Paidaaish 30
1lekin raakhil beaulaad hee rahee, is liyay vah apnee bahen say hasad karnay lagee. us nay yaaqoob say kaha, “mujhay bhee aulaad den varna main mar jaaoongee.” 2yaaqoob ko ghussa aaya. us nay kaha, “kya main allaah hoon jis nay tujhay aulaad say maheroom rakha hai?” 3raakhil nay kaha, “yahaan meree laundee bilhaah hai. us kay saath hambistar hon taaki vah meray liyay bachchay ko janm day aur main us kee maarifat maan ban jaaoon.”
4yoon us nay apnay shauhar ko bilhaah dee, aur vah us say hambistar hua. 5bilhaah haamila huee aur beta paida hua. 6raakhil nay kaha, “allaah nay meray haq men faisla diya hai. us nay meree dua sun kar mujhay beta day diya hai.” us nay us ka naam daan yaanee ‘kisee kay haq men faisla karnay vaala’ rakha.
7bilhaah dubaara haamila huee aur ek aur beta paida hua. 8raakhil nay kaha, “main nay apnee bahen say sakht kushtee ladee hai, lekin jeet gaee hoon.” us nay us ka naam naftaalee yaanee ‘kushtee men mujh say jeeta gaya’ rakha.
9jab liyaah nay dekha ki meray aur bachchay paida naheen ho rahay to us nay yaaqoob ko apnee laundee zilfa day dee taaki vah bhee us kee beevee ho. 10zilfa kay bhee ek beta paida hua. 11liyaah nay kaha, “main kitnee khushqismat hoon!” chunaanchay us nay us ka naam jad yaanee khushqisamtee rakha.
12phir zilfa kay doosra beta paida hua. 13liyaah nay kaha, “main kitnee mubaarak hoon. ab khavaateen mujhay mubaarak kahengee.” us nay us ka naam aashar yaanee mubaarak rakha.
14ek din anaaj kee fasal kee kataaee ho rahee thee ki roobin baahar nikal kar kheton men chala gaya. vahaan usay mardumagayaah [a] ek pauda jis kay baaray men khayaal kiya jaata tha ki usay kha kar baanjh aurat bhee bachchay ko janm degee. mil gaay. vah unhen apnee maan liyaah kay paas lay aaya. yah dekh kar raakhil nay liyaah say kaha, “mujhay zara apnay betay kay mardumagayaah men say kuchh day do.” 15liyaah nay javaab diya, “kya yahee kaafee naheen ki tum nay meray shauhar ko mujh say chheen liya hai? ab meray betay kay mardumagayaah ko bhee chheenna chaahatee ho.” raakhil nay kaha, “agar tum mujhay apnay betay kay mardumagayaah men say do to aaj raat yaaqoob kay saath so saktee ho.”
16shaam ko yaaqoob kheton say vaapas a raha tha ki liyaah aagay say us say milnay ko gaee aur kaha, “aaj raat aap ko meray saath sona hai, kyoonki main nay apnay betay kay mardumagayaah kay ivz aap ko ujrat par liya hai.” chunaanchay yaaqoob nay liyaah kay paas raat guzaaree.
17us vaqt allaah nay liyaah kee dua sunee aur vah haamila huee. us kay paanchvaan beta paida hua. 18liyaah nay kaha, “allaah nay mujhay is ka ajr diya hai ki main nay apnay shauhar ko apnee laundee dee.” us nay us ka naam ishkaar yaanee ajr rakha.
19is kay baad vah ek aur dafa haamila huee. us kay chhata beta paida hua. 20us nay kaha, “allaah nay mujhay ek achchha-khaasa tuhfa diya hai. ab mera khaavand meray saath rahega, kyoonki mujh say us kay chhah betay paida huay hain.” us nay us ka naam zabooloon yaanee rihaaish rakha.
21is kay baad betee paida huee. us nay us ka naam deena rakha.
22phir allaah nay raakhil ko bhee yaad kiya. us nay us kee dua sun kar usay aulaad bakhshee. 23vah haamila huee aur ek beta paida hua. us nay kaha, “mujhay beta ata karnay say allaah nay meree izzat bahaal kar dee hai. 24rabb mujhay ek aur beta day.” us nay us ka naam yoosuf yaanee ‘vah aur day’ rakha.
yaaqoob ka laaban kay saath saudaa
25yoosuf kee paidaaish kay baad yaaqoob nay laaban say kaha, “ab mujhay ijaazat den ki main apnay vatan aur ghar ko vaapas jaaoon. 26mujhay meray baal-bachchay den jin kay ivz main nay aap kee khidmat kee hai. phir main chala jaaoonga. aap to khud jaantay hain ki main nay kitnee mehanat kay saath aap kay liyay kaam kiya hai.”
27lekin laaban nay kaha, “mujh par meharbaanee karen aur yaheen rahen. mujhay ghaibdaanee say pata chala hai ki rabb nay mujhay aap kay sabab say barkat dee hai. 28apnee ujrat khud muqarrar karen to main vahee diya karoonga.”
29yaaqoob nay kaha, “aap jaantay hain ki main nay kis tarah aap kay liyay kaam kiya, ki meray vaseelay say aap kay maveshee kitnay badh gaay hain. 30jo thoda bahut meray aanay say pahelay aap kay paas tha vah ab bahut ziyaada badh gaya hai. rabb nay meray kaam say aap ko bahut barkat dee hai. ab vah vaqt a gaya hai ki main apnay ghar kay liyay kuchh karoon.”
31laaban nay kaha, “main aap ko kya doon?” yaaqoob nay kaha, “mujhay kuchh na den. main is shart par aap kee bhed-bakriyon kee dekh-bhaal jaaree rakhoonga ki 32aaj main aap kay revad men say guzar kar un tamaam bhedon ko alag kar loonga jin kay jism par chhotay ya baday dhabbay hon ya jo safed na hon. isee tarah main un tamaam bakriyon ko bhee alag kar loonga jin kay jism par chhotay ya baday dhabbay hon. yahee meree ujrat hogee. 33aainda jin bakriyon kay jism par chhotay ya baday dhabbay hongay ya jin bhedon ka rang safed naheen hoga vah mera ajr hongee. jab kabhee aap un ka muaaina karengay to aap maaloom kar sakengay ki main diyaanatdaar raha hoon. kyoonki meray jaanvaron kay rang say hee zaahir hoga ki main nay aap ka kuchh churaaya naheen hai.” 34laaban nay kaha, “theek hai. aisa hee ho jaisa aap nay kaha hai.”
35usee din laaban nay un bakron ko alag kar liya jin kay jism par dhaariyaan ya dhabbay thay aur un tamaam bakriyon ko jin kay jism par chhotay ya baday dhabbay thay. jis kay bhee jism par safed nishaan tha usay us nay alag kar liya. isee tarah us nay un tamaam bhedon ko bhee alag kar liya jo pooray taur par safed na thay. phir laaban nay unhen apnay beton kay sapurd kar diyaa 36jo un kay saath yaaqoob say itna door chalay gaay ki un kay darmiyaan teen din ka faasila tha. tab yaaqoob laaban kee baaqee bhed-bakriyon kee dekh-bhaal karta gaya.
37yaaqoob nay safeda, baadaam aur chanaar kee haree haree shaakhen lay kar un say kuchh chhilka yoon utaar diya ki us par safed dhaariyaan nazar aaeen. 38us nay unhen bhed-bakriyon kay saamnay un hauzon men gaad diya jahaan vah paanee peetay thay, kyoonki vahaan yah jaanvar mast ho kar milaap kartay thay. 39jab vah in shaakhon kay saamnay milaap kartay to jo bachchay paida hotay un kay jism par chhotay aur baday dhabbay aur dhaariyaan hotee theen. 40phir yaaqoob nay bhed kay bachchon ko alag karkay apnay revdon ko laaban kay un jaanvaron kay saamnay charnay diya jin kay jism par dhaariyaan theen aur jo safed na thay. yoon us nay apnay zaatee revdon ko alag kar liya aur unhen laaban kay revad kay saath charnay na diya.
41lekin us nay yah shaakhen sirf us vaqt hauzon men khadee keen jab taaqatvar jaanvar mast ho kar milaap kartay thay. 42kamzor jaanvaron kay saath us nay aisa na kiya. isee tarah laaban ko kamzor jaanvar aur yaaqoob ko taaqatvar jaanvar mil gaay. 43yoon yaaqoob bahut ameer ban gaya. us kay paas bahut say revad, ghulaam aur laundiyaan, oont aur gadhay thay.