Paidaaish 16

haajira aur ismaaeel

¹ab tak abraam kee beevee saaray kay koee bachcha naheen hua tha. lekin unhon nay ek misree laundee rakhee thee jis ka naam haajira tha, ²aur ek din saaray nay abraam say kaha, “rabb nay mujhay bachchay paida karnay say maheroom rakha hai, is liyay meree laundee kay saath hambistar hon. shaayad mujhay us kee maarifat bachcha mil jaaay.”

abraam nay saaray kee baat maan lee. ³chunaanchay saaray nay apnee misree laundee haajira ko apnay shauhar abraam ko day diya taaki vah us kee beevee ban jaaay us vaqt abraam ko kan’aan men bastay huay das saal ho gaay thay. ⁴abraam haajira say hambistar hua to vah ummeed say ho gaee. jab haajira ko yah maaloom hua to vah apnee maalikan ko haqeer jaannay lagee. ⁵tab saaray nay abraam say kaha, “jo zulm mujh par kiya ja raha hai vah aap hee par aaay. main nay khud isay aap kay baazooon men day diya tha. ab jab isay maaloom hua hai ki ummeed say hai to mujhay haqeer jaannay lagee hai. rabb meray aur aap kay darmiyaan faisla karay.” ⁶abraam nay javaab diya, “dekho, yah tumhaaree laundee hai aur tumhaaray ikhtiyaar men hai. jo tumhaara jee chaahay us kay saath karo.”

is par saaray us say itna bura sulook karnay lagee ki haajira faraar ho gaee. ⁷rabb kay farishtay ko haajira registaan kay us chashmay kay qareeb milee jo shoor kay raastay par hai. ⁸us nay kaha, “saaray kee laundee haajira, too kahaan say a rahee hai aur kahaan ja rahee hai?” haajira nay javaab diya, “main apnee maalikan saaray say faraar ho rahee hoon.” ⁹rabb kay farishtay nay us say kaha, “apnee maalikan kay paas vaapas chalee ja aur us kay taabay rah. ¹⁰main teree aulaad itnee badhaaoonga ki usay gina naheen ja sakega.” ¹¹rabb kay farishtay nay mazeed kaha, “too ummeed say hai. ek beta paida hoga. us ka naam ismaaeel yaanee ‘allaah sunta hai’ rakh, kyoonki rabb nay museebat men teree aavaaz sunee. ¹²vah janglee gadhay kee maanind hoga. us ka haath har ek kay khilaaf aur har ek ka haath us kay khilaaf hoga. to bhee vah apnay tamaam bhaaiyon kay saamnay aabaad rahega.”

¹³rabb kay us kay saath baat karnay kay baad haajira nay us ka naam atta-el-roee yaanee ‘too ek maabood hai jo mujhay dekhta hai’ rakha. us nay kaha, “kya main nay vaaqaee us kay peechhay dekha hai jis nay mujhay dekha hai?” ¹⁴is liyay us jagah kay kuen ka naam ‘bair-lahee-roee’ yaanee ‘us zinda hastee ka kuaan jo mujhay dekhta hai’ pad gaya. vah qaadis aur barad kay darmiyaan vaaqay hai.

¹⁵haajira vaapas gaee, aur us kay beta paida hua. abraam nay us ka naam ismaaeel rakha. ¹⁶us vaqt abraam 86 saal ka tha.