘ham jaasoos naheen balki shareef log hain. ³²ham baarah bhaaee hain, ek hee baap kay betay. ek to mar gaya jabki sab say chhota bhaaee is vaqt kan’aan men baap kay paas hai.’ ³³phir us mulk kay maalik nay ham say kaha, ‘is say mujhay pata chalega ki tum shareef log ho ki ek bhaaee ko meray paas chhod do aur apnay bhookay ghar vaalon kay liyay khuraak lay kar chalay jaao. ³⁴lekin apnay sab say chhotay bhaaee ko meray paas lay aao taaki mujhay maaloom ho jaaay ki tum jaasoos naheen balki shareef log ho. phir main tum ko tumhaara bhaaee vaapas kar doonga aur tum is mulk men aazaadee say tijaarat kar sakogay’.”

³⁵unhon nay apnee boriyon say anaaj nikaal diya to dekha ki har ek kee boree men us kay paison kee thailee rakhee huee hai. yah paisay dekh kar vah khud aur un ka baap dar gaay. ³⁶un kay baap nay un say kaha, “tum nay mujhay apnay bachchon say maheroom kar diya hai. yoosuf naheen raha, shamaaoon bhee naheen raha aur ab tum binyameen ko bhee mujh say chheenna chaahatay ho. sab kuchh meray khilaaf hai.” ³⁷phir roobin bol utha, “agar main usay salaamatee say aap kay paas vaapas na pahunchaaoon to aap meray do beton ko saza-ay-maut day saktay hain. usay meray sapurd karen to main usay vaapas lay aaoonga.” ³⁸lekin yaaqoob nay kaha, “mera beta tumhaaray saath jaanay ka naheen. kyoonki us ka bhaaee mar gaya hai aur vah akela hee rah gaya hai. agar us ko raastay men jaanee nuqsaan pahunchay to tum mujh boodhay ko gham kay maaray paataal men pahunchaaogay.”