Galaatiyon 5

apnee aazaadee mahfooz rakhen

¹maseeh nay hamen aazaad rahenay kay liyay hee aazaad kiya hai. to ab qaaim rahen aur dubaara apnay galay men ghulaamee ka jooa daalnay na den.

²sunen! main paulus aap ko bataata hoon ki agar aap apna khatna karvaaen to aap ko maseeh ka koee faaida naheen hoga. ³main ek baar phir is baat kee tasdeeq karta hoon ki jis nay bhee apna khatna karvaaya us ka farz hai ki vah pooree shareeat kee pairvee karay. ⁴aap jo shareeat kee pairvee karnay say raastbaaz banna chaahatay hain aap ka maseeh kay saath koee vaasta na raha. haan, aap allaah kay fazl say door ho gaay hain. ⁵lekin hamen ek farq ummeed dilaaee gaee hai. ummeed yah hai ki khuda hee hamen raastbaaz qaraar deta hai. chunaanchay ham rooh-ul-quds kay baais eemaan rakh kar isee raastbaazee kay liyay tadaptay rahetay hain. ⁶kyoonki jab ham maseeh eesa men hotay hain to khatna karvaanay ya na karvaanay say koee farq naheen padta. farq sirf us eemaan say padta hai jo muhabbat karnay say zaahir hota hai.

⁷aap eemaan kee daud men achchhee taraqqee kar rahay thay! to phir kis nay aap ko sachchaaee kee pairvee karnay say rok liya? ⁸kis nay aap ko ubhaara? allaah to naheen tha jo aap ko bulaata hai. ⁹dekhen, thoda sa khameer tamaam gundhay huay aatay ko khameer kar deta hai. ¹⁰mujhay khudaavand men aap par itna etimaad hai ki aap yahee soch rakhtay hain. jo bhee aap men afra-tafree paida kar raha hai usay saza milegee.

¹¹bhaaiyo, jahaan tak mera taalluq hai, agar main yah paighaam deta ki ab tak khatna karvaanay kee zaroorat hai to meree eezaarasaanee kyoon ho rahee hotee? agar aisa hota to log maseeh kay masloob honay kay baaray men sun kar thokar na khaatay. ¹²behatar hai ki aap ko pareshaan karnay vaalay na sirf apna khatna karvaaen balki khojay ban jaaen.

¹³bhaaiyo, aap ko aazaad honay kay liyay bulaaya gaya hai. lekin khabardaar rahen ki is aazaadee say aap kee gunaah’aalooda fitrat ko amal men aanay ka mauqa na milay. is kay bajaay muhabbat kee rooh men ek doosray kee khidmat karen. ¹⁴kyoonki pooree shareeat ek hee hukm men samaaee huee hai, “apnay padosee say vaisee muhabbat rakhna jaisee too apnay aap say rakhta hai.” ¹⁵agar aap ek doosray ko kaattay aur phaadtay hain to khabardaar! aisa na ho ki aap ek doosray ko khatm karkay sab kay sab tabaah ho jaaen.

rooh-ul-quds aur insaanee fitrat

¹⁶main to yah kaheta hoon ki rooh-ul-quds men zindagee guzaaren. phir aap apnee puraanee fitrat kee khwaahishaat pooree naheen karengay. ¹⁷kyoonki jo kuchh hamaaree puraanee fitrat chaahatee hai vah us kay khilaaf hai jo rooh chaahata hai, aur jo kuchh rooh chaahata hai vah us kay khilaaf hai jo hamaaree puraanee fitrat chaahatee hai. yah donon ek doosray kay dushman hain, is liyay aap vah kuchh naheen kar paatay jo aap karna chaahatay hain. ¹⁸lekin jab rooh-ul-quds aap kee raahanumaaee karta hai to aap shareeat kay taabay naheen hotay.

¹⁹jo kaam puraanee fitrat kartee hai vah saaf zaahir hota hai. maslan zinaakaaree, naapaakee, ayyaashee, ²⁰butparastee, jaadoogree, dushmanee, jhagda, hasad, ghussa, khudgharzee, anban, paarteebaazee, ²¹jalan, nashaabaazee, rangraliyaan vaghaira. main pahelay bhee aap ko aagaah kar chuka hoon, lekin ab ek baar phir kaheta hoon ki jo is tarah kee zindagee guzaartay hain vah allaah kee baadshaahee meeraas men naheen paaengay.

²²rooh-ul-quds ka phal farq hai. vah muhabbat, khushee, sulah-salaamatee, sabr, meharbaanee, nekee, vafaadaaree, ²³narmee aur zabt-ay-nafs paida karta hai. shareeat aisee cheezon kay khilaaf naheen hotee. ²⁴aur jo maseeh eesa kay hain unhon nay apnee puraanee fitrat ko us kee raghbaton aur buree khwaahishon samet masloob kar diya hai. ²⁵choonki ham rooh men zindagee guzaartay hain is liyay aaen, ham qadam-ba-qadam us kay mutaabiq chaltay bhee rahen. ²⁶na ham maghroor hoon, na ek doosray ko mushtail karen ya ek doosray say hasad karen.