Paidaaish 18
mamray men ibraaheem kay teen mehamaan
1ek din rabb mamray kay darakhton kay paas ibraaheem par zaahir hua. ibraaheem apnay khaimay kay darvaazay par baitha tha. din kee garmee urooj par thee. 2achaanak us nay dekha ki teen mard meray saamnay khaday hain. unhen dekhtay hee vah khaimay say un say milnay kay liyay dauda aur munh kay bal gir kar sijda kiya. 3us nay kaha, “meray aaqa, agar mujh par aap kay karam kee nazar hai to aagay na badhen balki kuchh der apnay banday kay ghar thaheren. 4agar ijaazat ho to main kuchh paanee lay aaoon taaki aap apnay paaon dho kar darakht kay saay men aaraam kar saken. 5saath saath main aap kay liyay thoda bahut khaana bhee lay aaoon taaki aap taqviyat pa kar aagay badh saken. mujhay yah karnay den, kyoonki aap apnay khaadim kay ghar a gaay hain.” unhon nay kaha, “theek hai. jo kuchh too nay kaha hai vah kar.”
6ibraaheem khaimay kee taraf daud kar saara kay paas aaya aur kaha, “jaldee karo! 16 kilograam behtareen maida lay aur usay goondh kar rotiyaan bana.” 7phir vah bhaag kar bailon kay paas pahuncha. un men say us nay ek mota-taaza bachhda chun liya jis ka gosht narm tha aur usay apnay naukar ko diya jis nay jaldee say usay tayyaar kiya. 8jab khaana tayyaar tha to ibraaheem nay usay lay kar lassee aur doodh kay saath apnay mehamaanon kay aagay rakh diya. vah khaanay lagay aur ibraaheem un kay saamnay darakht kay saay men khada raha.
9unhon nay poochha, “teree beevee saara kahaan hai?” us nay javaab diya, “khaimay men.” 10rabb nay kaha, “ain ek saal kay baad main vaapas aaoonga to teree beevee saara kay beta hoga.”
saara yah baaten sun rahee thee, kyoonki vah us kay peechhay khaimay kay darvaazay kay paas thee. 11donon miyaan-beevee boodhay ho chukay thay aur saara us umr say guzar chukee thee jis men aurton kay bachchay paida hotay hain. 12is liyay saara andar hee andar hans padee aur socha, “yah kaisay ho sakta hai? kya jab main budhaapay kay baais ghisay phatay libaas kee maanind hoon to javaanee kay joban ka lutf uthaaoon? aur mera shauhar bhee boodha hai.”
13rabb nay ibraaheem say poochha, “saara kyoon hans rahee hai? vah kyoon kah rahee hai, ‘kya vaaqaee meray haan bachcha paida hoga jabki main itnee umrraseeda hoon?’ 14kya rabb kay liyay koee kaam naamumkin hai? ek saal kay baad muqarrara vaqt par main vaapas aaoonga to saara kay beta hoga.” 15saara dar gaee. us nay jhoot bol kar inkaar kiya, “main naheen hans rahee thee.”
rabb nay kaha, “naheen, too zaroor hans rahee thee.”
ibraaheem sadoom kay liyay minnat karta hai
16phir mehamaan uth kar ravaana huay aur neechay vaadee men sadoom kee taraf dekhnay lagay. ibraaheem unhen rukhsat karnay kay liyay saath saath chal raha tha. 17rabb nay dil men kaha, “main ibraaheem say vah kaam kyoon chhupaaay rakhoon jo main karnay kay liyay ja raha hoon? 18isee say to ek badee aur taaqatvar qaum niklegee aur isee say main duniya kee tamaam qaumon ko barkat doonga. 19usee ko main nay chun liya hai taaki vah apnee aulaad aur apnay baad kay gharaanay ko hukm day ki vah rabb kee raah par chal kar raast aur munsifaana kaam karen. kyoonki agar vah aisa karen to rabb ibraaheem kay saath apna vaada poora karega.”
20phir rabb nay kaha, “sadoom aur amoora kee badee kay baais logon kee aahen buland ho rahee hain, kyoonki un say bahut sangeen gunaah sarzad ho rahay hain. 21main utar kar un kay paas ja raha hoon taaki dekhoon ki yah ilzaam vaaqaee sachch hain jo mujh tak pahunchay hain. agar aisa naheen hai to main yah jaanna chaahata hoon.”
22doosray do aadmee sadoom kee taraf aagay niklay jabki rabb kuchh der kay liyay vahaan thahera raha aur ibraaheem us kay saamnay khada raha. 23phir us nay qareeb a kar us say baat kee, “kya too raastbaazon ko bhee shareeron kay saath tabaah kar dega? 24ho sakta hai ki shaher men 50 raastbaaz hon. kya too phir bhee shaher ko barbaad kar dega aur usay un 50 kay sabab say muaaf naheen karega? 25yah kaisay ho sakta hai ki too bequsooron ko shareeron kay saath halaak kar day? yah to naamumkin hai ki too nek aur shareer logon say ek jaisa sulook karay. kya laazim naheen ki pooree duniya ka munsif insaaf karay?”
26rabb nay javaab diya, “agar mujhay shaher men 50 raastbaaz mil jaaen to un kay sabab say tamaam ko muaaf kar doonga.”
27ibraaheem nay kaha, “main muaafee chaahata hoon ki main nay rabb say baat karnay kee jur’at kee hai agarchi main khaak aur raakh hee hoon. 28lekin ho sakta hai ki sirf 45 raastbaaz us men hon. kya too phir bhee un paanch logon kee kamee kay sabab say pooray shaher ko tabaah karega?” us nay kaha, “agar mujhay 45 bhee mil jaaen to usay barbaad naheen karoonga.”
29ibraaheem nay apnee baat jaaree rakhee, “aur agar sirf 40 nek log hon to?” rabb nay kaha, “main un 40 kay sabab say unhen chhod doonga.”
30ibraaheem nay kaha, “rabb ghussa na karay ki main ek dafa aur baat karoon. shaayad vahaan sirf 30 hon.” us nay javaab diya, “phir bhee unhen chhod doonga.”
31ibraaheem nay kaha, “main muaafee chaahata hoon ki main nay rabb say baat karnay kee jur’at kee hai. agar sirf 20 paaay jaaen?” rabb nay kaha, “main 20 kay sabab say shaher ko barbaad karnay say baaz rahoonga.”
32ibraaheem nay ek aakhiree dafa baat kee, “rabb ghussa na karay agar main ek aur baar baat karoon. shaayad us men sirf 10 paaay jaaen.” rabb nay kaha, “main usay un 10 logon kay sabab say bhee barbaad naheen karoonga.”
33in baaton kay baad rabb chala gaya aur ibraaheem apnay ghar ko laut aaya.