Galaatiyon 6
ek doosray kay bojh uthaanaa
1bhaaiyo, agar koee kisee gunaah men phans jaaay to aap jo ruhaanee hain usay narmdilee say bahaal karen. lekin apna bhee khayaal rakhen, aisa na ho ki aap bhee aazmaaish men phans jaaen. 2bojh uthaanay men ek doosray kee madad karen, kyoonki is tarah aap maseeh kee shareeat pooree karengay. 3jo samajhta hai ki main kuchh hoon agarchi vah haqeeqat men kuchh bhee naheen hai to vah apnay aap ko fareb day raha hai. 4har ek apna zaatee amal parkhay. phir hee usay apnay aap par fakhar ka mauqa hoga aur usay kisee doosray say apna muvaazna karnay kee zaroorat na hogee. 5kyoonki har ek ko apna zaatee bojh uthaana hota hai.
6jisay kalaam-ay-muqaddas kee taaleem dee jaatee hai us ka farz hai ki vah apnay ustaad ko apnee tamaam achchhee cheezon men shareek karay.
7fareb mat khaana, allaah insaan ko apna mazaaq udaanay naheen deta. jo kuchh bhee insaan bota hai usee kee fasal vah kaatega. 8jo apnee puraanee fitrat kay khet men beej boay vah halaakat kee fasal kaatega. aur jo rooh-ul-quds kay khet men beej boay vah abdee zindagee kee fasal kaatega. 9chunaanchay ham nek kaam karnay men bedil na ho jaaen, kyoonki ham muqarrara vaqt par zaroor fasal kee kataaee karengay. shart sirf yah hai ki ham hathiyaar na daalen. 10is liyay aaen, jitna vaqt rah gaya hai sab kay saath nekee karen, khaaskar un kay saath jo eemaan men hamaaray bhaaee aur bahenen hain.
aakhiree aagaahee aur salaam
11dekhen, main baday baday huroof kay saath apnay haath say aap ko likh raha hoon. 12yah log jo duniya kay saamnay izzat haasil karna chaahatay hain aap ko khatna karvaanay par majboor karna chaahatay hain. maqsad un ka sirf ek hee hai, ki vah us eezaarasaanee say bachay rahen jo tab paida hotee hai jab ham maseeh kee saleebee maut kee taaleem detay hain. 13baat yah hai ki jo apna khatna karaatay hain vah khud shareeat kee pairvee naheen kartay. to bhee yah chaahatay hain ki aap apna khatna karvaaen taaki aap kay jism kee haalat par vah fakhar kar saken. 14lekin khuda karay ki main sirf hamaaray khudaavand eesa maseeh kee saleeb hee par fakhar karoon. kyoonki us kee saleeb say duniya meray liyay masloob huee hai aur main duniya kay liyay. 15khatna karvaanay ya na karvaanay say koee farq naheen padta balki farq us vaqt padta hai jab allaah kisee ko naay siray say khalaq karta hai. 16jo bhee is usool par amal kartay hain unhen salaamatee aur rahem haasil hota rahay, unhen bhee aur allaah kee qaum israaeel ko bhee.
17aainda koee mujhay takleef na day, kyoonki meray jism par zakhmon kay nishaan zaahir kartay hain ki main eesa ka ghulaam hoon.
18bhaaiyo, hamaaray khudaavand eesa maseeh ka fazl aap kee rooh kay saath hota rahay. aameen.