Paidaaish 26
ishaaq aur ribqa jiraar men
1us mulk men dubaara kaal pada, jis tarah ibraaheem kay dinon men bhee pad gaya tha. ishaaq jiraar shaher gaya jis par filistiyon kay baadshaah abeemlik kee hukoomat thee. 2rabb nay ishaaq par zaahir ho kar kaha, “misr na ja balki us mulk men bas jo main tujhay dikhaata hoon. 3us mulk men ajnabee rah to main teray saath hoonga aur tujhay barkat doonga. kyoonki main tujhay aur teree aulaad ko yah tamaam ilaaqa doonga aur vah vaada poora karoonga jo main nay qasam kha kar teray baap ibraaheem say kiya tha. 4main tujhay itnee aulaad doonga jitnay aasmaan par sitaaray hain. aur main yah tamaam mulk unhen day doonga. teree aulaad say duniya kee tamaam qaumen barkat paaengee. 5main tujhay is liyay barkat doonga ki ibraaheem meray taabay raha aur meree hidaayaat aur ahkaam par chalta raha.” 6chunaanchay ishaaq jiraar men aabaad ho gaya.
7jab vahaan kay mardon nay ribqa kay baaray men poochha to ishaaq nay kaha, “yah meree bahen hai.” vah unhen yah bataanay say darta tha ki yah meree beevee hai, kyoonki us nay socha, “ribqa nihaayat khoobsoorat hai. agar unhen maaloom ho jaaay ki ribqa meree beevee hai to vah usay haasil karnay kee khaatir mujhay qatl kar dengay.”
8kaafee vaqt guzar gaya. ek din filistiyon kay baadshaah nay apnee khidkee men say jhaank kar dekha ki ishaaq apnee beevee ko piyaar kar raha hai. 9us nay ishaaq ko bula kar kaha, “vah to aap kee beevee hai! aap nay kyoon kaha ki meree bahen hai?” ishaaq nay javaab diya, “main nay socha ki agar main bataaoon ki yah meree beevee hai to log mujhay qatl kar dengay.”
10abeemlik nay kaha, “aap nay hamaaray saath kaisa sulook kar dikhaaya! kitnee aasaanee say meray aadmiyon men say koee aap kee beevee say hambistar ho jaata. is tarah ham aap kay sabab say ek baday jurm kay qusoorvaar thahertay.” 11phir abeemlik nay tamaam logon ko hukm diya, “jo bhee is mard ya us kee beevee ko chheday usay saza-ay-maut dee jaaegee.”
ishaaq ka filistiyon kay saath jhagdaa
12ishaaq nay us ilaaqay men kaashtkaaree kee, aur usee saal usay sau guna phal mila. yoon rabb nay usay barkat dee, 13aur vah ameer ho gaya. us kee daulat badhtee gaee, aur vah nihaayat daulatmand ho gaya. 14us kay paas itnee bhed-bakriyaan, gaay-bail aur ghulaam thay ki filistee us say hasad karnay lagay. 15ab aisa hua ki unhon nay un tamaam kuon ko mittee say bhar kar band kar diya jo us kay baap kay naukron nay khoday thay.
16aakhirkaar abeemlik nay ishaaq say kaha, “kaheen aur ja kar rahen, kyoonki aap ham say ziyaada zoraavar ho gaay hain.”
17chunaanchay ishaaq nay vahaan say ja kar jiraar kee vaadee men apnay deray lagaaay. 18vahaan filistiyon nay ibraaheem kee maut kay baad tamaam kuon ko mittee say bhar diya tha. ishaaq nay un ko dubaara khudvaaya. us nay un kay vahee naam rakhay jo us kay baap nay rakhay thay.
19ishaaq kay naukron ko vaadee men khodtay khodtay taaza paanee mil gaya. 20lekin jiraar kay charvaahay a kar ishaaq kay charvaahon say jhagadnay lagay. unhon nay kaha, “yah hamaara kuaan hai!” is liyay us nay us kuen ka naam usak yaanee jhagda rakha. 21ishaaq kay naukron nay ek aur kuaan khod liya. lekin us par bhee jhagda hua, is liyay us nay us ka naam sitna yaanee mukhaalafat rakha. 22vahaan say ja kar us nay ek teesra kuaan khudvaaya. is dafa koee jhagda na hua, is liyay us nay us ka naam rahobot yaanee ‘khulee jagah’ rakha. kyoonki us nay kaha, “rabb nay hamen khulee jagah dee hai, aur ab ham mulk men phalen phoolengay.”
23vahaan say vah bair-saba chala gaya. 24usee raat rabb us par zaahir hua aur kaha, “main teray baap ibraaheem ka khuda hoon. mat dar, kyoonki main teray saath hoon. main tujhay barkat doonga aur tujhay apnay khaadim ibraaheem kee khaatir bahut aulaad doonga.”
25vahaan ishaaq nay qurbaangaah banaaee aur rabb ka naam lay kar ibaadat kee. vahaan us nay apnay khaimay lagaaay aur us kay naukron nay kuaan khod liya.
abeemlik kay saath ahd
26ek din abeemlik, us ka saathee akhoozat aur us ka sipahesaalaar feekul jiraar say us kay paas aaay. 27ishaaq nay poochha, “aap kyoon meray paas aaay hain? aap to mujh say nafrat rakhtay hain. kya aap nay mujhay apnay darmiyaan say khaarij naheen kiya tha?” 28unhon nay javaab diya, “ham nay jaan liya hai ki rabb aap kay saath hai. is liyay ham nay kaha ki hamaara aap kay saath ahd hona chaahiay. aaiay ham qasam kha kar ek doosray say ahd baandhen 29ki aap hamen nuqsaan naheen pahunchaaengay, kyoonki ham nay bhee aap ko naheen chheda balki aap say sirf achchha sulook kiya aur aap ko salaamatee kay saath rukhsat kiya hai. aur ab zaahir hai ki rabb nay aap ko barkat dee hai.”
30ishaaq nay un kee ziyaafat kee, aur unhon nay khaaya aur piya. 31phir subah-saveray uth kar unhon nay ek doosray kay saamnay qasam khaaee. is kay baad ishaaq nay unhen rukhsat kiya aur vah salaamatee say ravaana huay.
32usee din ishaaq kay naukar aaay aur usay us kuen kay baaray men ittila dee jo unhon nay khoda tha. unhon nay kaha, “hamen paanee mil gaya hai.” 33us nay kuen ka naam saba yaanee ‘qasam’ rakha. aaj tak saath vaalay shaher ka naam bair-saba hai.
esau kee ajnabee beeviyaan
34jab esau 40 saal ka tha to us nay do hittee aurton say shaadee kee, bairee kee betee yahoodit say aur ailon kee betee baasmat say. 35yah aurten ishaaq aur ribqa kay liyay baday dukh ka baais baneen.