Paidaaish 25

ibraaheem kee mazeed aulaad

¹ibraaheem nay ek aur shaadee kee. naee beevee ka naam qatoora tha. ²qatoora kay chhah betay paida huay, zimraan, yuqsaan, midaan, midiyaan, isbaaq aur sookh. ³yuqsaan kay do betay thay, saba aur dadaan. asooree, latoosee aur loomee dadaan kee aulaad hain. ⁴midiyaan kay betay aifa, ifar, hanook, abeeda aur ild’a thay. yah sab qatoora kee aulaad thay.

⁵ibraaheem nay apnee saaree milkiyat ishaaq ko day dee. ⁶apnee maut say pahelay us nay apnee doosree beeviyon kay beton ko tuhfay day kar apnay betay say door mashriq kee taraf bhej diya.

ibraaheem kee vafaat

^7-8 ibraaheem 175 saal kee umr men faut hua. gharaz vah bahut umrraseeda aur zindagee say aasooda ho kar intiqaal karkay apnay baapdaada say ja mila. ^9-10 us kay beton ishaaq aur ismaaeel nay usay makfeela kay ghaar men dafan kiya jo mamray kay mashriq men hai. yah vahee ghaar tha jisay khet samet hittee aadmee ifron bin suhar say khareeda gaya tha. ibraaheem aur us kee beevee saara donon ko us men dafan kiya gaya.

¹¹ibraaheem kee vafaat kay baad allaah nay ishaaq ko barkat dee. us vaqt ishaaq bair-lahee-roee kay qareeb aabaad tha.

ismaaeel kee aulaad

¹²ibraaheem ka beta ismaaeel jo saara kee misree laundee haajira kay haan paida hua us ka nasabnaama yah hai. ¹³ismaaeel kay betay baday say lay kar chhotay tak yah hain : nabaayot, qeedaar, adabiel, mibsaam, ¹⁴mishma, dooma, massa, ¹⁵hadad, taima, yatoor, nafees aur qidma.

¹⁶yah betay baarah qabeelon kay baanee ban gaay, aur jahaan jahaan vah aabaad huay un jagahon ka vahee naam pad gaya. ¹⁷ismaaeel 137 saal ka tha jab vah kooch karkay apnay baapdaada say ja mila. ¹⁸us kee aulaad us ilaaqay men aabaad thee jo haveela aur shoor kay darmiyaan hai aur jo misr kay mashriq men asoor kee taraf hai. yoon ismaaeel apnay tamaam bhaaiyon kay saamnay hee aabaad hua.

esau aur yaaqoob kee paidaaish

¹⁹yah ibraaheem kay betay ishaaq ka bayaan hai.

²⁰ishaaq 40 saal ka tha jab us kee ribqa say shaadee huee. ribqa laaban kee bahen aur araamee mard batooel kee betee thee (batooel masoputaamiya ka tha). ²¹ribqa kay bachchay paida na huay. lekin ishaaq nay apnee beevee kay liyay dua kee to rabb nay us kee sunee, aur ribqa ummeed say huee. ²²us kay pet men bachchay ek doosray say zor’aazmaaee karnay lagay to vah rabb say poochhnay gaee, “agar yah meree haalat rahegee to phir main yahaan tak kyoon pahunch gaee hoon?” ²³rabb nay us say kaha, “teray andar do qaumen hain. vah tujh say nikal kar ek doosree say alag alag ho jaaengee. un men say ek ziyaada taaqatvar hogee, aur bada chhotay kee khidmat karega.”

²⁴paidaaish ka vaqt a gaya to judvaan betay paida huay. ²⁵pahela bachcha nikla to surkh sa tha, aur aisa lag raha tha ki vah ghanay baalon ka kot hee pahenay huay hai. is liyay us ka naam esau yaanee ‘baalon vaala’ rakha gaya. ²⁶is kay baad doosra bachcha paida hua. vah esau kee edee pakday huay nikla, is liyay us ka naam yaaqoob yaanee ‘edee pakadnay vaala’ rakha gaya. us vaqt ishaaq 60 saal ka tha.

²⁷ladkay javaan huay. esau maahir shikaaree ban gaya aur khulay maidaan men khush raheta tha. us kay muqaablay men yaaqoob shaaista tha aur deray men rahena pasand karta tha. ²⁸ishaaq esau ko piyaar karta tha, kyoonki vah shikaar ka gosht pasand karta tha. lekin ribqa yaaqoob ko piyaar kartee thee.

²⁹ek din yaaqoob saalan paka raha tha ki esau thakaahaara jangal say aaya. ³⁰us nay kaha, “mujhay jaldee say laal saalan, haan isee laal saalan say kuchh khaanay ko do. main to bedam ho raha hoon.” (isee liyay baad men us ka naam adom yaanee surkh pad gaya.) ³¹yaaqoob nay kaha, “pahelay mujhay pahelauthay ka haq bech do.” ³²esau nay kaha, “main to bhook say mar raha hoon, pahelauthay ka haq meray kis kaam ka?” ³³yaaqoob nay kaha, “pahelay qasam kha kar mujhay yah haq bech do.” esau nay qasam kha kar usay pahelauthay ka haq muntaqil kar diya.

³⁴tab yaaqoob nay usay kuchh rotee aur daal day dee, aur esau nay khaaya aur piya. phir vah uth kar chala gaya. yoon us nay pahelauthay kay haq ko haqeer jaana.