Paidaaish 15

abraam kay saath rabb ka ahd

¹is kay baad rabb roya men abraam say hamkalaam hua, “abraam, mat dar. main hee teree sipar hoon, main hee tera bahut bada ajr hoon.”

²lekin abraam nay etiraaz kiya, “ai rabb qaadir-ay-mutlaq, too mujhay kya dega jabki abhee tak meray haan koee bachcha naheen hai aur ileeazar damishqee meree meeraas paaega. ³too nay mujhay aulaad naheen bakhshee, is liyay meray gharaanay ka naukar mera vaaris hoga.” ⁴tab abraam ko allaah say ek aur kalaam mila. “yah aadmee ileeazar tera vaaris naheen hoga balki tera apna hee beta tera vaaris hoga.” ⁵rabb nay usay baahar lay ja kar kaha, “aasmaan kee taraf dekh aur sitaaron ko ginnay kee koshish kar. teree aulaad itnee hee beshumaar hogee.”

⁶abraam nay rabb par bharosa rakha. is bina par allaah nay usay raastbaaz qaraar diya.

⁷phir rabb nay us say kaha, “main rabb hoon jo tujhay kasdiyon kay oor say yahaan lay aaya taaki tujhay yah mulk meeraas men day doon.” ⁸abraam nay poochha, “ai rabb qaadir-ay-mutlaq, main kis tarah jaanoonki is mulk par qabza karoonga?” ⁹javaab men rabb nay kaha, “meray huzoor ek teensaala gaay, ek teensaala bakree aur ek teensaala mendha lay a. ek qumree aur ek kabootar ka bachcha bhee lay aana.” ¹⁰abraam nay aisa hee kiya aur phir har ek jaanvar ko do hisson men kaat kar un ko ek doosray kay aamnay-saamnay rakh diya. lekin parindon ko us nay saalim rahenay diya. ¹¹shikaaree parinday un par utarnay lagay, lekin abraam unhen bhagaata raha.

¹²jab sooraj doobnay laga to abraam par gaheree neend taaree huee. us par dahshat aur andhera hee andhera chha gaya. ¹³phir rabb nay us say kaha, “jaan lay ki teree aulaad aisay mulk men rahegee jo us ka naheen hoga. vahaan vah ajnabee aur ghulaam hogee, aur us par 400 saal tak bahut zulm kiya jaaega. ¹⁴lekin main us qaum kee adaalat karoonga jis nay usay ghulaam banaaya hoga. is kay baad vah badee daulat pa kar us mulk say nikalengay. ¹⁵too khud umrraseeda ho kar salaamatee kay saath intiqaal karkay apnay baapdaada say ja milega aur dafnaaya jaaega. ¹⁶teree aulaad kee chauthee pusht ghairvatan say vaapas aaegee, kyoonki us vaqt tak main amoriyon ko bardaasht karoonga. lekin aakhirkaar un kay gunaah itnay sangeen ho jaaengay ki main unhen mulk-ay-kan’aan say nikaal doonga.”

¹⁷sooraj ghuroob hua. andhera chha gaya. achaanak ek dhuaandaar tanoor aur ek bhadaktee huee mash’al nazar aaee aur jaanvaron kay do do tukdon kay beech men say guzray.

¹⁸us vaqt rabb nay abraam kay saath ahd kiya. us nay kaha, “main yah mulk-ay-misr kee sarhadd say furaat tak teree aulaad ko doonga, ¹⁹agarchi abhee tak is men qeenee, qanizzee, kadmoonee, ²⁰hittee, farizzee, rafaaee, ²¹amoree, kan’aanee, jirjaasee aur yaboosee aabaad hain.”