Paidaaish 35
bait-el men yaaqoob par allaah kee barkat
1allaah nay yaaqoob say kaha, “uth, bait-el ja kar vahaan aabaad ho. vaheen allaah kay liyay jo tujh par zaahir hua jab too apnay bhaaee esau say bhaag raha tha qurbaangaah bana.” 2chunaanchay yaaqoob nay apnay ghar vaalon aur baaqee saaray saathiyon say kaha, “jo bhee ajnabee but aap kay paas hain unhen phaink den. apnay aap ko paak-saaf karkay apnay kapday badlen, 3kyoonki hamen yah jagah chhod kar bait-el jaana hai. vahaan main us khuda kay liyay qurbaangaah banaaoonga jis nay museebat kay vaqt meree dua sunee. jahaan bhee main gaya vahaan vah meray saath raha hai.” 4yah sun kar unhon nay yaaqoob ko tamaam but day diay jo un kay paas thay aur tamaam baaliyaan jo unhon nay taaveez kay taur par kaanon men pahen rakhee theen. us nay sab kuchh sikam kay qareeb baloot kay darakht kay neechay zameen men daba diya. 5phir vah ravaana huay. ird-gird kay shaheron par allaah kee taraf say itna shadeed khauf chha gaya ki unhon nay yaaqoob aur us kay beton ka taaqqub na kiya.
6chaltay chaltay yaaqoob apnay logon samet looz pahunch gaya jo mulk-ay-kan’aan men tha. aaj looz ka naam bait-el hai. 7yaaqoob nay vahaan qurbaangaah bana kar maqaam ka naam bait-el yaanee ‘allaah ka ghar’ rakha. kyoonki vahaan allaah nay apnay aap ko us par zaahir kiya tha jab vah apnay bhaaee say faraar ho raha tha.
8vahaan ribqa kee daaya dabora mar gaee. vah bait-el kay junoob men baloot kay darakht kay neechay dafan huee, is liyay us ka naam allon-bakoot yaanee ‘ronay ka baloot ka darakht’ rakha gaya.
9allaah yaaqoob par ek dafa aur zaahir hua aur usay barkat dee. yah masoputaamiya say vaapas aanay par doosree baar hua. 10allaah nay us say kaha, “ab say tera naam yaaqoob naheen balki israaeel hoga.” yoon us nay us ka naya naam israaeel rakha. 11allaah nay yah bhee us say kaha, “main allaah qaadir-ay-mutlaq hoon. phal phool aur taadaad men badhta ja. ek qaum naheen balki bahut see qaumen tujh say nikalengee. teree aulaad men baadshaah bhee shaamil hongay. 12main tujhay vahee mulk doonga jo ibraaheem aur ishaaq ko diya hai. aur teray baad usay teree aulaad ko doonga.”
13phir allaah vahaan say aasmaan par chala gaya. 14jahaan allaah yaaqoob say hamkalaam hua tha vahaan us nay patthar ka satoon khada kiya aur us par mai aur tel undel kar usay makhsoos kiya. 15us nay jagah ka naam bait-el rakha.
raakhil kee maut
16phir yaaqoob apnay ghar vaalon kay saath bait-el ko chhod kar ifraata kee taraf chal pada. raakhil ummeed say thee, aur raastay men bachchay kee paidaaish ka vaqt a gaya. bachcha badee mushkil say paida hua. 17jab dard-ay-zah urooj ko pahunch gaya to daaee nay us say kaha, “mat daro, kyoonki ek aur beta hai.” 18lekin vah dam todnay vaalee thee, aur martay martay us nay us ka naam bin-oonee yaanee ‘meree museebat ka beta’ rakha. lekin us kay baap nay us ka naam binyameen yaanee ‘dahenay haath ya khushqisamtee ka beta’ rakha. 19raakhil faut huee, aur vah ifraata kay raastay men dafan huee. aajkal ifraata ko bait-lahem kaha jaata hai. 20yaaqoob nay us kee qabr par patthar ka satoon khada kiya. vah aaj tak raakhil kee qabr kee nishaandihee karta hai.
21vahaan say yaaqoob nay apna safar jaaree rakha aur mijdal-idar kee parlee taraf apnay khaimay lagaaay. 22jab vah vahaan thaheray thay to roobin yaaqoob kee haram bilhaah say hambistar hua. yaaqoob ko maaloom ho gaya.
yaaqoob kay bete
yaaqoob kay baarah betay thay. 23liyaah kay betay yah thay : us ka sab say bada beta roobin, phir shamaaoon, laavee, yahoodaah, ishkaar aur zabooloon. 24raakhil kay do betay thay, yoosuf aur binyameen. 25raakhil kee laundee bilhaah kay do betay thay, daan aur naftaalee. 26liyaah kee laundee zilfa kay do betay thay, jad aur aashar. yaaqoob kay yah betay masoputaamiya men paida huay.
ishaaq kee maut
27phir yaaqoob apnay baap ishaaq kay paas pahunch gaya jo habroon kay qareeb mamray men ajnabee kee haisiyat say raheta tha (us vaqt habroon ka naam qiryat-arba tha). vahaan ishaaq aur us say pahelay ibraaheem raha kartay thay. 28-29 ishaaq 180 saal ka tha jab vah umrraseeda aur zindagee say aasooda ho kar apnay baapdaada say ja mila. us kay betay esau aur yaaqoob nay usay dafan kiya.