Paidaaish 24

ishaaq aur ribqaa

¹ibraaheem ab bahut boodha ho gaya tha. rabb nay usay har lihaaz say barkat dee thee. ²ek din us nay apnay ghar kay sab say buzurg naukar say jo us kee jaaydaad ka poora intizaam chalaata tha baat kee. “qasam kay liyay apna haath meree raan kay neechay rakho. ³rabb kee qasam khaao jo aasmaan-o-zameen ka khuda hai ki tum in kan’aaniyon men say jin kay darmiyaan main raheta hoon meray betay kay liyay beevee naheen laaoge ⁴balki meray vatan men meray rishtedaaron kay paas jaaogay aur un hee men say meray betay kay liyay beevee laaogay.” ⁵us kay naukar nay kaha, “shaayad vah aurat meray saath yahaan aana na chaahay. kya main is soorat men aap kay betay ko us vatan men vaapas lay jaaoon jis say aap niklay hain?” ⁶ibraaheem nay kaha, “khabardaar! usay hargiz vaapas na lay jaana. ⁷rabb jo aasmaan ka khuda hai apna farishta tumhaaray aagay bhejega, is liyay tum vahaan meray betay kay liyay beevee chunnay men zaroor kaamyaab hogay. kyoonki vahee mujhay meray baap kay ghar aur meray vatan say yahaan lay aaya hai, aur usee nay qasam kha kar mujh say vaada kiya hai ki main kan’aan ka yah mulk teree aulaad ko doonga. ⁸agar vahaan kee aurat yahaan aana na chaahay to phir tum apnee qasam say aazaad hogay. lekin kisee soorat men bhee meray betay ko vahaan vaapas na lay jaana.”

⁹ibraaheem kay naukar nay apna haath us kee raan kay neechay rakh kar qasam khaaee ki main sab kuchh aisa hee karoonga. ¹⁰phir vah apnay aaqa kay das oonton par qeemtee tuhfay laad kar masoputaamiya kee taraf ravaana hua. chaltay chaltay vah nahoor kay shaher pahunch gaya.

¹¹us nay oonton ko shaher kay baahar kuen kay paas bithaaya. shaam ka vaqt tha jab aurten kuen kay paas a kar paanee bhartee theen. ¹²phir us nay dua kee, “ai rabb meray aaqa ibraaheem kay khuda, mujhay aaj kaamyaabee bakhsh aur meray aaqa ibraaheem par meharbaanee kar. ¹³ab main is chashmay par khada hoon, aur shaher kee betiyaan paanee bharnay kay liyay a rahee hain. ¹⁴main un men say kisee say kahoonga, ‘zara apna ghada neechay karkay mujhay paanee pilaaen.’ agar vah javaab day, ‘pee len, main aap kay oonton ko bhee paanee pila detee hoon,’ to vah vahee hogee jisay too nay apnay khaadim ishaaq kay liyay chun rakha hai. agar aisa hua to main jaan loonga ki too nay meray aaqa par meharbaanee kee hai.”

¹⁵vah abhee dua kar hee raha tha ki ribqa shaher say nikal aaee. us kay kandhay par ghada tha. vah batooel kee betee thee (batooel ibraaheem kay bhaaee nahoor kee beevee milkaah ka beta tha). ¹⁶ribqa nihaayat khoobsoorat javaan ladkee thee, aur vah kunvaaree bhee thee. vah chashmay tak utree, apna ghada bhara aur phir vaapas oopar aaee.

¹⁷ibraaheem ka naukar daud kar us say mila. us nay kaha, “zara mujhay apnay ghaday say thoda sa paanee pilaaen.” ¹⁸ribqa nay kaha, “janaab, pee len.” jaldee say us nay apnay ghaday ko kandhay par say utaar kar haath men pakda taaki vah pee sakay. ¹⁹jab vah peenay say faarigh hua to ribqa nay kaha, “main aap kay oonton kay liyay bhee paanee lay aatee hoon. vah bhee pooray taur par apnee piyaas bujhaaen.” ²⁰jaldee say us nay apnay ghaday ka paanee hauz men undel diya aur phir bhaag kar kuen say itna paanee laatee rahee ki tamaam oonton kee piyaas bujh gaee.

²¹itnay men ibraaheem ka aadmee khaamoshee say usay dekhta raha, kyoonki vah jaanna chaahata tha ki kya rabb mujhay safar kee kaamyaabee bakhshega ya naheen. ²²oont paanee peenay say faarigh huay to us nay ribqa ko sonay kee ek nath aur do kangan diay. nath ka vazan taqreeban 6 graam tha aur kanganon ka 120 graam.

²³us nay poochha, “aap kis kee betee hain? kya us kay haan itnee jagah hai ki ham vahaan raat guzaar saken?”

²⁴ribqa nay javaab diya, “mera baap batooel hai. vah nahoor aur milkaah ka beta hai. ²⁵hamaaray paas bhoosa aur chaara hai. raat guzaarnay kay liyay bhee kaafee jagah hai.” ²⁶yah sun kar ibraaheem kay naukar nay rabb ko sijda kiya. ²⁷us nay kaha, “meray aaqa ibraaheem kay khuda kee tamjeed ho jis kay karam aur vafaadaaree nay meray aaqa ko naheen chhoda. rabb nay mujhay seedha meray maalik kay rishtedaaron tak pahunchaaya hai.”

²⁸ladkee bhaag kar apnee maan kay ghar chalee gaee. vahaan us nay sab kuchh bata diya jo hua tha. ^29-30 jab ribqa kay bhaaee laaban nay nath aur bahen kee kalaaiyon men kanganon ko dekha aur vah sab kuchh suna jo ibraaheem kay naukar nay ribqa ko bataaya tha to vah fauran kuen kee taraf dauda.

ibraaheem ka naukar ab tak oonton samet vahaan khada tha. ³¹laaban nay kaha, “rabb kay mubaarak banday, meray saath aaen. aap yahaan shaher kay baahar kyoon khaday hain? main nay apnay ghar men aap kay liyay sab kuchh tayyaar kiya hai. aap kay oonton kay liyay bhee kaafee jagah hai.” ³²vah naukar ko lay kar ghar pahuncha. oonton say saamaan utaara gaya, aur un ko bhoosa aur chaara diya gaya. paanee bhee laaya gaya taaki ibraaheem ka naukar aur us kay aadmee apnay paaon dhoen.

³³lekin jab khaana a gaya to ibraaheem kay naukar nay kaha, “is say pahelay ki main khaana khaaoon laazim hai ki apna muaamala pesh karoon.” laaban nay kaha, “bataaen apnee baat.” ³⁴us nay kaha, “main ibraaheem ka naukar hoon. ³⁵rabb nay meray aaqa ko bahut barkat dee hai. vah bahut ameer ban gaya hai. rabb nay usay kasrat say bhed-bakriyaan, gaay-bail, sona-chaandee, ghulaam aur laundiyaan, oont aur gadhay diay hain. ³⁶jab meray maalik kee beevee boodhee ho gaee thee to us kay beta paida hua tha. ibraaheem nay usay apnee pooree milkiyat day dee hai. ³⁷lekin meray aaqa nay mujh say kaha, ‘qasam khaao ki tum in kan’aaniyon men say jin kay darmiyaan main raheta hoon meray betay kay liyay beevee naheen laaoge ³⁸balki meray baap kay gharaanay aur meray rishtedaaron kay paas ja kar us kay liyay beevee laaogay.’ ³⁹main nay apnay maalik say kaha, ‘shaayad vah aurat meray saath aana na chaahay.’ ⁴⁰us nay kaha, ‘rabb jis kay saamnay main chalta raha hoon apnay farishtay ko tumhaaray saath bhejega aur tumhen kaamyaabee bakhshega. tumhen zaroor meray rishtedaaron aur meray baap kay gharaanay say meray betay kay liyay beevee milegee. ⁴¹lekin agar tum meray rishtedaaron kay paas jaao aur vah inkaar karen to phir tum apnee qasam say aazaad hogay.’ ⁴²aaj jab main kuen kay paas aaya to main nay dua kee, ‘ai rabb, meray aaqa kay khuda, agar teree marzee ho to mujhay is mishan men kaamyaabee bakhsh jis kay liyay main yahaan aaya hoon. ⁴³ab main is kuen kay paas khada hoon. jab koee javaan aurat shaher say nikal kar yahaan aaay to main us say kahoonga, “zara mujhay apnay ghaday say thoda sa paanee pilaaen.” ⁴⁴agar vah kahay, “pee len, main aap kay oonton kay liyay bhee paanee lay aaoongee” to is ka matlab yah ho ki too nay usay meray aaqa kay betay kay liyay chun liya hai ki us kee beevee ban jaaay ‪’

⁴⁵main abhee dil men yah dua kar raha tha ki ribqa shaher say nikal aaee. us kay kandhay par ghada tha. vah chashmay tak utree aur apna ghada bhar liya. main nay us say kaha, ‘zara mujhay paanee pilaaen.’ ⁴⁶javaab men us nay jaldee say apnay ghaday ko kandhay par say utaar kar kaha, ‘pee len, main aap kay oonton ko bhee paanee pilaatee hoon.’ main nay paanee piya, aur us nay oonton ko bhee paanee pilaaya. ⁴⁷phir main nay us say poochha, ‘aap kis kee betee hain?’ us nay javaab diya, ‘mera baap batooel hai. vah nahoor aur milkaah ka beta hai.’ phir main nay us kee naak men nath aur us kee kalaaiyon men kangan pahena diay. ⁴⁸tab main nay rabb ko sijda karkay apnay aaqa ibraaheem kay khuda kee tamjeed kee jis nay mujhay seedha meray maalik kee bhateejee tak pahunchaaya taaki vah ishaaq kee beevee ban jaae

⁴⁹ab mujhay bataaen, kya aap meray aaqa par apnee meharbaanee aur vafaadaaree ka izhaar karna chaahatay hain? agar aisa hai to ribqa kee ishaaq kay saath shaadee qabool karen. agar aap muttafiq naheen hain to mujhay bataaen taaki main koee aur qadam utha sakoon.”

⁵⁰laaban aur batooel nay javaab diya, “yah baat rabb kee taraf say hai, is liyay ham kisee tarah bhee inkaar naheen kar saktay. ⁵¹ribqa aap kay saamnay hai. usay lay jaaen. vah aap kay maalik kay betay kee beevee ban jaaay jis tarah rabb nay farmaaya hai.” ⁵²yah sun kar ibraaheem kay naukar nay rabb ko sijda kiya. ⁵³phir us nay sonay aur chaandee kay zevraat aur mahengay malboosaat apnay saamaan men say nikaal kar ribqa ko diay. ribqa kay bhaaee aur maan ko bhee qeemtee tuhfay milay.

⁵⁴is kay baad us nay apnay hamsafron kay saath shaam ka khaana khaaya. vah raat ko vaheen thaheray. aglay din jab uthay to naukar nay kaha, “ab hamen ijaazat den taaki apnay aaqa kay paas laut jaaen.” ⁵⁵ribqa kay bhaaee aur maan nay kaha, “ribqa kuchh din aur hamaaray haan thaheray. phir aap jaaen.” ⁵⁶lekin us nay un say kaha, “ab der na karen, kyoonki rabb nay mujhay meray mishan men kaamyaabee bakhshee hai. mujhay ijaazat den taaki apnay maalik kay paas vaapas jaaoon.” ⁵⁷unhon nay kaha, “chalen, ham ladkee ko bula kar usee say poochh letay hain.”

⁵⁸unhon nay ribqa ko bula kar us say poochha, “kya too abhee is aadmee kay saath jaana chaahatee hai?” us nay kaha, “jee, main jaana chaahatee hoon.” ⁵⁹chunaanchay unhon nay apnee bahen ribqa, us kee daaya, ibraaheem kay naukar aur us kay hamsafron ko rukhsat kar diya. ⁶⁰pahelay unhon nay ribqa ko barkat day kar kaha, “hamaaree bahen, allaah karay ki too karodon kee maan banay. teree aulaad apnay dushmanon kay shaheron kay darvaazon par qabza karay.” ⁶¹phir ribqa aur us kee naukraaniyaan uth kar oonton par savaar hueen aur ibraaheem kay naukar kay peechhay ho leen. chunaanchay naukar unhen saath lay kar ravaana ho gaya.

⁶²us vaqt ishaaq mulk kay junoobee hissay, dasht-ay-najab men raheta tha. vah bair-lahee-roee say aaya tha. ⁶³ek shaam vah nikal kar khulay maidaan men apnee sochon men magan tahel raha tha ki achaanak oont us kee taraf aatay huay nazar aaay. ⁶⁴jab ribqa nay apnee nazar utha kar ishaaq ko dekha to us nay oont say utar kar ⁶⁵naukar say poochha, “vah aadmee kaun hai jo maidaan men ham say milnay a raha hai?” naukar nay kaha, “mera maalik hai.” yah sun kar ribqa nay chaadar lay kar apnay chiharay ko dhaamp liya.

⁶⁶naukar nay ishaaq ko sab kuchh bata diya jo us nay kiya tha. ⁶⁷phir ishaaq ribqa ko apnee maan saara kay deray men lay gaya. us nay us say shaadee kee, aur vah us kee beevee ban gaee. ishaaq kay dil men us kay liyay bahut muhabbat paida huee. yoon usay apnee maan kee maut kay baad sukoon mila.