Paidaaish 32
yaaqoob esau say milnay kay liyay tayyaar ho jaata hai
1yaaqoob nay bhee apna safar jaaree rakha. raastay men allaah kay farishtay us say milay. 2unhen dekh kar us nay kaha, “yah allaah kee lashkargaah hai.” us nay us maqaam ka naam mahenaaim yaanee ‘do lashkargaahen’ rakha.
3yaaqoob nay apnay bhaaee esau kay paas apnay aagay aagay qaasid bhejay. esau saeer yaanee adom kay mulk men aabaad tha. 4unhen esau ko bataana tha, “aap ka khaadim yaaqoob aap ko ittila deta hai ki main pardes men ja kar ab tak laaban ka mehamaan raha hoon. 5vahaan mujhay bail, gadhay, bhed-bakriyaan, ghulaam aur laundiyaan haasil huay hain. ab main apnay maalik ko ittila day raha hoon ki vaapas a gaya hoon aur aap kee nazar-ay-karam ka khwaahishmand hoon.”
6jab qaasid vaapas aaay to unhon nay kaha, “ham aap kay bhaaee esau kay paas gaay, aur vah 400 aadmee saath lay kar aap say milnay a raha hai.”
7yaaqoob ghabra kar bahut pareshaan hua. us nay apnay saath kay tamaam logon, bhed-bakriyon, gaay-bailon aur oonton ko do gurohon men taqseem kiya. 8khayaal yah tha ki agar esau a kar ek guroh par hamla karay to baaqee guroh shaayad bach jaae 9phir yaaqoob nay dua kee, “ai meray daada ibraaheem aur meray baap ishaaq kay khuda, meree dua sun! ai rabb, too nay khud mujhay bataaya, ‘apnay mulk aur rishtedaaron kay paas vaapas ja, aur main tujhay kaamyaabee doonga.’ 10main us tamaam meharbaanee aur vafaadaaree kay laaiq naheen jo too nay apnay khaadim ko dikhaaee hai. jab main nay laaban kay paas jaatay vaqt darya-ay-yardan ko paar kiya to meray paas sirf yah laathee thee, aur ab meray paas yah do guroh hain. 11mujhay apnay bhaaee esau say bacha, kyoonki mujhay dar hai ki vah mujh par hamla karkay baal-bachchon samet sab kuchh tabaah kar dega. 12too nay khud kaha tha, ‘main tujhay kaamyaabee doonga aur teree aulaad itnee badhaaoonga ki vah samundar kee ret kee maanind beshumaar hogee’.”
13yaaqoob nay vahaan raat guzaaree. phir us nay apnay maal men say esau kay liyay tuhfay chun liyay : 14200 bakriyaan, 20 bakray, 200 bheden, 20 mendhay, 1530 doodh denay vaalee oontaniyaan bachchon samet, 40 gaaen, 10 bail, 20 gadhiyaan aur 10 gadhay. 16us nay unhen mukhtalif revdon men taqseem karkay apnay mukhtalif naukron kay sapurd kiya aur un say kaha, “meray aagay aagay chalo lekin har revad kay darmiyaan faasila rakho.”
17jo naukar pahelay revad lay kar aagay nikla us say yaaqoob nay kaha, “mera bhaaee esau tum say milega aur poochhega, ‘tumhaara maalik kaun hai? tum kahaan ja rahay ho? tumhaaray saamnay kay jaanvar kis kay hain?’ 18javaab men tumhen kahena hai, ‘yah aap kay khaadim yaaqoob kay hain. yah tuhfa hain jo vah apnay maalik esau ko bhej rahay hain. yaaqoob hamaaray peechhay peechhay a rahay hain’.”
19yaaqoob nay yahee hukm har ek naukar ko diya jisay revad lay kar us kay aagay aagay jaana tha. us nay kaha, “jab tum esau say milogay to us say yahee kahena hai. 20tumhen yah bhee zaroor kahena hai, aap kay khaadim yaaqoob hamaaray peechhay a rahay hain.” kyoonki yaaqoob nay socha, main in tuhfon say us kay saath sulah karoonga. phir jab us say mulaaqaat hogee to shaayad vah mujhay qabool kar lay. 21yoon us nay yah tuhfay apnay aagay aagay bhej diay. lekin us nay khud khaimaagaah men raat guzaaree.
yaaqoob kee kushtee
22us raat vah utha aur apnee do beeviyon, do laundiyon aur gyaarah beton ko lay kar darya-ay-yabboq ko vahaan say paar kiya jahaan kam gaheraaee thee. 23phir us nay apna saara saamaan bhee vahaan bhej diya. 24lekin vah khud akela hee peechhay rah gaya.
us vaqt ek aadmee aaya aur pau phatnay tak us say kushtee ladta raha. 25jab us nay dekha ki main yaaqoob par ghaalib naheen a raha to us nay us kay koolhay ko chhua, aur us ka jod nikal gaya. 26aadmee nay kaha, “mujhay jaanay day, kyoonki pau phatnay vaalee hai.”
yaaqoob nay kaha, “pahelay mujhay barkat den, phir hee aap ko jaanay doonga.” 27aadmee nay poochha, “tera kya naam hai?” us nay javaab diya, “yaaqoob.” 28aadmee nay kaha, “ab say tera naam yaaqoob naheen balki israaeel yaanee ‘vah allaah say ladta hai’ hoga. kyoonki too allaah aur aadmiyon kay saath lad kar ghaalib aaya hai.”
29yaaqoob nay kaha, “mujhay apna naam bataaen.” us nay kaha, “too kyoon mera naam jaanna chaahata hai?” phir us nay yaaqoob ko barkat dee.
30yaaqoob nay kaha, “main nay allaah ko roo-ba-roo dekha to bhee bach gaya hoon.” is liyay us nay us maqaam ka naam faneeel rakha. 31yaaqoob vahaan say chala to sooraj tuloo ho raha tha. vah koolhay kay sabab say langadaata raha.
32yahee vajah hai ki aaj bhee israaeel kee aulaad koolhay kay jod par kee nas ko naheen khaatay, kyoonki yaaqoob kee isee nas ko chhua gaya tha.