Paidaaish 41

baadshaah kay khwaab

¹do saal guzar gaay ki ek raat baadshaah nay khwaab dekha. vah darya-ay-neel kay kinaaray khada tha. ²achaanak darya men say saat khoobsoorat aur motee gaaen nikal kar sarkandon men charnay lageen. ³un kay baad saat aur gaaen nikal aaeen. lekin vah badsoorat aur dublee-patlee theen. vah darya kay kinaaray doosree gaaiyon kay paas khadee ho kar ⁴pahelee saat khoobsoorat aur motee motee gaaiyon ko kha gaeen. is kay baad misr ka baadshaah jaag utha. ⁵phir vah dubaara so gaya. is dafa us nay ek aur khwaab dekha. anaaj kay ek pauday par saat motee motee aur achchhee achchhee baalen lagee theen. ⁶phir saat aur baalen phoot nikleen jo dublee-patlee aur mashriqee hava say jhulsee huee theen. ⁷anaaj kee saat dublee-patlee baalon nay saat motee aur khoobsoorat baalon ko nigal liya. phir firaaun jaag utha to maaloom hua ki main nay khwaab hee dekha hai.

⁸subah huee to vah pareshaan tha, is liyay us nay misr kay tamaam jaadoogaron aur aalimon ko bulaaya. us nay unhen apnay khwaab sunaaay, lekin koee bhee un kee taabeer na kar saka.

⁹phir sardaar saaqee nay firaaun say kaha, “aaj mujhay apnee khataaen yaad aatee hain. ¹⁰ek din firaaun apnay khaadimon say naaraaz huay. huzoor nay mujhay aur bekaree kay inchaarj ko qaidkhaanay men dalva diya jis par shaahee muhaafizon ka kaptaan muqarrar tha. ¹¹ek hee raat men ham donon nay mukhtalif khwaab dekhay jin ka matlab farq farq tha. ¹²vahaan jel men ek ibraanee naujavaan tha. vah muhaafizon kay kaptaan ka ghulaam tha. ham nay usay apnay khwaab sunaaay to us nay hamen un ka matlab bata diya. ¹³aur jo kuchh bhee us nay bataaya sab kuchh vaisa hee hua. mujhay apnee zimmaadaaree vaapas mil gaee jabki bekaree kay inchaarj ko saza-ay-maut day kar darakht say latka diya gaya.”

¹⁴yah sun kar firaaun nay yoosuf ko bulaaya, aur usay jaldee say qaidkhaanay say laaya gaya. us nay shev karva kar apnay kapday badlay aur seedhay baadshaah kay huzoor pahuncha.

¹⁵baadshaah nay kaha, “main nay khwaab dekha hai, aur yahaan koee naheen jo us kee taabeer kar sakay. lekin suna hai ki too khwaab ko sun kar us ka matlab bata sakta hai.” ¹⁶yoosuf nay javaab diya, “yah meray ikhtiyaar men naheen hai. lekin allaah hee baadshaah ko salaamatee ka paighaam dega.”

¹⁷firaaun nay yoosuf ko apnay khwaab sunaaay, “main khwaab men darya-ay-neel kay kinaaray khada tha. ¹⁸achaanak darya men say saat motee motee aur khoobsoorat gaaen nikal kar sarkandon men charnay lageen. ¹⁹is kay baad saat aur gaaen nikleen. vah nihaayat badsoorat aur dublee-patlee theen. main nay itnee badsoorat gaaen misr men kaheen bhee naheen dekheen. ²⁰dublee aur badsoorat gaaen pahelee motee gaaiyon ko kha gaeen. ²¹aur nigalnay kay baad bhee maaloom naheen hota tha ki unhon nay motee gaaiyon ko khaaya hai. vah pahelay kee tarah badsoorat hee theen. is kay baad main jaag utha. ²²phir main nay ek aur khwaab dekha. saat motee aur achchhee baalen ek hee pauday par lagee theen. ²³is kay baad saat aur baalen nikleen jo kharaab, dublee-patlee aur mashriqee hava say jhulsee huee theen. ²⁴saat dublee-patlee baalen saat achchhee baalon ko nigal gaeen. main nay yah sab kuchh apnay jaadoogaron ko bataaya, lekin vah is kee taabeer na kar sakay.”

²⁵yoosuf nay baadshaah say kaha, “donon khwaabon ka ek hee matlab hai. in say allaah nay huzoor par zaahir kiya hai ki vah kya kuchh karnay ko hai. ²⁶saat achchhee gaaiyon say muraad saat saal hain. isee tarah saat achchhee baalon say muraad bhee saat saal hain. donon khwaab ek hee baat bayaan kartay hain. ²⁷jo saat dublee aur badsoorat gaaen baad men niklen un say muraad saat aur saal hain. yahee saat dublee-patlee aur mashriqee hava say jhulsee huee baalon ka matlab bhee hai. vah ek hee baat bayaan kartee hain ki saat saal tak kaal padega. ²⁸yah vahee baat hai jo main nay huzoor say kahee ki allaah nay huzoor par zaahir kiya hai ki vah kya karega. ²⁹saat saal aaengay jin kay dauraan misr kay pooray mulk men kasrat say paidaavaar hogee. ³⁰us kay baad saat saal kaal padega. kaal itna shadeed hoga ki log bhool jaaengay ki pahelay itnee kasrat thee. kyoonki kaal mulk ko tabaah kar dega. ³¹kaal kee shiddat kay baais achchhay saalon kee kasrat yaad hee naheen rahegee. ³²huzoor ko is liyay ek hee paighaam do mukhtalif khwaabon kee soorat men mila ki allaah is ka pakka iraada rakhta hai, aur vah jald hee is par amal karega. ³³ab baadshaah kisee samajhdaar aur daanishmand aadmee ko mulk-ay-misr ka intizaam saumpen. ³⁴is kay ilaava vah aisay aadmee muqarrar karen jo saat achchhay saalon kay dauraan har fasal ka paanchvaan hissa len. ³⁵vah un achchhay saalon kay dauraan khuraak jama karen. baadshaah unhen ikhtiyaar den ki vah shaheron men godaam bana kar anaaj ko mahfooz kar len. ³⁶yah khuraak kaal kay un saat saalon kay liyay makhsoos kee jaaay jo misr men aanay vaalay hain. yoon mulk tabaah naheen hoga.”

yoosuf ko misr par haakim muqarrar kiya jaata hai

³⁷yah mansooba baadshaah aur us kay afsaraan ko achchha laga. ³⁸us nay un say kaha, “hamen is kaam kay liyay yoosuf say ziyaada laaiq aadmee naheen milega. us men allaah kee rooh hai.” ³⁹baadshaah nay yoosuf say kaha, “allaah nay yah sab kuchh tujh par zaahir kiya hai, is liyay koee bhee tujh say ziyaada samajhdaar aur daanishmand naheen hai. ⁴⁰main tujhay apnay mahel par muqarrar karta hoon. meree tamaam r’aaya teray taabay rahegee. tera ikhtiyaar sirf meray ikhtiyaar say kam hoga. ⁴¹ab main tujhay pooray mulk-ay-misr par haakim muqarrar karta hoon.”

⁴²baadshaah nay apnee unglee say vah angoothee utaaree jis say muhar lagaata tha aur usay yoosuf kee unglee men pahena diya. us nay usay kataan ka baareek libaas pahenaaya aur us kay galay men sonay ka galooband pahena diya. ⁴³phir us nay usay apnay doosray rath men savaar kiya aur log us kay aagay aagay pukaartay rahay, “ghutnay teko! ghutnay teko!”

yoon yoosuf pooray misr ka haakim bana. ⁴⁴firaaun nay us say kaha, “main to baadshaah hoon, lekin teree ijaazat kay baghair pooray mulk men koee bhee apna haath ya paaon naheen hilaaega.” ^45-46 us nay yoosuf ka misree naam saafnat-faaneh rakha aur on kay pujaaree foteefira kee betee aasnat kay saath us kee shaadee karaaee.

yoosuf 30 saal ka tha jab vah misr kay baadshaah firaaun kee khidmat karnay laga. us nay firaaun kay huzoor say nikal kar misr ka daura kiya.

⁴⁷saat achchhay saalon kay dauraan mulk men nihaayat achchhee faslen ugeen. ⁴⁸yoosuf nay tamaam khuraak jama karkay shaheron men mahfooz kar lee. har shaher men us nay ird-gird kay kheton kee paidaavaar mahfooz rakhee. ⁴⁹jamaashuda anaaj samundar kee ret kee maanind bakasrat tha. itna anaaj tha ki yoosuf nay aakhirkaar us kee paimaaish karna chhod diya.

⁵⁰kaal say pahelay yoosuf aur aasnat kay do betay paida huay. ⁵¹us nay pahelay ka naam manassee yaanee ‘jo bhula deta hai’ rakha. kyoonki us nay kaha, “allaah nay meree museebat aur meray baap ka gharaana meree yaadadaasht say nikaal diya hai.” ⁵²doosray ka naam us nay ifraaeem yaanee ‘dugna phaldaar’ rakha. kyoonki us nay kaha, “allaah nay mujhay meree museebat kay mulk men phalnay phoolnay diya hai.”

⁵³saat achchhay saal jin men kasrat kee faslen ugeen guzar gaay. ⁵⁴phir kaal kay saat saal shuroo huay jis tarah yoosuf nay kaha tha. tamaam deegar mamaalik men bhee kaal pad gaya, lekin misr men vaafir khuraak paaee jaatee thee. ⁵⁵jab kaal nay tamaam misr men zor pakda to log cheekh kar khaanay kay liyay baadshaah say minnat karnay lagay. tab firaaun nay un say kaha, “yoosuf kay paas jaao. jo kuchh vah tumhen bataaega vahee karo.” ⁵⁶jab kaal pooree duniya men phail gaya to yoosuf nay anaaj kay godaam khol kar misriyon ko anaaj bech diya. kyoonki kaal kay baais mulk kay haalaat bahut kharaab ho gaay thay. ⁵⁷tamaam mamaalik say bhee log anaaj khareednay kay liyay yoosuf kay paas aaay, kyoonki pooree duniya sakht kaal kee girift men thee.