Paidaaish 11
baabal ka burj
1us vaqt tak pooree duniya kay log ek hee zabaan boltay thay. 2mashriq kee taraf badhtay badhtay vah sin’aar kay ek maidaan men pahunch kar vahaan aabaad huay. 3tab vah ek doosray say kahenay lagay, “aao, ham mittee say eenten bana kar unhen aag men khoob pakaaen.” unhon nay taameeree kaam kay liyay patthar kee jagah eenten aur masaalay kee jagah taarkol istemaal kiya. 4phir vah kahenay lagay, “aao, ham apnay liyay shaher bana len jis men aisa burj ho jo aasmaan tak pahunch jaaay phir hamaara naam qaaim rahega aur ham roo-ay-zameen par bikhar jaanay say bach jaaengay.”
5lekin rabb us shaher aur burj ko dekhnay kay liyay utar aaya jisay log bana rahay thay. 6rabb nay kaha, “yah log ek hee qaum hain aur ek hee zabaan boltay hain. aur yah sirf us ka aaghaaz hai jo vah karna chaahatay hain. ab say jo bhee vah mil kar karna chaahengay us say unhen roka naheen ja sakega. 7is liyay aao, ham duniya men utar kar un kee zabaan ko darham-barham kar den taaki vah ek doosray kee baat samajh na paaen.”
8is tareeqay say rabb nay unhen tamaam roo-ay-zameen par muntashir kar diya, aur shaher kee taameer ruk gaee. 9is liyay shaher ka naam baabal yaanee abtaree thahera, kyoonki rabb nay vahaan tamaam logon kee zabaan ko darham-barham karkay unhen tamaam roo-ay-zameen par muntashir kar diya.
sim say abraam tak ka nasabnaamaa
10yah sim ka nasabnaama hai :
sim 100 saal ka tha jab us ka beta arfaksad paida hua. yah sailaab kay do saal baad hua. 11is kay baad vah mazeed 500 saal zinda raha. us kay aur betay-betiyaan bhee paida huay.
12arfaksad 35 saal ka tha jab silah paida hua. 13is kay baad vah mazeed 403 saal zinda raha. us kay aur betay-betiyaan bhee paida huay.
14silah 30 saal ka tha jab ibar paida hua. 15is kay baad vah mazeed 403 saal zinda raha. us kay aur betay-betiyaan bhee paida huay.
16ibar 34 saal ka tha jab falaj paida hua. 17is kay baad vah mazeed 430 saal zinda raha. us kay aur betay-betiyaan bhee paida huay.
18falaj 30 saal ka tha jab raoo paida hua. 19is kay baad vah mazeed 209 saal zinda raha. us kay aur betay-betiyaan bhee paida huay.
20raoo 32 saal ka tha jab sarooj paida hua. 21is kay baad vah mazeed 207 saal zinda raha. us kay aur betay-betiyaan bhee paida huay.
22sarooj 30 saal ka tha jab nahoor paida hua. 23is kay baad vah mazeed 200 saal zinda raha. us kay aur betay-betiyaan bhee paida huay.
24nahoor 29 saal ka tha jab taarah paida hua. 25is kay baad vah mazeed 119 saal zinda raha. us kay aur betay-betiyaan bhee paida huay.
26taarah 70 saal ka tha jab us kay betay abraam, nahoor aur haaraan paida huay.
27yah taarah ka nasabnaama hai : abraam, nahoor aur haaraan taarah kay betay thay. loot haaraan ka beta tha. 28apnay baap taarah kee zindagee men hee haaraan kasdiyon kay oor men intiqaal kar gaya jahaan vah paida bhee hua tha.
29baaqee donon beton kee shaadee huee. abraam kee beevee ka naam saaray tha aur nahoor kee beevee ka naam milkaah. milkaah haaraan kee betee thee, aur us kee ek bahen banaam iska thee. 30saaray baanjh thee, is liyay us kay bachchay naheen thay.
31taarah kasdiyon kay oor say ravaana ho kar mulk-ay-kan’aan kee taraf safar karnay laga. us kay saath us ka beta abraam, us ka pota loot yaanee haaraan ka beta aur us kee bahoo saaray thay. jab vah haaraan pahunchay to vahaan aabaad ho gaay. 32taarah 205 saal ka tha jab us nay haaraan men vafaat paaee.