Paidaaish 20
ibraaheem aur abeemlik
1ibraaheem vahaan say junoob kee taraf dasht-ay-najab men chala gaya aur qaadis aur shoor kay darmiyaan ja basa. kuchh der kay liyay vah jiraar men thahera, lekin ajnabee kee haisiyat say. 2vahaan us nay logon ko bataaya, “saara meree bahen hai.” is liyay jiraar kay baadshaah abeemlik nay kisee ko bhijva diya ki usay mahel men lay aaay.
3lekin raat kay vaqt allaah khwaab men abeemlik par zaahir hua aur kaha, “maut teray sar par khadee hai, kyoonki jo aurat too apnay ghar lay aaya hai vah shaadeeshuda hai.”
4asal men abeemlik abhee tak saara kay qareeb naheen gaya tha. us nay kaha, “meray aaqa, kya too ek bequsoor qaum ko bhee halaak karega? 5kya ibraaheem nay mujh say naheen kaha tha ki saara meree bahen hai? aur saara nay us kee haan men haan milaaee. meree neeyat achchhee thee aur main nay ghalat kaam naheen kiya.” 6allaah nay kaha, “haan, main jaanta hoon ki is men teree neeyat achchhee thee. is liyay main nay tujhay mera gunaah karnay aur usay chhoonay say rok diya. 7ab us aurat ko us kay shauhar ko vaapas kar day, kyoonki vah nabee hai aur teray liyay dua karega. phir too naheen marega. lekin agar too usay vaapas naheen karega to jaan lay ki teree aur teray logon kee maut yaqeenee hai.”
8abeemlik nay subah-saveray uth kar apnay tamaam kaarindon ko yah sab kuchh bataaya. yah sun kar un par dahshat chha gaee. 9phir abeemlik nay ibraaheem ko bula kar kaha, “aap nay hamaaray saath kya kiya hai? main nay aap kay saath kya ghalat kaam kiya ki aap nay mujhay aur meree saltanat ko itnay sangeen jurm men phansa diya hai? jo sulook aap nay hamaaray saath kar dikhaaya hai vah kisee bhee shakhs kay saath naheen karna chaahiay. 10aap nay yah kyoon kiya?”
11ibraaheem nay javaab diya, “main nay apnay dil men kaha ki yahaan kay log allaah ka khauf naheen rakhtay hongay, is liyay vah meree beevee ko haasil karnay kay liyay mujhay qatl kar dengay. 12haqeeqat men vah meree bahen bhee hai. vah meray baap kee betee hai agarchi us kee aur meree maan farq hain. yoon main us say shaadee kar saka. 13phir jab allaah nay honay diya ki main apnay baap kay gharaanay say nikal kar idhar udhar phiroonto main nay apnee beevee say kaha, ‘mujh par yah meharbaanee kar ki jahaan bhee ham jaaen meray baaray men kah dena ki vah mera bhaaee hai’.”
14phir abeemlik nay ibraaheem ko bhed-bakriyaan, gaay-bail, ghulaam aur laundiyaan day kar us kee beevee saara ko usay vaapas kar diya. 15us nay kaha, “mera mulk aap kay liyay khula hai. jahaan jee chaahay us men ja basen.” 16saara say us nay kaha, “main aap kay bhaaee ko chaandee kay hazaar sikkay deta hoon. is say aap aur aap kay logon kay saamnay aap kay saath kiay gaay naarva sulook ka izaala ho aur aap ko bequsoor qaraar diya jaaay.”
17-18 tab ibraaheem nay allaah say dua kee aur allaah nay abeemlik, us kee beevee aur us kee laundiyon ko shifa dee, kyoonki rabb nay abeemlik kay gharaanay kee tamaam aurton ko saara kay sabab say baanjh bana diya tha. lekin ab un kay haan dubaara bachchay paida honay lagay.