Paidaaish 31
yaaqoob kee hijrat
1ek din yaaqoob ko pata chala ki laaban kay betay meray baaray men kah rahay hain, “yaaqoob nay hamaaray abboo say sab kuchh chheen liya hai. us nay yah tamaam daulat hamaaray baap kee milkiyat say haasil kee hai.” 2yaaqoob nay yah bhee dekha ki laaban ka meray saath ravayya pahelay kee nisbat bigad gaya hai. 3phir rabb nay us say kaha, “apnay baap kay mulk aur apnay rishtedaaron kay paas vaapas chala ja. main teray saath hoonga.”
4us vaqt yaaqoob khulay maidaan men apnay revdon kay paas tha. us nay vahaan say raakhil aur liyaah ko bula kar 5un say kaha, “main nay dekh liya hai ki aap kay baap ka meray saath ravayya pahelay kee nisbat bigad gaya hai. lekin meray baap ka khuda meray saath raha hai. 6aap donon jaantee hain ki main nay aap kay abboo kay liyay kitnee jaanfishaanee say kaam kiya hai. 7lekin vah mujhay fareb deta raha aur meree ujrat das baar badlee. taaham allaah nay usay mujhay nuqsaan pahunchaanay na diya. 8jab maamoon laaban kahetay thay, ‘jin jaanvaron kay jism par dhabbay hon vahee aap ko ujrat kay taur par milengay’ to tamaam bhed-bakriyon kay aisay bachchay paida huay jin kay jismon par dhabbay hee thay. jab unhon nay kaha, ‘jin jaanvaron kay jism par dhaariyaan hongee vahee aap ko ujrat kay taur par milengay’ to tamaam bhed-bakriyon kay aisay bachchay paida huay jin kay jismon par dhaariyaan hee theen. 9yoon allaah nay aap kay abboo kay maveshee chheen kar mujhay day diay hain. 10ab aisa hua ki haivaanon kee mastee kay mausam men main nay ek khwaab dekha. us men jo mendhay aur bakray bhed-bakriyon say milaap kar rahay thay un kay jism par baday aur chhotay dhabbay aur dhaariyaan theen. 11us khwaab men allaah kay farishtay nay mujh say baat kee, ‘yaaqoob!’ main nay kaha, ‘jee, main haazir hoon.’ 12farishtay nay kaha, ‘apnee nazar utha kar us par ghaur kar jo ho raha hai. vah tamaam mendhay aur bakray jo bhed-bakriyon say milaap kar rahay hain un kay jism par baday aur chhotay dhabbay aur dhaariyaan hain. main yah khud karva raha hoon, kyoonki main nay vah sab kuchh dekh liya hai jo laaban nay teray saath kiya hai. 13main vah khuda hoon jo bait-el men tujh par zaahir hua tha, us jagah jahaan too nay satoon par tel undel kar usay meray liyay makhsoos kiya aur meray huzoor qasam khaaee thee. ab uth aur ravaana ho kar apnay vatan vaapas chala ja’.”
14raakhil aur liyaah nay javaab men yaaqoob say kaha, “ab hamen apnay baap kee meeraas say kuchh milnay kee ummeed naheen rahee. 15us ka hamaaray saath ajnabee ka sa sulook hai. pahelay us nay hamen bech diya, aur ab us nay vah saaray paisay kha bhee liyay hain. 16chunaanchay jo bhee daulat allaah nay hamaaray baap say chheen lee hai vah hamaaree aur hamaaray bachchon kee hee hai. ab jo kuchh bhee allaah nay aap ko bataaya hai vah karen.”
17tab yaaqoob nay uth kar apnay baal-bachchon ko oonton par bithaayaa 18aur apnay tamaam maveshee aur masoputaamiya say haasil kiya hua tamaam saamaan lay kar mulk-ay-kan’aan men apnay baap kay haan jaanay kay liyay ravaana hua. 19us vaqt laaban apnee bhed-bakriyon kee pashm katarnay ko gaya hua tha. us kee ghairmaujoodgee men raakhil nay apnay baap kay but chura liyay.
20yaaqoob nay laaban ko fareb day kar usay ittila na dee ki main ja raha hoon 21balki apnee saaree milkiyat samet kar faraar hua. darya-ay-furaat ko paar karkay vah jiliaad kay pahaadee ilaaqay kee taraf safar karnay laga.
laaban yaaqoob ka taaqqub karta hai
22teen din guzar gaay. phir laaban ko bataaya gaya ki yaaqoob bhaag gaya hai. 23apnay rishtedaaron ko saath lay kar us nay us ka taaqqub kiya. saat din chaltay chaltay us nay yaaqoob ko a liya jab vah jiliaad kay pahaadee ilaaqay men pahunch gaya tha. 24lekin us raat allaah nay khwaab men laaban kay paas a kar us say kaha, “khabardaar! yaaqoob ko bura-bhala na kahena.”
25jab laaban us kay paas pahuncha to yaaqoob nay jiliaad kay pahaadee ilaaqay men apnay khaimay lagaaay huay thay. laaban nay bhee apnay rishtedaaron kay saath vaheen apnay khaimay lagaaay. 26us nay yaaqoob say kaha, “yah aap nay kya kiya hai? aap mujhay dhoka day kar meree betiyon ko kyoon jangee qaidiyon kee tarah haank laaay hain? 27aap kyoon mujhay fareb day kar khaamoshee say bhaag aaay hain? agar aap mujhay ittila detay to main aap ko khushee khushee daf aur sarod kay saath gaatay bajaatay rukhsat karta. 28aap nay mujhay apnay navaasay-navaasiyon aur betiyon ko bosa denay ka mauqa bhee na diya. aap kee yah harkat badee ahemaqaana thee. 29main aap ko bahut nuqsaan pahuncha sakta hoon. lekin pichhlee raat aap kay abboo kay khuda nay mujh say kaha, ‘khabardaar! yaaqoob ko bura-bhala na kahena.’ 30theek hai, aap is liyay chalay gaay ki apnay baap kay ghar vaapas jaanay kay baday aarzoomand thay. lekin yah aap nay kya kiya hai ki meray but chura laaay hain?”
31yaaqoob nay javaab diya, “mujhay dar tha ki aap apnee betiyon ko mujh say chheen lengay. 32lekin agar aap ko yahaan kisee kay paas apnay but mil jaaen to usay saza-ay-maut dee jaaay hamaaray rishtedaaron kee maujoodgee men maaloom karen ki meray paas aap kee koee cheez hai ki naheen. agar hai to usay lay len.” yaaqoob ko maaloom naheen tha ki raakhil nay buton ko churaaya hai.
33laaban yaaqoob kay khaimay men daakhil hua aur dhoondnay laga. vahaan say nikal kar vah liyaah kay khaimay men aur donon laundiyon kay khaimay men gaya. lekin us kay but kaheen nazar na aaay. aakhir men vah raakhil kay khaimay men daakhil hua. 34raakhil buton ko oonton kee ek kaathee kay neechay chhupa kar us par baith gaee thee. laaban tatol tatol kar pooray khaimay men say guzra lekin but na milay. 35raakhil nay apnay baap say kaha, “abboo, mujh say naaraaz na hona ki main aap kay saamnay khadee naheen ho saktee. main ayyaam-ay-maahavaaree kay sabab say uth naheen saktee.” laaban usay chhod kar dhoondta raha, lekin kuchh na mila.
36phir yaaqoob ko ghussa aaya aur vah laaban say jhagadnay laga. us nay poochha, “mujh say kya jurm sarzad hua hai? main nay kya gunaah kiya hai ki aap itnee tundee say meray taaqqub kay liyay niklay hain? 37aap nay tatol tatol kar meray saaray saamaan kee talaashee lee hai. to aap ka kya nikla hai? usay yahaan apnay aur meray rishtedaaron kay saamnay rakhen. phir vah faisla karen ki ham men say kaun haq par hai. 38main bees saal tak aap kay saath raha hoon. us dauraan aap kee bhed-bakriyaan bachchon say maheroom naheen raheen balki main nay aap ka ek mendha bhee naheen khaaya. 39jab bhee koee bhed ya bakree kisee janglee jaanvar nay phaad daalee to main usay aap kay paas na laaya balki mujhay khud us ka nuqsaan bharna pada. aap ka taqaaza tha ki main khud choree huay maal ka ivzaana doon, khwaah vah din kay vaqt choree hua ya raat ko. 40main din kee shadeed garmee kay baais pighal gaya aur raat kee shadeed sardee kay baais jam gaya. kaam itna sakht tha ki main neend say maheroom raha. 41pooray bees saal isee haalat men guzar gaay. chaudah saal main nay aap kee betiyon kay ivz kaam kiya aur chhah saal aap kee bhed-bakriyon kay liyay. us dauraan aap nay das baar meree tankhwaah badal dee. 42agar meray baap ishaaq ka khuda aur meray daada ibraaheem ka maabood [a] lafzee tarjuma : dahshat yaanee ishaaq ka vah khuda jis say insaan dahshat khaata hai. meray saath na hota to aap mujhay zaroor khaalee haath rukhsat kartay. lekin allaah nay meree museebat aur meree sakht mehanat-mashaqqat dekhee hai, is liyay us nay kal raat ko meray haq men faisla diya.”
yaaqoob aur laaban kay darmiyaan ahd
43tab laaban nay yaaqoob say kaha, “yah betiyaan to meree betiyaan hain, aur in kay bachchay meray bachchay hain. yah bhed-bakriyaan bhee meree hee hain. lekin ab main apnee betiyon aur un kay bachchon kay liyay kuchh naheen kar sakta. 44is liyay aao, ham ek doosray kay saath ahd baandhen. is kay liyay ham yahaan pattharon ka dher lagaaen jo ahd kee gavaahee deta rahay.”
45chunaanchay yaaqoob nay ek patthar lay kar usay satoon kay taur par khada kiya. 46us nay apnay rishtedaaron say kaha, “kuchh patthar jama karen.” unhon nay patthar jama karkay dher laga diya. phir unhon nay us dher kay paas baith kar khaana khaaya. 47laaban nay us ka naam yajr-shaahadootha rakha jabki yaaqoob nay jal-ed rakha. donon naamon ka matlab ‘gavaahee ka dher’ hai yaanee vah dher jo gavaahee deta hai. 48laaban nay kaha, “aaj ham donon kay darmiyaan yah dher ahd kee gavaahee deta hai.” is liyay us ka naam jal-ed rakha gaya. 49us ka ek aur naam misfaah yaanee ‘paheredaaron ka meenaar’ bhee rakha gaya. kyoonki laaban nay kaha, “rabb ham par pahera day jab ham ek doosray say alag ho jaaengay. 50meree betiyon say bura sulook na karna, na un kay ilaava kisee aur say shaadee karna. agar mujhay pata bhee na chalay lekin zaroor yaad rakhen ki allaah meray aur aap kay saamnay gavaah hai. 51yahaan yah dher hai jo main nay laga diya hai aur yahaan yah satoon bhee hai. 52yah dher aur satoon donon is kay gavaah hain ki na main yahaan say guzar kar aap ko nuqsaan pahunchaaoonga aur na aap yahaan say guzar kar mujhay nuqsaan pahunchaaengay. 53ibraaheem, nahoor aur un kay baap ka khuda ham donon kay darmiyaan faisla karay agar aisa koee muaamala ho.” javaab men yaaqoob nay ishaaq kay maabood kee qasam khaaee ki main yah ahd kabhee naheen todoonga. 54us nay pahaad par ek jaanvar qurbaanee kay taur par chadhaaya aur apnay rishtedaaron ko khaana khaanay kee daavat dee. unhon nay khaana kha kar vaheen pahaad par raat guzaaree.
55aglay din subah-saveray laaban nay apnay navaasay-navaasiyon aur betiyon ko bosa day kar unhen barkat dee. phir vah apnay ghar vaapas chala gaya.