Paidaaish 37
yoosuf kay khwaab
1yaaqoob mulk-ay-kan’aan men raheta tha jahaan pahelay us ka baap bhee pardesee tha. 2yah yaaqoob kay khaandaan ka bayaan hai.
us vaqt yaaqoob ka beta yoosuf 17 saal ka tha. vah apnay bhaaiyon yaanee bilhaah aur zilfa kay beton kay saath bhed-bakriyon kee dekh-bhaal karta tha. yoosuf apnay baap ko apnay bhaaiyon kee buree harkaton kee ittila diya karta tha.
3yaaqoob yoosuf ko apnay tamaam beton kee nisbat ziyaada piyaar karta tha. vajah yah thee ki vah tab paida hua jab baap boodha tha. is liyay yaaqoob nay us kay liyay ek khaas rangdaar libaas banvaaya. 4jab us kay bhaaiyon nay dekha ki hamaara baap yoosuf ko ham say ziyaada piyaar karta hai to vah us say nafrat karnay lagay aur adab say us say baat naheen kartay thay.
5ek raat yoosuf nay khwaab dekha. jab us nay apnay bhaaiyon ko khwaab sunaaya to vah us say aur bhee nafrat karnay lagay. 6us nay kaha, “suno, main nay khwaab dekha. 7ham sab khet men poolay baandh rahay thay ki mera poola khada ho gaya. aap kay poolay meray poolay kay ird-gird jama ho kar us kay saamnay jhuk gaay.” 8us kay bhaaiyon nay kaha, “achchha, too baadshaah ban kar ham par hukoomat karega?” us kay khwaabon aur us kee baaton kay sabab say un kee us say nafrat mazeed badh gaee.
9kuchh der kay baad yoosuf nay ek aur khwaab dekha. us nay apnay bhaaiyon say kaha, “main nay ek aur khwaab dekha hai. us men sooraj, chaand aur gyaarah sitaaray meray saamnay jhuk gaay.” 10us nay yah khwaab apnay baap ko bhee sunaaya to us nay usay daanta. us nay kaha, “yah kaisa khwaab hai jo too nay dekha! yah kaisee baat hai ki main, teree maan aur teray bhaaee a kar teray saamnay zameen tak jhuk jaaen?” 11nateejay men us kay bhaaee us say bahut hasad karnay lagay. lekin us kay baap nay dil men yah baat mahfooz rakhee.
yoosuf ko becha jaata hai
12ek din jab yoosuf kay bhaaee apnay baap kay revad charaanay kay liyay sikam tak pahunch gaay the 13to yaaqoob nay yoosuf say kaha, “teray bhaaee sikam men revdon ko chara rahay hain. a, main tujhay un kay paas bhej deta hoon.” yoosuf nay javaab diya, “theek hai.” 14yaaqoob nay kaha, “ja kar maaloom kar ki teray bhaaee aur un kay saath kay revad khairiyat say hain ki naheen. phir vaapas a kar mujhay bata dena.” chunaanchay us kay baap nay usay vaadee-ay-habroon say bhej diya, aur yoosuf sikam pahunch gaya.
15vahaan vah idhar udhar phirta raha. aakhirkaar ek aadmee us say mila aur poochha, “aap kya dhoond rahay hain?” 16yoosuf nay javaab diya, “main apnay bhaaiyon ko talaash kar raha hoon. mujhay bataaen ki vah apnay jaanvaron ko kahaan chara rahay hain.” 17aadmee nay kaha, “vah yahaan say chalay gaay hain. main nay unhen yah kahetay suna ki aao, ham dootain jaaen.” yah sun kar yoosuf apnay bhaaiyon kay peechhay dootain chala gaya. vahaan usay vah mil gaay.
18jab yoosuf abhee door say nazar aaya to us kay bhaaiyon nay us kay pahunchnay say pahelay usay qatl karnay ka mansooba banaaya. 19unhon nay kaha, “dekho, khwaab dekhnay vaala a raha hai. 20aao, ham usay maar daalen aur us kee laash kisee gadhay men phaink den. ham kahengay ki kisee vaheshee jaanvar nay usay phaad khaaya hai. phir pata chalega ki us kay khwaabon kee kya haqeeqat hai.”
21jab roobin nay un kee baaten suneen to us nay yoosuf ko bachaanay kee koshish kee. us nay kaha, “naheen, ham usay qatl na karen. 22us ka khoon na karna. beshak usay is gadhay men phaink den jo registaan men hai, lekin usay haath na lagaaen.” us nay yah is liyay kaha ki vah usay bacha kar baap kay paas vaapas pahunchaana chaahata tha.
23joon hee yoosuf apnay bhaaiyon kay paas pahuncha unhon nay us ka rangdaar libaas utaar kar 24yoosuf ko gadhay men phaink diya. gadha khaalee tha, us men paanee naheen tha. 25phir vah rotee khaanay kay liyay baith gaay. achaanak ismaaeeliyon ka ek qaafila nazar aaya. vah jiliaad say misr ja rahay thay, aur un kay oont qeemtee masaalon yaanee laadan, balsaan aur mur say laday huay thay. 26tab yahoodaah nay apnay bhaaiyon say kaha, “hamen kya faaida hai agar apnay bhaaee ko qatl karkay us kay khoon ko chhupa den? 27aao, ham usay in ismaaeeliyon kay haath farokht kar den. phir koee zaroorat naheen hogee ki ham usay haath lagaaen. aakhir vah hamaara bhaaee hai.”
us kay bhaaee raazee huay. 28chunaanchay jab midiyaanee taajir vahaan say guzray to bhaaiyon nay yoosuf ko khainch kar gadhay say nikaala aur chaandee kay 20 sikkon kay ivz bech daala. ismaaeelee usay lay kar misr chalay gaay.
29us vaqt roobin maujood naheen tha. jab vah gadhay kay paas vaapas aaya to yoosuf us men naheen tha. yah dekh kar us nay pareshaanee men apnay kapday phaad daalay. 30vah apnay bhaaiyon kay paas vaapas gaya aur kaha, “ladka naheen hai. ab main kis tarah abboo kay paas jaaoon?” 31tab unhon nay bakra zabah karkay yoosuf ka libaas us kay khoon men duboya, 32phir rangdaar libaas is khabar kay saath apnay baap ko bhijva diya ki “hamen yah mila hai. isay ghaur say dekhen. yah aap kay betay ka libaas to naheen?”
33yaaqoob nay usay pahechaan liya aur kaha, “beshak usee ka hai. kisee vaheshee jaanvar nay usay phaad khaaya hai. yaqeenan yoosuf ko phaad diya gaya hai.” 34yaaqoob nay gham kay maaray apnay kapday phaaday aur apnee kamar say taat odh kar badee der tak apnay betay kay liyay maatam karta raha. 35us kay tamaam betay-betiyaan usay tasallee denay aaay, lekin us nay tasallee paanay say inkaar kiya aur kaha, “main paataal men utartay huay bhee apnay betay kay liyay maatam karoonga.” is haalat men vah apnay betay kay liyay rota raha.
36itnay men midiyaanee misr pahunch kar yoosuf ko bech chukay thay. misr kay baadshaah firaaun kay ek aala afsar footeefaar nay usay khareed liya. footeefaar baadshaah kay muhaafizon par muqarrar tha.