Paidaaish 13

abraam aur loot alag ho jaatay hain

¹abraam apnee beevee, loot aur tamaam jaaydaad ko saath lay kar misr say nikla aur kan’aan kay junoobee ilaaqay dasht-ay-najab men vaapas aaya.

²abraam nihaayat daulatmand ho gaya tha. us kay paas bahut say maveshee aur sona-chaandee thee. ³vahaan say jagah-ba-jagah chaltay huay vah aakhirkaar bait-el say ho kar us maqaam tak pahunch gaya jahaan us nay shuroo men apna dera lagaaya tha aur jo bait-el aur aee kay darmiyaan tha. ⁴vahaan jahaan us nay qurbaangaah banaaee thee us nay rabb ka naam lay kar us kee ibaadat kee.

⁵loot kay paas bhee bahut see bhed-bakriyaan, gaay-bail aur khaimay thay. ⁶nateeja yah nikla ki aakhirkaar vah mil kar na rah sakay, kyoonki itnee jagah naheen thee ki donon kay revad ek hee jagah par char saken. ⁷abraam aur loot kay charvaahay aapas men jhagadnay lagay. (us zamaanay men kan’aanee aur farizzee bhee mulk men aabaad thay.) ⁸tab abraam nay loot say baat kee, “aisa naheen hona chaahiay ki teray aur meray darmiyaan jhagda ho ya teray charvaahon aur meray charvaahon kay darmiyaan. ham to bhaaee hain. ⁹kya zaroorat hai ki ham mil kar rahen jabki too aasaanee say is mulk kee kisee aur jagah rah sakta hai. behatar hai ki too mujh say alag ho kar kaheen aur rahay. agar too baaen haath jaaay to main daaen haath jaaoonga, aur agar too daaen haath jaaay to main baaen haath jaaoonga.”

¹⁰loot nay apnee nazar utha kar dekha ki darya-ay-yardan kay pooray ilaaqay men zughar tak paanee kee kasrat hai. vah rabb kay baagh ya mulk-ay-misr kee maanind tha, kyoonki us vaqt rabb nay sadoom aur amoora ko tabaah naheen kiya tha. ¹¹chunaanchay loot nay darya-ay-yardan kay pooray ilaaqay ko chun liya aur mashriq kee taraf ja basa. yoon donon rishtedaar ek doosray say juda ho gaay. ¹²abraam mulk-ay-kan’aan men raha jabki loot yardan kay ilaaqay kay shaheron kay darmiyaan aabaad ho gaya. vahaan us nay apnay khaimay sadoom kay qareeb laga diay. ¹³lekin sadoom kay baashinday nihaayat shareer thay, aur un kay rabb kay khilaaf gunaah nihaayat makrooh thay.

rabb ka abraam kay saath dubaara vaadaa

¹⁴loot abraam say juda hua to rabb nay abraam say kaha, “apnee nazar utha kar chaaron taraf yaanee shimaal, junoob, mashriq aur maghrib kee taraf dekh. ¹⁵jo bhee zameen tujhay nazar aaay usay main tujhay aur teree aulaad ko hamesha kay liyay deta hoon. ¹⁶main teree aulaad ko khaak kee tarah beshumaar honay doonga. jis tarah khaak kay zarray ginay naheen ja saktay usee tarah teree aulaad bhee ginee naheen ja sakegee. ¹⁷chunaanchay uth kar is mulk kee har jagah chal phir, kyoonki main isay tujhay deta hoon.”

¹⁸abraam ravaana hua. chaltay chaltay us nay apnay deray habroon kay qareeb mamray kay darakhton kay paas lagaaay. vahaan us nay rabb kee taazeem men qurbaangaah banaaee.