Paidaaish 29

yaaqoob laaban kay ghar pahunchta hai

¹yaaqoob nay apna safar jaaree rakha aur chaltay chaltay mashriqee qaumon kay mulk men pahunch gaya. ²vahaan us nay khet men kuaan dekha jis kay ird-gird bhed-bakriyon kay teen revad jama thay. revdon ko kuen ka paanee pilaaya jaana tha, lekin us kay munh par bada patthar pada tha. ³vahaan paanee pilaanay ka yah tareeqa tha ki pahelay charvaahay tamaam revdon ka intizaar kartay aur phir patthar ko ludhka kar munh say hata detay thay. paanee pilaanay kay baad vah patthar ko dubaara munh par rakh detay thay.

⁴yaaqoob nay charvaahon say poochha, “meray bhaaiyo, aap kahaan kay hain?” unhon nay javaab diya, “haaraan kay.” ⁵us nay poochha, “kya aap nahoor kay potay laaban ko jaantay hain?” unhon nay kaha, “jee haan.” ⁶us nay poochha, “kya vah khairiyat say hai?” unhon nay kaha, “jee, vah khairiyat say hai. dekho, udhar us kee betee raakhil revad lay kar a rahee hai.” ⁷yaaqoob nay kaha, “abhee to shaam tak bahut vaqt baaqee hai. revdon ko jama karnay ka vaqt to naheen hai. aap kyoon unhen paanee pila kar dubaara charnay naheen detay?” ⁸unhon nay javaab diya, “pahelay zarooree hai ki tamaam revad yahaan pahunchen. tab hee patthar ko ludhka kar ek taraf hataaya jaaega aur ham revdon ko paanee pilaaengay.”

⁹yaaqoob abhee un say baat kar hee raha tha ki raakhil apnay baap ka revad lay kar a pahunchee, kyoonki bhed-bakriyon ko charaana us ka kaam tha. ¹⁰jab yaaqoob nay raakhil ko maamoon laaban kay revad kay saath aatay dekha to us nay kuen kay paas ja kar patthar ko ludhka kar munh say hata diya aur bhed-bakriyon ko paanee pilaaya. ¹¹phir us nay usay bosa diya aur khoob ronay laga. ¹²us nay kaha, “main aap kay abboo kee bahen ribqa ka beta hoon.” yah sun kar raakhil nay bhaag kar apnay abboo ko ittila dee.

¹³jab laaban nay suna ki mera bhaanja yaaqoob aaya hai to vah daud kar us say milnay gaya aur usay galay laga kar apnay ghar lay aaya. yaaqoob nay usay sab kuchh bata diya jo hua tha. ¹⁴laaban nay kaha, “aap vaaqaee meray rishtedaar hain.” yaaqoob nay vahaan ek poora maheena guzaara.

apnee beeviyon kay liyay yaaqoob kee mehanat-mashaqqat

¹⁵phir laaban yaaqoob say kahenay laga, “beshak aap meray rishtedaar hain, lekin aap ko meray liyay kaam karnay kay badlay men kuchh milna chaahiay. main aap ko kitnay paisay doon?” ¹⁶laaban kee do betiyaan theen. badee ka naam liyaah tha aur chhotee ka raakhil. ¹⁷liyaah kee aankhen chundhee theen jabki raakhil har tarah say khoobsoorat thee. ¹⁸yaaqoob ko raakhil say muhabbat thee, is liyay us nay kaha, “agar mujhay aap kee chhotee betee raakhil mil jaaay to aap kay liyay saat saal kaam karoonga.” ¹⁹laaban nay kaha, “kisee aur aadmee kee nisbat mujhay yah ziyaada pasand hai ki aap hee say us kee shaadee karaaoon.”

²⁰pas yaaqoob nay raakhil ko paanay kay liyay saat saal tak kaam kiya. lekin usay aisa laga jaisa do ek din hee guzray hon kyoonki vah raakhil ko shiddat say piyaar karta tha. ²¹is kay baad us nay laaban say kaha, “muddat pooree ho gaee hai. ab mujhay apnee betee say shaadee karnay den.” ²²laaban nay us maqaam kay tamaam logon ko daavat day kar shaadee kee ziyaafat kee. ²³lekin us raat vah raakhil kee bajaay liyaah ko yaaqoob kay paas lay aaya, aur yaaqoob usee say hambistar hua. ²⁴(laaban nay liyaah ko apnee laundee zilfa day dee thee taaki vah us kee khidmat karay.)

²⁵jab subah huee to yaaqoob nay dekha ki liyaah hee meray paas hai. us nay laaban kay paas ja kar kaha, “yah aap nay meray saath kya kiya hai? kya main nay raakhil kay liyay kaam naheen kiya? aap nay mujhay dhoka kyoon diya?” ²⁶laaban nay javaab diya, “yahaan dastoor naheen hai ki chhotee betee kee shaadee badee say pahelay kar dee jaae ²⁷ek haftay kay baad shaadee kee rusoomaat pooree ho jaaengee. us vaqt tak sabr karen. phir main aap ko raakhil bhee day doonga. shart yah hai ki aap mazeed saat saal meray liyay kaam karen.”

²⁸yaaqoob maan gaya. chunaanchay jab ek haftay kay baad shaadee kee rusoomaat pooree hueen to laaban nay apnee betee raakhil kee shaadee bhee us kay saath kar dee. ²⁹(laaban nay raakhil ko apnee laundee bilhaah day dee taaki vah us kee khidmat karay.) ³⁰yaaqoob raakhil say bhee hambistar hua. vah liyaah kee nisbat usay ziyaada piyaar karta tha. phir us nay raakhil kay ivz saat saal aur laaban kee khidmat kee.

yaaqoob kay bachche

³¹jab rabb nay dekha ki liyaah say nafrat kee jaatee hai to us nay usay aulaad dee jabki raakhil kay haan bachchay paida na huay.

³²liyaah haamila huee aur us kay beta paida hua. us nay kaha, “rabb nay meree museebat dekhee hai aur ab mera shauhar mujhay piyaar karega.” us nay us ka naam roobin yaanee ‘dekho ek beta’ rakha.

³³vah dubaara haamila huee. ek aur beta paida hua. us nay kaha, “rabb nay suna ki mujh say nafrat kee jaatee hai, is liyay us nay mujhay yah bhee diya hai.” us nay us ka naam shamaaoon yaanee ‘rabb nay suna hai’ rakha.

³⁴vah ek aur dafa haamila huee. teesra beta paida hua. us nay kaha, “ab aakhirkaar shauhar kay saath mera bandhan mazboot ho jaaega, kyoonki main nay us kay liyay teen beton ko janm diya hai.” us nay us ka naam laavee yaanee bandhan rakha.

³⁵vah ek baar phir haamila huee. chautha beta paida hua. us nay kaha, “is dafa main rabb kee tamjeed karoongee.” us nay us ka naam yahoodaah yaanee tamjeed rakha. is kay baad us say aur bachchay paida na huay.