Paidaaish 17

ahd ka nishaan : khatnaa

¹jab abraam 99 saal ka tha to rabb us par zaahir hua. us nay kaha, “main allaah qaadir-ay-mutlaq hoon. meray huzoor chalta rah aur beilzaam ho. ²main teray saath apna ahd baandhoonga aur teree aulaad bahut hee ziyaada badha doonga.”

³abraam munh kay bal gir gaya, aur allaah nay us say kaha, ⁴“mera teray saath ahd hai ki too bahut qaumon ka baap hoga. ⁵ab say too abraam yaanee ‘azeem baap’ naheen kahelaaega balki tera naam ibraaheem yaanee ‘bahut qaumon ka baap’ hoga. kyoonki main nay tujhay bahut qaumon ka baap bana diya hai. ⁶main tujhay bahut hee ziyaada aulaad bakhsh doonga, itnee ki qaumen banengee. tujh say baadshaah bhee nikalengay. ⁷main apna ahd teray aur teree aulaad kay saath nasal-dar-nasal qaaim karoonga, ek abdee ahd jis kay mutaabiq main tera aur teree aulaad ka khuda hoonga. ⁸too is vaqt mulq-ay-kan’aan men pardesee hai, lekin main is pooray mulk ko tujhay aur teree aulaad ko deta hoon. yah hamesha tak un ka hee rahega, aur main un ka khuda hoonga.”

⁹allaah nay ibraaheem say yah bhee kaha, “tujhay aur teree aulaad ko nasal-dar-nasal meray ahd kee sharaait pooree karnee hain. ¹⁰is kee ek shart yah hai ki har ek mard ka khatna kiya jaae ¹¹apna khatna karaao. yah hamaaray aapas kay ahd ka zaahiree nishaan hoga. ¹²laazim hai ki too aur teree aulaad nasal-dar-nasal apnay har ek betay ka aathven din khatna karvaaen. yah usool us par bhee laagoo hai jo teray ghar men raheta hai lekin tujh say rishta naheen rakhta, chaahay vah ghar men paida hua ho ya kisee ajnabee say khareeda gaya ho. ¹³ghar kay har ek mard ka khatna karna laazim hai, khwaah vah ghar men paida hua ho ya kisee ajnabee say khareeda gaya ho. yah is baat ka nishaan hoga ki mera teray saath ahd hamesha tak qaaim rahega. ¹⁴jis mard ka khatna na kiya gaya usay us kee qaum men say mitaaya jaaega, kyoonki us nay meray ahd kee sharaait pooree na keen.”

¹⁵allaah nay ibraaheem say yah bhee kaha, “apnee beevee saaray ka naam bhee badal dena. ab say us ka naam saaray naheen balki saara yaanee shahzaadee hoga. ¹⁶main usay barkat bakhshoonga aur tujhay us kee maarifat beta doonga. main usay yahaan tak barkat doonga ki us say qaumen balki qaumon kay baadshaah nikalengay.”

¹⁷ibraaheem munh kay bal gir gaya. lekin dil hee dil men vah hans pada aur socha, “yah kis tarah ho sakta hai? main to 100 saal ka hoon. aisay aadmee kay haan bachcha kis tarah paida ho sakta hai? aur saara jaisee umrraseeda aurat kay bachcha kis tarah paida ho sakta hai? us kee umr to 90 saal hai.” ¹⁸us nay allaah say kaha, “haan, ismaaeel hee teray saamnay jeeta rahay.”

¹⁹allaah nay kaha, “naheen, teree beevee saara kay haan beta paida hoga. too us ka naam ishaaq yaanee ‘vah hansta hai’ rakhna. main us kay aur us kee aulaad kay saath abdee ahd baandhoonga. ²⁰main ismaaeel kay silsilay men bhee teree darakhwaast pooree karoonga. main usay bhee barkat day kar phalnay phoolnay doonga aur us kee aulaad bahut hee ziyaada badha doonga. vah baarah raeeson ka baap hoga, aur main us kee maarifat ek badee qaum banaaoonga. ²¹lekin mera ahd ishaaq kay saath hoga, jo ain ek saal kay baad saara kay haan paida hoga.”

²²allaah kee ibraaheem kay saath baat khatm huee, aur vah us kay paas say aasmaan par chala gaya.

²³usee din ibraaheem nay allaah ka hukm poora kiya. us nay ghar kay har ek mard ka khatna karvaaya, apnay betay ismaaeel ka bhee aur un ka bhee jo us kay ghar men rahetay lekin us say rishta naheen rakhtay thay, chaahay vah us kay ghar men paida huay thay ya khareeday gaay thay. ²⁴ibraaheem 99 saal ka tha jab us ka khatna hua, ²⁵jabki us ka beta ismaaeel 13 saal ka tha. ²⁶donon ka khatna usee din hua. ²⁷saath saath gharaanay kay tamaam baaqee mardon ka khatna bhee hua, bashmool un kay jin ka ibraaheem kay saath rishta naheen tha, chaahay vah ghar men paida huay ya kisee ajnabee say khareeday gaay thay.