Paidaaish 19
sadoom aur amoora kee tabaahee
1shaam kay vaqt yah do farishtay sadoom pahunchay. loot shaher kay darvaazay par baitha tha. jab us nay unhen dekha to khaday ho kar un say milnay gaya aur munh kay bal gir kar sijda kiya. 2us nay kaha, “saahibo, apnay banday kay ghar tashreef laaen taaki apnay paaon dho kar raat ko thaheren aur phir kal subah-saveray uth kar apna safar jaaree rakhen.” unhon nay kaha, “koee baat naheen, ham chauk men raat guzaarengay.” 3lekin loot nay unhen bahut majboor kiya, aur aakhirkaar vah us kay saath us kay ghar aaay. us nay un kay liyay khaana pakaaya aur bekhameeree rotee banaaee. phir unhon nay khaana khaaya.
4vah abhee sonay kay liyay letay naheen thay ki shaher kay javaanon say lay kar boodhon tak tamaam mardon nay loot kay ghar ko gher liya. 5unhon nay aavaaz day kar loot say kaha, “vah aadmee kahaan hain jo raat kay vaqt teray paas aaay? un ko baahar lay a taaki ham un kay saath haraamkaaree karen.”
6loot un say milnay baahar gaya. us nay apnay peechhay darvaaza band kar liyaa 7aur kaha, “meray bhaaiyo, aisa mat karo, aisee badkaaree na karo. 8dekho, meree do kunvaaree betiyaan hain. unhen main tumhaaray paas baahar lay aata hoon. phir jo jee chaahay un kay saath karo. lekin in aadmiyon ko chhod do, kyoonki vah meray mehamaan hain.”
9unhon nay kaha, “raastay say hat ja! dekho, yah shakhs jab hamaaray paas aaya tha to ajnabee tha, aur ab yah ham par haakim banna chaahata hai. ab teray saath un say ziyaada bura sulook karengay.” vah usay majboor kartay kartay darvaazay ko todnay kay liyay aagay badhay. 10lekin ain vaqt par andar kay aadmee loot ko pakad kar andar lay aaay, phir darvaaza dubaara band kar diya. 11unhon nay chhoton say lay kar badon tak baahar kay tamaam aadmiyon ko andha kar diya, aur vah darvaazay ko dhoondtay dhoondtay thak gaay.
12donon aadmiyon nay loot say kaha, “kya tera koee aur rishtedaar is shaher men raheta hai, maslan koee daamaad ya beta-betee? sab ko saath lay kar yahaan say chala ja, 13kyoonki ham yah maqaam tabaah karnay ko hain. is kay baashindon kee badee kay baais logon kee aahen buland ho kar rabb kay huzoor pahunch gaee hain, is liyay us nay hamen is ko tabaah karnay kay liyay bheja hai.”
14loot ghar say nikla aur apnay daamaadon say baat kee jin ka us kee betiyon kay saath rishta ho chuka tha. us nay kaha, “jaldee karo, is jagah say niklo, kyoonki rabb is shaher ko tabaah karnay ko hai.” lekin us kay daamaadon nay isay mazaaq hee samjha.
15jab pau phatnay lagee to donon aadmiyon nay loot ko bahut samjhaaya aur kaha, “jaldee kar! apnee beevee aur donon betiyon ko saath lay kar chala ja, varna jab shaher ko saza dee jaaegee to too bhee halaak ho jaaega.” 16to bhee vah jhijakta raha. aakhirkaar donon nay loot, us kee beevee aur betiyon kay haath pakad kar unhen shaher kay baahar tak pahuncha diya, kyoonki rabb ko loot par taras aata tha.
17joon hee vah unhen baahar lay aaay un men say ek nay kaha, “apnee jaan bacha kar chala ja. peechhay mud kar na dekhna. maidaan men kaheen na thaherna balki pahaadon men panaah lena, varna too halaak ho jaaega.”
18lekin loot nay un say kaha, “naheen meray aaqa, aisa na ho. 19teray banday ko teree nazar-ay-karam haasil huee hai aur too nay meree jaan bachaanay men bahut meharbaanee kar dikhaaee hai. lekin main pahaadon men panaah naheen lay sakta. vahaan pahunchnay say pahelay yah museebat mujh par aan padegee aur main halaak ho jaaoonga. 20dekh, qareeb hee ek chhota qasba hai. vah itna nazdeek hai ki main us taraf hijrat kar sakta hoon. mujhay vahaan panaah lenay day. vah chhota hee hai, na? phir meree jaan bachegee.”
21us nay kaha, “chalo, theek hai. teree yah darakhwaast bhee manzoor hai. main yah qasba tabaah naheen karoonga. 22lekin bhaag kar vahaan panaah lay, kyoonki jab tak too vahaan pahunch na jaaay main kuchh naheen kar sakta.” is liyay qasbay ka naam zughar yaanee chhota hai.
23jab loot zughar pahuncha to sooraj nikla hua tha. 24tab rabb nay aasmaan say sadoom aur amoora par gandhak aur aag barsaaee. 25yoon us nay us pooray maidaan ko us kay shaheron, baashindon aur tamaam hariyaalee samet tabaah kar diya. 26lekin faraar hotay vaqt loot kee beevee nay peechhay mud kar dekha to vah fauran namak ka satoon ban gaee.
27ibraaheem subah-saveray uth kar us jagah vaapas aaya jahaan vah kal rabb kay saamnay khada hua tha. 28jab us nay neechay sadoom, amoora aur pooree vaadee kee taraf nazar kee to vahaan say bhattay ka sa dhuaan uth raha tha.
29yoon allaah nay ibraaheem ko yaad kiya jab us nay us maidaan kay shaher tabaah kiay. kyoonki us nay unhen tabaah karnay say pahelay loot ko jo un men aabaad tha vahaan say nikaal laaya.
loot aur us kee betiyaan
30loot aur us kee betiyaan ziyaada der tak zughar men na thaheray. vah ravaana ho kar pahaadon men aabaad huay, kyoonki loot zughar men rahenay say darta tha. vahaan unhon nay ek ghaar ko apna ghar bana liya.
31ek din badee betee nay chhotee say kaha, “abboo boodha hai aur yahaan koee mard hai naheen jis kay zareeay hamaaray bachchay paida ho saken. 32aao, ham abboo ko mai pilaaen. jab vah nashay men dhut ho to ham us kay saath hambistar ho kar apnay liyay aulaad paida karen taaki hamaaree nasal qaaim rahay.”
33us raat unhon nay apnay baap ko mai pilaaee. jab vah nashay men tha to badee betee andar ja kar us kay saath hambistar huee. choonki loot hosh men naheen tha is liyay usay kuchh bhee maaloom na hua. 34aglay din badee bahen nay chhotee bahen say kaha, “pichhlee raat main abboo say hambistar huee. aao, aaj raat ko ham usay dubaara mai pilaaen. jab vah nashay men dhut ho to tum us kay saath hambistar ho kar apnay liyay aulaad paida karna taaki hamaaree nasal qaaim rahay.” 35chunaanchay unhon nay us raat bhee apnay baap ko mai pilaaee. jab vah nashay men tha to chhotee betee uth kar us kay saath hambistar huee. is baar bhee vah hosh men naheen tha, is liyay usay kuchh bhee maaloom na hua.
36yoon loot kee betiyaan apnay baap say ummeed say hueen. 37badee betee kay haan beta paida hua. us nay us ka naam moaab rakha. us say moaabee niklay hain. 38chhotee betee kay haan bhee beta paida hua. us nay us ka naam bin-ammee rakha. us say ammonee niklay hain.