Paidaaish 40
qaidiyon kay khwaab
1kuchh der kay baad yoon hua ki misr kay baadshaah kay sardaar saaqee aur bekaree kay inchaarj nay apnay maalik ka gunaah kiya. 2firaaun ko donon afsaron par ghussa a gaya. 3us nay unhen us qaidkhaanay men daal diya jo shaahee muhaafizon kay kaptaan kay sapurd tha aur jis men yoosuf tha. 4muhaafizon kay kaptaan nay unhen yoosuf kay havaalay kiya taaki vah un kee khidmat karay. vahaan vah kaafee der tak rahay.
5ek raat baadshaah kay sardaar saaqee aur bekaree kay inchaarj nay khwaab dekha. donon ka khwaab farq farq tha, aur un ka matlab bhee farq farq tha. 6jab yoosuf subah kay vaqt un kay paas aaya to vah dabay huay nazar aaay. 7us nay un say poochha, “aaj aap kyoon itnay pareshaan hain?” 8unhon nay javaab diya, “ham donon nay khwaab dekha hai, aur koee naheen jo hamen un ka matlab bataaay.” yoosuf nay kaha, “khwaabon kee taabeer to allaah ka kaam hai. zara mujhay apnay khwaab to sunaaen.”
9sardaar saaqee nay shuroo kiya, “main nay khwaab men apnay saamnay angoor kee bel dekhee. 10us kee teen shaakhen theen. us kay pattay lagay, komplen phoot nikleen aur angoor pak gaay. 11meray haath men baadshaah ka piyaala tha, aur main nay angooron ko tod kar yoon bheench diya ki un ka ras baadshaah kay piyaalay men a gaya. phir main nay piyaala baadshaah ko pesh kiya.”
12yoosuf nay kaha, “teen shaakhon say muraad teen din hain. 13teen din kay baad firaaun aap ko bahaal kar lega. aap ko pahelee zimmaadaaree vaapas mil jaaegee. aap pahelay kee tarah sardaar saaqee kee haisiyat say baadshaah ka piyaala sambhaalengay. 14lekin jab aap bahaal ho jaaen to mera khayaal karen. meharbaanee karkay baadshaah kay saamnay mera zikr karen taaki main yahaan say riha ho jaaoon. 15kyoonki mujhay ibraaniyon kay mulk say aghva karkay yahaan laaya gaya hai, aur yahaan bhee mujh say koee aisee ghaltee naheen huee ki mujhay is gadhay men phainka jaata.”
16jab shaahee bekaree kay inchaarj nay dekha ki sardaar saaqee kay khwaab ka achchha matlab nikla to us nay yoosuf say kaha, “mera khwaab bhee sunen. main nay sar par teen tokriyaan utha rakhee theen jo bekaree kee cheezon say bharee huee theen. 17sab say oopar vaalee tokree men vah tamaam cheezen theen jo baadshaah kee mez kay liyay banaaee jaatee hain. lekin parinday a kar unhen kha rahay thay.”
18yoosuf nay kaha, “teen tokriyon say muraad teen din hain. 19teen din kay baad hee firaaun aap ko qaidkhaanay say nikaal kar darakht say latka dega. parinday aap kee laash ko kha jaaengay.”
20teen din kay baad baadshaah kee saalagirah thee. us nay apnay tamaam afsaron kee ziyaafat kee. is mauqay par us nay sardaar saaqee aur bekaree kay inchaarj ko jel say nikaal kar apnay huzoor laanay ka hukm diya. 21sardaar saaqee ko pahelay vaalee zimmaadaaree saump dee gaee, 22lekin bekaree kay inchaarj ko saza-ay-maut day kar darakht say latka diya gaya. sab kuchh vaisa hee hua jaisa yoosuf nay kaha tha.
23lekin sardaar saaqee nay yoosuf ka khayaal na kiya balki usay bhool hee gaya.