Paidaaish 38

yahoodaah aur tamar

¹un dinon men yahoodaah apnay bhaaiyon ko chhod kar ek aadmee kay paas rahenay laga jis ka naam heera tha aur jo adullaam shaher say tha. ²vahaan yahoodaah kee mulaaqaat ek kan’aanee aurat say huee jis kay baap ka naam sooa tha. us nay us say shaadee kee. ³beta paida hua jis ka naam yahoodaah nay er rakha. ⁴ek aur beta paida hua jis ka naam beevee nay onaan rakha. ⁵us kay teesra beta bhee paida hua. us nay us ka naam sela rakha. yahoodaah qazeeb men tha jab vah paida hua.

⁶yahoodaah nay apnay baday betay er kee shaadee ek ladkee say karaaee jis ka naam tamar tha. ⁷rabb kay nazdeek er shareer tha, is liyay us nay usay halaak kar diya. ⁸is par yahoodaah nay er kay chhotay bhaaee onaan say kaha, “apnay baday bhaaee kee beva kay paas jaao aur us say shaadee karo taaki tumhaaray bhaaee kee nasal qaaim rahay.” ⁹onaan nay aisa kiya, lekin vah jaanta tha ki jo bhee bachchay paida hongay vah qaanoon kay mutaabiq meray baday bhaaee kay hongay. is liyay jab bhee vah tamar say hambistar hota to nutfa ko zameen par gira deta, kyoonki vah naheen chaahata tha ki meree maarifat meray bhaaee kay bachchay paida hon. ¹⁰yah baat rabb ko buree lagee, aur us nay usay bhee saza-ay-maut dee. ¹¹tab yahoodaah nay apnee bahoo tamar say kaha, “apnay baap kay ghar vaapas chalee jaao aur us vaqt tak beva raho jab tak mera beta sela bada na ho jaaay.” us nay yah is liyay kaha ki usay dar tha ki kaheen sela bhee apnay bhaaiyon kee tarah mar na jaaay chunaanchay tamar apnay maikay chalee gaee.

¹²kaafee dinon kay baad yahoodaah kee beevee jo sooa kee betee thee mar gaee. maatam ka vaqt guzar gaya to yahoodaah apnay adullaamee dost heera kay saath timnat gaya jahaan yahoodaah kee bhedon kee pashm katree ja rahee thee. ¹³tamar ko bataaya gaya, “aap ka susar apnee bhedon kee pashm katarnay kay liyay timnat ja raha hai.” ¹⁴yah sun kar tamar nay beva kay kapday utaar kar aam kapday pahen liyay. phir vah apna munh chaadar say lapet kar aineem shaher kay darvaazay par baith gaee jo timnat kay raastay men tha. tamar nay yah harkat is liyay kee ki yahoodaah ka beta sela ab baaligh ho chuka tha to bhee us kee us kay saath shaadee naheen kee gaee thee.

¹⁵jab yahoodaah vahaan say guzra to us nay usay dekh kar socha ki yah kasbee hai, kyoonki us nay apna munh chhupaaya hua tha. ¹⁶vah raastay say hat kar us kay paas gaya aur kaha, “zara mujhay apnay haan aanay den.” (us nay naheen pahechaana ki yah meree bahoo hai). tamar nay kaha, “aap mujhay kya dengay?” ¹⁷us nay javaab diya, “main aap ko bakree ka bachcha bhej doonga.” tamar nay kaha, “theek hai, lekin usay bhejnay tak mujhay zamaanat den.” ¹⁸us nay poochha, “main aap ko kya doon?” tamar nay kaha, “apnee muhar aur usay galay men latkaanay kee doree. vah laathee bhee den jo aap pakday huay hain.” chunaanchay yahoodaah usay yah cheezen day kar us kay saath hambistar hua. nateejay men tamar ummeed say huee. ¹⁹phir tamar uth kar apnay ghar vaapas chalee gaee. us nay apnee chaadar utaar kar dubaara beva kay kapday pahen liyay.

²⁰yahoodaah nay apnay dost heera adullaamee kay haath bakree ka bachcha bhej diya taaki vah cheezen vaapas mil jaaen jo us nay zamaanat kay taur par dee theen. lekin heera ko pata na chala ki aurat kahaan hai. ²¹us nay aineem kay baashindon say poochha, “vah kasbee kahaan hai jo yahaan sadak par baithee thee?” unhon nay javaab diya, “yahaan aisee koee kasbee naheen thee.”

²²us nay yahoodaah kay paas vaapas ja kar kaha, “vah mujhay naheen milee balki vahaan kay rahenay vaalon nay kaha ki yahaan koee aisee kasbee thee naheen.” ²³yahoodaah nay kaha, “phir vah zamaanat kee cheezen apnay paas hee rakhay. usay chhod do varna log hamaara mazaaq udaaengay. ham nay to pooree koshish kee ki usay bakree ka bachcha mil jaaay, lekin aap ko khoj lagaanay kay baavujood pata na chala ki vah kahaan hai.”

²⁴teen maah kay baad yahoodaah ko ittila dee gaee, “aap kee bahoo tamar nay zina kiya hai, aur ab vah haamila hai.” yahoodaah nay hukm diya, “usay baahar la kar jala do.” ²⁵tamar ko jalaanay kay liyay baahar laaya gaya to us nay apnay susar ko khabar bhej dee, “yah cheezen dekhen. yah us aadmee kee hain jis kee maarifat main ummeed say hoon. pata karen ki yah muhar, us kee doree aur yah laathee kis kee hain.” ²⁶yahoodaah nay unhen pahechaan liya. us nay kaha, “main naheen balki yah aurat haq par hai, kyoonki main nay us kee apnay betay sela say shaadee naheen karaaee.” lekin baad men yahoodaah kabhee bhee tamar say hambistar na hua.

²⁷jab janm denay ka vaqt aaya to maaloom hua ki judvaan bachchay hain. ²⁸ek bachchay ka haath nikla to daaee nay usay pakad kar us men surkh dhaaga baandh diya aur kaha, “yah pahelay paida hua.” ²⁹lekin us nay apna haath vaapas khainch liya, aur us ka bhaaee pahelay paida hua. yah dekh kar daaee bol uthee, “too kis tarah phoot nikla hai!” us nay us ka naam faaras yaanee phoot rakha. ³⁰phir us ka bhaaee paida hua jis kay haath men surkh dhaaga bandha hua tha. us ka naam zaarah yaanee chamak rakha gaya.