Paidaaish 28

¹ishaaq nay yaaqoob ko bula kar usay barkat dee aur kaha, “laazim hai ki too kisee kan’aanee aurat say shaadee na karay. ²ab seedhay masoputaamiya men apnay naana batooel kay ghar ja aur vahaan apnay maamoon laaban kee ladkiyon men say kisee ek say shaadee kar. ³allaah qaadir-ay-mutlaq tujhay barkat day kar phalnay phoolnay day aur tujhay itnee aulaad day ki too bahut saaree qaumon ka baap banay. ⁴vah tujhay aur teree aulaad ko ibraaheem kee barkat day jisay us nay yah mulk diya jis men too mehamaan kay taur par raheta hai. yah mulk tumhaaray qabzay men aaay.” ⁵yoon ishaaq nay yaaqoob ko masoputaamiya men laaban kay ghar bheja. laaban araamee mard batooel ka beta aur ribqa ka bhaaee tha.

esau ek aur shaadee karta hai

⁶esau ko pata chala ki ishaaq nay yaaqoob ko barkat day kar masoputaamiya bhej diya hai taaki vahaan shaadee karay. usay yah bhee maaloom hua ki ishaaq nay usay kan’aanee aurat say shaadee karnay say mana kiya hai ⁷aur ki yaaqoob apnay maan-baap kee sun kar masoputaamiya chala gaya hai. ⁸esau samajh gaya ki kan’aanee aurten meray baap ko manzoor naheen hain. ⁹is liyay vah ibraaheem kay betay ismaaeel kay paas gaya aur us kee betee mahelat say shaadee kee. vah nabaayot kee bahen thee. yoon us kee beeviyon men izaafa hua.

bait-el men yaaqoob ka khwaab

¹⁰yaaqoob bair-saba say haaraan kee taraf ravaana hua. ¹¹jab sooraj ghuroob hua to vah raat guzaarnay kay liyay ruk gaya aur vahaan kay pattharon men say ek ko lay kar usay apnay sirahaanay rakha aur so gaya.

¹²jab vah so raha tha to khwaab men ek seedhee dekhee jo zameen say aasmaan tak pahunchtee thee. farishtay us par chadhtay aur utartay nazar aatay thay. ¹³rabb us kay oopar khada tha. us nay kaha, “main rabb ibraaheem aur ishaaq ka khuda hoon. main tujhay aur teree aulaad ko yah zameen doonga jis par too leta hai. ¹⁴teree aulaad zameen par khaak kee tarah beshumaar hogee, aur too chaaron taraf phail jaaega. duniya kee tamaam qaumen teray aur teree aulaad kay vaseelay say barkat paaengee. ¹⁵main teray saath hoonga, tujhay mahfooz rakhoonga aur aakhirkaar tujhay is mulk men vaapas laaoonga. mumkin hee naheen ki main teray saath apna vaada poora karnay say pahelay tujhay chhod doon.”

¹⁶tab yaaqoob jaag utha. us nay kaha, “yaqeenan rabb yahaan haazir hai, aur mujhay maaloom naheen tha.” ¹⁷vah dar gaya aur kaha, “yah kitna khaufnaak maqaam hai. yah to allaah hee ka ghar aur aasmaan ka darvaaza hai.”

¹⁸yaaqoob subah-saveray utha. us nay vah patthar liya jo us nay apnay sirahaanay rakha tha aur usay satoon kee tarah khada kiya. phir us nay us par zaitoon ka tel undel diya. ¹⁹us nay maqaam ka naam bait-el yaanee ‘allaah ka ghar’ rakha (pahelay saath vaalay shaher ka naam looz tha). ²⁰us nay qasam kha kar kaha, “agar rabb meray saath ho, safar par meree hifaazat karay, mujhay khaana aur kapda muhayya kare ²¹aur main salaamatee say apnay baap kay ghar vaapas pahunchoon to phir vah mera khuda hoga. ²²jahaan yah patthar satoon kay taur par khada hai vahaan allaah ka ghar hoga, aur jo bhee too mujhay dega us ka dasvaan hissa tujhay diya karoonga.”