Paidaaish 39

yoosuf aur footeefaar kee beevee

¹ismaaeeliyon nay yoosuf ko misr lay ja kar bech diya tha. misr kay baadshaah kay ek aala afsar banaam footeefaar nay usay khareed liya. vah shaahee muhaafizon ka kaptaan tha. ²rabb yoosuf kay saath tha. jo bhee kaam vah karta us men kaamyaab raheta. vah apnay misree maalik kay ghar men raheta thaa ³jis nay dekha ki rabb yoosuf kay saath hai aur usay har kaam men kaamyaabee deta hai. ⁴chunaanchay yoosuf ko maalik kee khaas meharbaanee haasil huee, aur footeefaar nay usay apna zaatee naukar bana liya. us nay usay apnay gharaanay kay intizaam par muqarrar kiya aur apnee pooree milkiyat us kay sapurd kar dee. ⁵jis vaqt say footeefaar nay apnay gharaanay ka intizaam aur pooree milkiyat yoosuf kay sapurd kee us vaqt say rabb nay footeefaar ko yoosuf kay sabab say barkat dee. us kee barkat footeefaar kee har cheez par thee, khwaah ghar men thee ya khet men. ⁶footeefaar nay apnee har cheez yoosuf kay haath men chhod dee. aur choonki yoosuf sab kuchh achchhee tarah chalaata tha is liyay footeefaar ko khaana khaanay kay siva kisee bhee muaamalay kee fikr naheen thee.

yoosuf nihaayat khoobsoorat aadmee tha. ⁷kuchh der kay baad us kay maalik kee beevee kee aankh us par lagee. us nay us say kaha, “meray saath hambistar ho!” ⁸yoosuf inkaar karkay kahenay laga, “meray maalik ko meray sabab say kisee muaamalay kee fikr naheen hai. unhon nay sab kuchh meray sapurd kar diya hai. ⁹ghar kay intizaam par un ka ikhtiyaar meray ikhtiyaar say ziyaada naheen hai. aap kay siva unhon nay koee bhee cheez mujh say baaz naheen rakhee. to phir main kis tarah itna ghalat kaam karoon? main kis tarah allaah ka gunaah karoon?”

¹⁰maalik kee beevee roz-ba-roz yoosuf kay peechhay padee rahee ki meray saath hambistar ho. lekin vah hamesha inkaar karta raha.

¹¹ek din vah kaam karnay kay liyay ghar men gaya. ghar men aur koee naukar naheen tha. ¹²footeefaar kee beevee nay yoosuf ka libaas pakad kar kaha, “meray saath hambistar ho!” yoosuf bhaag kar baahar chala gaya lekin us ka libaas peechhay aurat kay haath men hee rah gaya. ¹³jab maalik kee beevee nay dekha ki vah apna libaas chhod kar bhaag gaya hai ¹⁴to us nay ghar kay naukron ko bula kar kaha, “yah dekho! meray maalik is ibraanee ko hamaaray paas lay aaay hain taaki vah hamen zaleel karay. vah meree ismatdaree karnay kay liyay meray kamray men a gaya, lekin main oonchee aavaaz say cheekhnay lagee. ¹⁵jab main madad kay liyay oonchee aavaaz say cheekhnay lagee to vah apna libaas chhod kar bhaag gaya.” ¹⁶us nay maalik kay aanay tak yoosuf ka libaas apnay paas rakha. ¹⁷jab vah ghar vaapas aaya to us nay usay yahee kahaanee sunaaee, “yah ibraanee ghulaam jo aap lay aaay hain meree tazleel kay liyay meray paas aaya. ¹⁸lekin jab main madad kay liyay cheekhnay lagee to vah apna libaas chhod kar bhaag gaya.”

yoosuf qaidkhaanay men

¹⁹yah sun kar footeefaar baday ghussay men a gaya. ²⁰us nay yoosuf ko giriftaar karkay us jel men daal diya jahaan baadshaah kay qaidee rakhay jaatay thay. vaheen vah raha. ²¹lekin rabb yoosuf kay saath tha. us nay us par meharbaanee kee aur usay qaidkhaanay kay daaroghay kee nazar men maqbool kiya. ²²yoosuf yahaan tak maqbool hua ki daaroghay nay tamaam qaidiyon ko us kay sapurd karkay usay poora intizaam chalaanay kee zimmaadaaree dee. ²³daaroghay ko kisee bhee muaamalay kee jisay us nay yoosuf kay sapurd kiya tha fikr na rahee, kyoonki rabb yoosuf kay saath tha aur usay har kaam men kaamyaabee bakhshee.