Paidaaish 27

ishaaq yaaqoob ko barkat deta hai

¹ishaaq boodha ho gaya to us kee nazar dhundala gaee. us nay apnay baday betay ko bula kar kaha, “beta.” esau nay javaab diya, “jee, main haazir hoon.” ²ishaaq nay kaha, “main boodha ho gaya hoon aur khuda jaanay kab mar jaaoon. ³is liyay apna teer kamaan lay kar jangal men nikal ja aur meray liyay kisee jaanvar ka shikaar kar. ⁴usay tayyaar karkay aisa lazeez khaana paka jo mujhay pasand hai. phir usay meray paas lay a. marnay say pahelay main vah khaana kha kar tujhay barkat dena chaahata hoon.”

⁵ribqa nay ishaaq kee esau kay saath baatcheet sun lee thee. jab esau shikaar karnay kay liyay chala gaya to us nay yaaqoob say kaha, ⁶“abhee abhee main nay tumhaaray abboo ko esau say yah baat kartay huay suna ki ⁷‘meray liyay kisee jaanvar ka shikaar karkay lay a. usay tayyaar karkay meray liyay lazeez khaana paka. marnay say pahelay main yah khaana kha kar tujhay rabb kay saamnay barkat dena chaahata hoon.’ ⁸ab suno, meray betay! jo kuchh main bataatee hoon vah karo. ⁹ja kar revad men say bakriyon kay do achchhay achchhay bachchay chun lo. phir main vahee lazeez khaana pakaaoongee jo tumhaaray abboo ko pasand hai. ¹⁰tum yah khaana us kay paas lay jaaogay to vah usay kha kar marnay say pahelay tumhen barkat dega.”

¹¹lekin yaaqoob nay etiraaz kiya, “aap jaantee hain ki esau kay jism par ghanay baal hain jabki meray baal kam hain. ¹²kaheen mujhay chhoonay say meray baap ko pata na chal jaaay ki main usay fareb day raha hoon. phir mujh par barkat naheen balki laanat aaegee.” ¹³us kee maan nay kaha, “tum par aanay vaalee laanat mujh par aaay, beta. bas meree baat maan lo. jaao aur bakriyon kay vah bachchay lay aao.”

¹⁴chunaanchay vah gaya aur unhen apnee maan kay paas lay aaya. ribqa nay aisa lazeez khaana pakaaya jo yaaqoob kay baap ko pasand tha. ¹⁵esau kay khaas mauqon kay liyay achchhay libaas ribqa kay paas ghar men thay. us nay un men say behtareen libaas chun kar apnay chhotay betay ko pahena diya. ¹⁶saath saath us nay bakriyon kee khaalen us kay haathon aur gardan par jahaan baal na thay lapet deen. ¹⁷phir us nay apnay betay yaaqoob ko rotee aur vah lazeez khaana diya jo us nay pakaaya tha.

¹⁸yaaqoob nay apnay baap kay paas ja kar kaha, “abboo jee.” ishaaq nay kaha, “jee, beta. too kaun hai?” ¹⁹us nay kaha, “main aap ka pahelautha esau hoon. main nay vah kiya hai jo aap nay mujhay kaha tha. ab zara uthen aur baith kar meray shikaar ka khaana khaaen taaki aap baad men mujhay barkat den.” ²⁰ishaaq nay poochha, “beta, tujhay yah shikaar itnee jaldee kis tarah mil gaya?” us nay javaab diya, “rabb aap kay khuda nay usay meray saamnay say guzarnay diya.”

²¹ishaaq nay kaha, “beta, meray qareeb a taaki main tujhay chhoo loonki too vaaqaee mera beta esau hai ki naheen.” ²²yaaqoob apnay baap kay nazdeek aaya. ishaaq nay usay chhoo kar kaha, “teree aavaaz to yaaqoob kee hai lekin teray haath esau kay hain.” ²³yoon us nay fareb khaaya. choonki yaaqoob kay haath esau kay haath kee maanind thay is liyay us nay usay barkat dee. ²⁴to bhee us nay dubaara poochha, “kya too vaaqaee mera beta esau hai?” yaaqoob nay javaab diya, “jee, main vahee hoon.” ²⁵aakhirkaar ishaaq nay kaha, “shikaar ka khaana meray paas lay a, beta. usay khaanay kay baad main tujhay barkat doonga.” yaaqoob khaana aur mai lay aaya. ishaaq nay khaaya aur piya, ²⁶phir kaha, “beta, meray paas a aur mujhay bosa day.” ²⁷yaaqoob nay paas a kar usay bosa diya. ishaaq nay us kay libaas ko soongh kar usay barkat dee. us nay kaha,

“meray betay kee khushboo us khulay maidaan kee khushboo kee maanind hai jisay rabb nay barkat dee hai. ²⁸allaah tujhay aasmaan kee os aur zameen kee zarkhezee day. vah tujhay kasrat ka anaaj aur angoor ka ras day. ²⁹qaumen teree khidmat karen, aur ummaten teray saamnay jhuk jaaen. apnay bhaaiyon ka hukmaraan ban, aur teree maan kee aulaad teray saamnay ghutnay tekay. jo tujh par laanat karay vah khud laantee ho aur jo tujhay barkat day vah khud barkat paaay.”

esau bhee barkat maangta hai

³⁰ishaaq kee barkat kay baad yaaqoob abhee rukhsat hee hua tha ki us ka bhaaee esau shikaar karkay vaapas aaya. ³¹vah bhee lazeez khaana paka kar usay apnay baap kay paas lay aaya. us nay kaha, “abboo jee, uthen aur meray shikaar ka khaana khaaen taaki aap mujhay barkat den.” ³²ishaaq nay poochha, “too kaun hai?” us nay javaab diya, “main aap ka bada beta esau hoon.”

³³ishaaq ghabra kar shiddat say kaampnay laga. us nay poochha, “phir vah kaun tha jo kisee jaanvar ka shikaar karkay meray paas lay aaya? teray aanay say zara pahelay main nay us shikaar ka khaana kha kar us shakhs ko barkat dee. ab vah barkat usee par rahegee.”

³⁴yah sun kar esau zordaar aur talkh cheekhen maarnay laga. “abboo, mujhay bhee barkat den,” us nay kaha. ³⁵lekin ishaaq nay javaab diya, “teray bhaaee nay a kar mujhay fareb diya. us nay teree barkat tujh say chheen lee hai.” ³⁶esau nay kaha, “us ka naam yaaqoob theek hee rakha gaya hai, kyoonki ab us nay mujhay doosree baar dhoka diya hai. pahelay us nay pahelauthay ka haq mujh say chheen liya aur ab meree barkat bhee zabardastee lay lee. kya aap nay meray liyay koee barkat mahfooz naheen rakhee?” ³⁷lekin ishaaq nay kaha, “main nay usay tera hukmaraan aur us kay tamaam bhaaiyon ko us kay khaadim bana diya hai. main nay usay anaaj aur angoor ka ras muhayya kiya hai. ab mujhay bata beta, kya kuchh rah gaya hai jo main tujhay doon?” ³⁸lekin esau khaamosh na hua balki kaha, “abboo, kya aap kay paas vaaqaee sirf yahee barkat thee? abboo, mujhay bhee barkat den.” vah zaar-o-qataar ronay laga.

³⁹phir ishaaq nay kaha, “too zameen kee zarkhezee aur aasmaan kee os say maheroom rahega. ⁴⁰too sirf apnee talvaar kay sahaaray zinda rahega aur apnay bhaaee kee khidmat karega. lekin ek din too bechain ho kar us ka jooa apnee gardan par say utaar phainkega.”

yaaqoob kee hijrat

⁴¹baap kee barkat kay sabab say esau yaaqoob ka dushman ban gaya. us nay dil men kaha, “vah din qareeb a gaay hain ki abboo intiqaal kar jaaengay aur ham un ka maatam karengay. phir main apnay bhaaee ko maar daaloonga.”

⁴²ribqa ko apnay baday betay esau ka yah iraada maaloom hua. us nay yaaqoob ko bula kar kaha, “tumhaara bhaaee badla lena chaahata hai. vah tumhen qatl karnay ka iraada rakhta hai. ⁴³beta, ab meree suno, yahaan say hijrat kar jaao. haaraan shaher men meray bhaaee laaban kay paas chalay jaao. ⁴⁴vahaan kuchh din thaheray rahena jab tak tumhaaray bhaaee ka ghussa thanda na ho jaae ⁴⁵jab us ka ghussa thanda ho jaaega aur vah tumhaaray us kay saath kiay gaay sulook ko bhool jaaega, tab main ittila doongee ki tum vahaan say vaapas a saktay ho. main kyoon ek hee din men tum donon say maheroom ho jaaoon?”

⁴⁶phir ribqa nay ishaaq say baat kee, “main esau kee beeviyon kay sabab say apnee zindagee say tang hoon. agar yaaqoob bhee is mulk kee aurton men say kisee say shaadee karay to behatar hai ki main pahelay hee mar jaaoon.”