Galaatiyon 4
1dekhen, jo beta apnay baap kee milkiyat ka vaaris hai vah us vaqt tak ghulaamon say farq naheen jab tak vah baaligh na ho, haalaanki vah pooree milkiyat ka maalik hai. 2baap kee taraf say muqarrar kee huee umr tak doosray us kee dekh-bhaal kartay aur us kee milkiyat sambhaaltay hain. 3isee tarah ham bhee jab bachchay thay duniya kee kuvvaton kay ghulaam thay. 4lekin jab muqarrara vaqt a gaya to allaah nay apnay farzand ko bhej diya. ek aurat say paida ho kar vah shareeat kay taabay huaa 5taaki fidya day kar hamen jo shareeat kay taabay thay aazaad kar day. yoon hamen allaah kay farzand honay ka martaba mila hai.
6ab choonki aap us kay farzand hain is liyay allaah nay apnay farzand kay rooh ko hamaaray dilon men bhej diya, vah rooh jo “abba” yaanee “ai baap” kah kar pukaarta raheta hai. 7gharaz ab aap ghulaam na rahay balki betay kee haisiyat rakhtay hain. aur beta honay ka yah matlab hai ki allaah nay aap ko vaaris bhee bana diya hai.
paulus kee galtiyon kay liyay fikr
8maazee men jab aap allaah ko naheen jaantay thay to aap un kay ghulaam thay jo haqeeqat men khuda naheen hain. 9lekin ab aap allaah ko jaantay hain, balki ab allaah nay aap ko jaan liya hai. to phir aap mud kar in kamzor aur ghatiya usoolon kee taraf kyoon vaapas jaanay lagay hain? kya aap dubaara in kee ghulaamee men aana chaahatay hain? 10aap badee fikrmandee say khaas din, maah, mausam aur saal manaatay hain. 11mujhay aap kay baaray men dar hai, kaheen meree aap par mehanat-mashaqqat zaaay na jaaay.
12bhaaiyo, main aap say iltija karta hoon ki meree maanind ban jaaen, kyoonki main to aap kee maanind ban gaya hoon. aap nay meray saath koee ghalat sulook naheen kiya. 13aap ko maaloom hai ki jab main nay pahelee dafa aap ko allaah kee khushkhabaree sunaaee to is kee vajah meray jism kee kamzor haalat thee. 14lekin agarchi meree yah haalat aap kay liyay aazmaaish ka baais thee to bhee aap nay mujhay haqeer na jaana, na mujhay neech samjha, balki aap nay mujhay yoon khush’aamadeed kaha jaisa ki main allaah ka koee farishta ya maseeh eesa khud hoon. 15us vaqt aap itnay khush thay! ab kya hua hai? main gavaah hoon, us vaqt agar aap ko mauqa milta to aap apnee aankhen nikaal kar mujhay day detay. 16to kya ab main aap ko haqeeqat bataanay kee vajah say aap ka dushman ban gaya hoon?
17vah doosray log aap kee dostee paanay kee pooree jidd-o-jahd kar rahay hain, lekin un kee neeyat saaf naheen hai. bas vah aap ko mujh say juda karna chaahatay hain taaki aap un hee kay haq men jidd-o-jahd kartay rahen. 18jab log aap kee dostee paanay kee jidd-o-jahd kartay hain to yah hai to theek, lekin is ka maqsad achchha hona chaahiay. haan, saheeh jidd-o-jahd har vaqt achchhee hotee hai, na sirf is vaqt jab main aap kay darmiyaan hoon. 19meray piyaaray bachcho! ab main dubaara aap ko janm denay ka sa dard mahsoos kar raha hoon aur us vaqt tak karta rahoonga jab tak maseeh aap men soorat na pakday. 20kaash main us vaqt aap kay paas hota taaki farq andaaz men aap say baat kar sakta, kyoonki main aap kay sabab say badee uljhan men hoon!
haajira aur saara kee misaal
21aap jo shareeat kay taabay rahena chaahatay hain mujhay ek baat bataaen, kya aap vah baat naheen suntay jo shareeat kahetee hai? 22vah kahetee hai ki ibraaheem kay do betay thay. ek laundee ka beta tha, ek aazaad aurat ka. 23laundee kay betay kee paidaaish hasab-ay-maamool thee, lekin aazaad aurat kay betay kee paidaaish ghairmaamoolee thee, kyoonki us men allaah ka vaada poora hua. 24jab yah kinaayatan samjha jaaay to yah do khavaateen allaah kay do ahdon kee numaaindagee kartee hain. pahelee khaatoon haajira seena pahaad par bandhay huay ahd kee numaaindagee kartee hai, aur jo bachchay us say paida hotay hain vah ghulaamee kay liyay muqarrar hain. 25haajira jo arab men vaaqay pahaad seena kee alaamat hai maujooda shaher yarooshalam say mutaabiqat rakhtee hai. vah aur us kay tamaam bachchay ghulaamee men zindagee guzaartay hain. 26lekin aasmaanee yarooshalam aazaad hai aur vahee hamaaree maan hai. 27kyoonki kalaam-ay-muqaddas men likha hai,
“khush ho ja, too jo beaulaad hai,
jo bachchay ko janm hee naheen day saktee.
buland aavaaz say shaadiyaana baja,
too jisay paidaaish ka dard na hua.
kyoonki ab tark kee huee aurat kay bachche
shaadeeshuda aurat kay bachchon say ziyaada hain.”
28bhaaiyo, aap ishaaq kee tarah allaah kay vaaday kay farzand hain. 29us vaqt ismaaeel nay jo hasab-ay-maamool paida hua tha ishaaq ko sataaya jo rooh-ul-quds kee qudrat say paida hua tha. aaj bhee aisa hee hai. 30lekin kalaam-ay-muqaddas men kya farmaaya gaya hai? “is laundee aur is kay betay ko ghar say nikaal den, kyoonki vah aazaad aurat kay betay kay saath virsa naheen paaega.” 31gharaz bhaaiyo, ham laundee kay farzand naheen hain balki aazaad aurat kay.