Paidaaish 12

abraam kee bulaahat

¹rabb nay abraam say kaha, “apnay vatan, apnay rishtedaaron aur apnay baap kay ghar ko chhodkar us mulk men chala ja jo main tujhay dikhaaoonga. ²main tujh say ek badee qaum banaaoonga, tujhay barkat doonga aur teray naam ko bahut badhaaoonga. too doosron kay liyay barkat ka baais hoga. ³jo tujhay barkat dengay unhen main bhee barkat doonga. jo tujh par laanat karega us par main bhee laanat karoonga. duniya kee tamaam qaumen tujh say barkat paaengee.”

⁴abraam nay rabb kee sunee aur haaraan say ravaana hua. loot us kay saath tha. us vaqt abraam 75 saal ka tha. ⁵us kay saath us kee beevee saaray aur us ka bhateeja loot thay. vah apnay naukar-chaakron samet apnee pooree milkiyat bhee saath lay gaya jo us nay haaraan men haasil kee thee. chaltay chaltay vah kan’aan pahunchay. ⁶abraam us mulk men say guzar kar sikam kay maqaam par thaher gaya jahaan morih kay baloot ka darakht tha. us zamaanay men mulk men kan’aanee qaumen aabaad theen.

⁷vahaan rabb abraam par zaahir hua aur us say kaha, “main teree aulaad ko yah mulk doonga.” is liyay us nay vahaan rabb kee taazeem men qurbaangaah banaaee jahaan vah us par zaahir hua tha. ⁸vahaan say vah us pahaadee ilaaqay kee taraf gaya jo bait-el kay mashriq men hai. vahaan us nay apna khaima lagaaya. maghrib men bait-el tha aur mashriq men aee. is jagah par bhee us nay rabb kee taazeem men qurbaangaah banaaee aur rabb ka naam lay kar ibaadat kee.

⁹phir abraam dubaara ravaana ho kar junoob kay dasht-ay-najab kee taraf chal pada.

abraam misr men

¹⁰un dinon men mulk-ay-kan’aan men kaal pada. kaal itna sakht tha ki abraam us say bachnay kee khaatir kuchh der kay liyay misr men ja basa, lekin pardesee kee haisiyat say. ¹¹jab vah misr kee sarhadd kay qareeb aaay to us nay apnee beevee saaray say kaha, “main jaanta hoon ki too kitnee khoobsoorat hai. ¹²misree tujhay dekhengay, phir kahengay, ‎‘yah is ka shauhar hai.’ nateejay men vah mujhay maar daalengay aur tujhay zinda chhodengay. ¹³is liyay logon say yah kahetay rahena ki main abraam kee bahen hoon. phir meray saath achchha sulook kiya jaaega aur meree jaan teray sabab say bach jaaegee.”

¹⁴jab abraam misr pahuncha to vaaqaee misriyon nay dekha ki saaray nihaayat hee khoobsoorat hai. ¹⁵aur jab firaaun kay afsaraan nay usay dekha to unhon nay firaaun kay saamnay saaray kee taareef kee. aakhirkaar usay mahel men pahunchaaya gaya. ¹⁶firaaun nay saaray kee khaatir abraam par ehsaan karkay usay bhed-bakriyaan, gaay-bail, gadhay-gadhiyaan, naukar-chaakar aur oont diay.

¹⁷lekin rabb nay saaray kay sabab say firaaun aur us kay gharaanay men sakht qism kay amraaz phailaaay. ¹⁸aakhirkaar firaaun nay abraam ko bula kar kaha, “too nay meray saath kya kiya? too nay mujhay kyoon naheen bataaya ki saaray teree beevee hai? ¹⁹too nay kyoon kaha ki vah meree bahen hai? is dhokay kee bina par main nay usay ghar men rakh liya taaki us say shaadee karoon. dekh, teree beevee haazir hai. isay lay kar yahaan say nikal ja!” ²⁰phir firaaun nay apnay sipaahiyon ko hukm diya, aur unhon nay abraam, us kee beevee aur pooree milkiyat ko rukhsat karkay mulk say ravaana kar diya.