Paidaaish 33

yaaqoob esau say milta hai

¹phir esau un kee taraf aata hua nazar aaya. us kay saath 400 aadmee thay. unhen dekh kar yaaqoob nay bachchon ko baant kar liyaah, raakhil aur donon laundiyon kay havaalay kar diya. ²us nay donon laundiyon ko un kay bachchon samet aagay chalnay diya. phir liyaah us kay bachchon samet aur aakhir men raakhil aur yoosuf aaay. ³yaaqoob khud sab say aagay esau say milnay gaya. chaltay chaltay vah saat dafa zameen tak jhuka. ⁴lekin esau daud kar us say milnay aaya aur usay galay laga kar bosa diya. donon ro paday.

⁵phir esau nay aurton aur bachchon ko dekha. us nay poochha, “tumhaaray saath yah log kaun hain?” yaaqoob nay kaha, “yah aap kay khaadim kay bachchay hain jo allaah nay apnay karam say navaazay hain.”

⁶donon laundiyaan apnay bachchon samet a kar us kay saamnay jhuk gaeen. ⁷phir liyaah apnay bachchon kay saath aaee aur aakhir men yoosuf aur raakhil a kar jhuk gaay.

⁸esau nay poochha, “jis jaanvaron kay baday ghol say meree mulaaqaat huee us say kya muraad hai?” yaaqoob nay javaab diya, “yah tuhfa hai taaki aap ka khaadim aap kee nazar men maqbool ho.” ⁹lekin esau nay kaha, “meray bhaaee, meray paas bahut kuchh hai. yah apnay paas hee rakho.” ¹⁰yaaqoob nay kaha, “naheen jee, agar mujh par aap kay karam kee nazar hai to meray is tuhfay ko zaroor qabool farmaaen. kyoonki jab main nay aap ka chihara dekha to vah meray liyay allaah kay chiharay kee maanind tha, aap nay meray saath is qadar achchha sulook kiya hai. ¹¹meharbaanee karkay yah tuhfa qabool karen jo main aap kay liyay laaya hoon. kyoonki allaah nay mujh par apnay karam ka izhaar kiya hai, aur meray paas bahut kuchh hai.”

yaaqoob israar karta raha to aakhirkaar esau nay usay qabool kar liya. phir esau kahenay laga, ¹²“aao, ham ravaana ho jaaen. main tumhaaray aagay aagay chaloonga.” ¹³yaaqoob nay javaab diya, “meray maalik, aap jaantay hain ki meray bachchay naazuk hain. meray paas bhed-bakriyaan, gaay-bail aur un kay doodh peenay vaalay bachchay bhee hain. agar main unhen ek din kay liyay bhee hadd say ziyaada haankon to vah mar jaaengay. ¹⁴meray maalik, meharbaanee karkay meray aagay aagay jaaen. main aaraam say usee raftaar say aap kay peechhay peechhay chalta rahoonga jis raftaar say meray maveshee aur meray bachchay chal sakengay. yoon ham aahista chaltay huay aap kay paas saeer pahunchengay.” ¹⁵esau nay kaha, “kya main apnay aadmiyon men say kuchh aap kay paas chhod doon?” lekin yaaqoob nay kaha, “kya zaroorat hai? sab say ahem baat yah hai ki aap nay mujhay qabool kar liya hai.”

¹⁶us din esau saeer kay liyay aur ¹⁷yaaqoob sukkaat kay liyay ravaana hua. vahaan us nay apnay liyay makaan bana liya aur apnay maveshiyon kay liyay jhompadiyaan. is liyay us maqaam ka naam sukkaat yaanee jhompadiyaan pad gaya.

¹⁸phir yaaqoob chaltay chaltay salaamatee say sikam shaher pahuncha. yoon us ka masoputaamiya say mulk-ay-kan’aan tak ka safar ikhtitaam tak pahunch gaya. us nay apnay khaimay shaher kay saamnay lagaaay. ¹⁹us kay khaimay hamor kee aulaad kee zameen par lagay thay. us nay yah zameen chaandee kay 100 sikkon kay badlay khareed lee. ²⁰vahaan us nay qurbaangaah banaaee jis ka naam us nay ‘el khuda-ay- israaeel’ rakha.