Paidaaish 14

abraam loot ko chhudaata hai

¹kan’aan men jang huee. bairoon-ay-mulk kay chaar baadshaahon nay kan’aan kay paanch baadshaahon say jang kee. bairoon-ay-mulk kay baadshaah yah thay : sin’aar say amraafil, illaasar say aryook, ailaam say kidarlaaumar aur joim say tid’aal. ²kan’aan kay baadshaah yah thay : sadoom say bira, amoora say birsha, adma say sinyaab, zaboeem say shimebar aur baala yaanee zughar ka baadshaah.

³kan’aan kay in paanch baadshaahon ka ittihaad hua tha aur vah siddeem men jama huay thay. (ab siddeem naheen hai, kyoonki us kee jagah baheera-ay-murdaar a gaya hai). ⁴kidarlaaumar nay baarah saal tak un par hukoomat kee thee, lekin teraheven saal vah baaghee ho gaay thay.

⁵ab ek saal kay baad kidarlaaumar aur us kay ittihaadee apnee faujon kay saath aaay. pahelay unhon nay astaaraat-qarnaim men rafaaiyon ko, haam men zooziyon ko, savee-qiryataaim men aimiyon ko ⁶aur horiyon ko un kay pahaadee ilaaqay saeer men shikast dee. yoon vah el-faaraan tak pahunch gaay jo registaan kay kinaaray par hai. ⁷phir vah vaapas aaay aur ain-misfaat yaanee qaadis pahunchay. unhon nay amaaleeqiyon kay pooray ilaaqay ko tabaah kar diya aur hassoon-tamar men aabaad amoriyon ko bhee shikast dee.

⁸us vaqt sadoom, amoora, adma, zaboeem aur baala yaanee zughar kay baadshaah un say ladnay kay liyay siddeem kee vaadee men jama huay. ⁹in paanch baadshaahon nay ailaam kay baadshaah kidarlaaumar, joim kay baadshaah tid’aal, sin’aar kay baadshaah amraafil aur illaasar kay baadshaah aryook ka muqaabla kiya. ¹⁰is vaadee men taarkol kay mut’addid gadhay thay. jab baaghee baadshaah shikast kha kar bhaagnay lagay to sadoom aur amoora kay baadshaah in gadhon men gir gaay jabki baaqee teen baadshaah bach kar pahaadee ilaaqay men faraar huay. ¹¹fatahmand baadshaah sadoom aur amoora ka tamaam maal tamaam khaanay vaalee cheezon samet loot kar vaapas chal diay. ¹²abraam ka bhateeja loot sadoom men raheta tha, is liyay vah usay bhee us kee milkiyat samet chheen kar saath lay gaay.

¹³lekin ek aadmee nay jo bach nikla tha ibraanee mard abraam kay paas a kar usay sab kuchh bata diya. us vaqt vah mamray kay darakhton kay paas aabaad tha. mamray amoree tha. vah aur us kay bhaaee iskaal aur aaner abraam kay ittihaadee thay. ¹⁴jab abraam ko pata chala ki bhateejay ko giriftaar kar liya gaya hai to us nay apnay ghar men paida huay tamaam jang’aazmooda ghulaamon ko jama karkay daan tak dushman ka taaqqub kiya. us kay saath 318 afraad thay. ¹⁵vahaan us nay apnay bandon ko gurohon men taqseem karkay raat kay vaqt dushman par hamla kiya. dushman shikast kha kar bhaag gaya aur abraam nay damishq kay shimaal men vaaqay khooba tak us ka taaqqub kiya. ¹⁶vah un say loota hua tamaam maal vaapas lay aaya. loot, us kee jaaydaad, aurten aur baaqee qaidee bhee dushman kay qabzay say bach niklay.

malik-ay-sidq, saalim ka baadshaah

¹⁷jab abraam kidarlaaumar aur us kay ittihaadiyon par fatah paanay kay baad vaapas pahuncha to sadoom ka baadshaah us say milnay kay liyay vaadee-ay-savee men aaya. (isay aajkal baadshaah kee vaadee kaha jaata hai.) ¹⁸saalim ka baadshaah malik-ay-sidq bhee vahaan pahuncha. vah apnay saath rotee aur mai lay aaya. malik-ay-sidq allaah t’aala ka imaam tha. ¹⁹us nay abraam ko barkat day kar kaha, “abraam par allaah t’aala kee barkat ho, jo aasmaan-o-zameen ka khaaliq hai. ²⁰allaah t’aala mubaarak ho jis nay teray dushmanon ko teray haath men kar diya hai.” abraam nay usay tamaam maal ka dasvaan hissa diya.

²¹sadoom kay baadshaah nay abraam say kaha, “mujhay meray log vaapas kar den aur baaqee cheezen apnay paas rakh len.” ²²lekin abraam nay us say kaha, “main nay rabb say qasam khaaee hai, allaah t’aala say jo aasmaan-o-zameen ka khaaliq hai ²³ki main us men say kuchh naheen loonga jo aap ka hai, chaahay vah dhaaga ya jootee ka tasma hee kyoon na ho. aisa na ho ki aap kahen, ‘main nay abraam ko daulatmand bana diya hai.’ ²⁴siva-ay-us khaanay kay jo meray aadmiyon nay raastay men khaaya hai main kuchh qabool naheen karoonga. lekin meray ittihaadee aaner, iskaal aur mamray zaroor apna apna hissa len.”