Galaatiyon 3
shareeat ya eemaan
1naasamajh galtiyo! kis nay aap par jaadoo kar diya? aap kee aankhon kay saamnay hee eesa maseeh aur us kee saleebee maut ko saaf saaf pesh kiya gaya. 2mujhay ek baat bataaen, kya aap ko shareeat kee pairvee karnay say rooh-ul-quds mila? hargiz naheen! vah aap ko us vaqt mila jab aap maseeh kay baaray men paighaam sun kar us par eemaan laaay. 3kya aap itnay besamajh hain? aap kee ruhaanee zindagee rooh-ul-quds kay vaseelay say shuroo huee. to ab aap yah kaam apnee insaanee koshishon say kis tarah takmeel tak pahunchaana chaahatay hain? 4aap ko kaee tarah kay tajribay haasil huay hain. kya yah sab befaaida thay? yaqeenan yah befaaida naheen thay. 5kya allaah is liyay aap ko apna rooh deta aur aap kay darmiyaan mojizay karta hai ki aap shareeat kee pairvee kartay hain? hargiz naheen, balki is liyay ki aap maseeh kay baaray men paighaam sun kar eemaan laaay hain.
6ibraaheem kee misaal len. us nay allaah par bharosa kiya aur is bina par allaah nay usay raastbaaz qaraar diya. 7to phir aap ko jaan lena chaahiay ki ibraaheem kee haqeeqee aulaad vah log hain jo eemaan rakhtay hain. 8kalaam-ay-muqaddas nay is baat kee peshgoee kee ki allaah ghairyahoodiyon ko eemaan kay zareeay raastbaaz qaraar dega. yoon us nay ibraaheem ko yah khushkhabaree sunaaee, “tamaam qaumen tujh say barkat paaengee.” 9ibraaheem eemaan laaya, is liyay usay barkat milee. isee tarah sab ko eemaan laanay par ibraaheem kee see barkat miltee hai.
10lekin jo bhee is par takiya kartay hain ki hamen shareeat kee pairvee karnay say raastbaaz qaraar diya jaaega un par allaah kee laanat hai. kyoonki kalaam-ay-muqaddas farmaata hai, “har ek par laanat jo shareeat kee kitaab kee tamaam baaten qaaim na rakhay, na in par amal karay.” 11yah baat to saaf hai ki allaah kisee ko bhee shareeat kee pairvee karnay kee bina par raastbaaz naheen thaheraata, kyoonki kalaam-ay-muqaddas kay mutaabiq raastbaaz eemaan hee say jeeta rahega. 12eemaan kee yah raah shareeat kee raah say bilkul farq hai jo kahetee hai, “jo yoon karega vah jeeta rahega.”
13lekin maseeh nay hamaara fidya day kar hamen shareeat kee laanat say aazaad kar diya hai. yah us nay is tarah kiya ki vah hamaaree khaatir khud laanat bana. kyoonki kalaam-ay-muqaddas men likha hai, “jisay bhee darakht say latkaaya gaya hai us par allaah kee laanat hai.” 14is ka maqsad yah tha ki jo barkat ibraaheem ko haasil huee vah maseeh kay vaseelay say ghairyahoodiyon ko bhee milay aur yoon ham eemaan la kar vaada kiya hua rooh paaen.
shareeat aur vaadaa
15bhaaiyo, insaanee zindagee kee ek misaal len. jab do paartiyaan kisee muaamalay men muttafiq ho kar muaahada kartee hain to koee is muaahaday ko mansookh ya is men izaafa naheen kar sakta. 16ab ghaur karen ki allaah nay apnay vaaday ibraaheem aur us kee aulaad say hee kiay. lekin jo lafz ibraanee men aulaad kay liyay istemaal hua hai is say muraad bahut say afraad naheen balki ek fard hai aur vah hai maseeh. 17kahenay say muraad yah hai ki allaah nay ibraaheem say ahd baandh kar usay qaaim rakhnay ka vaada kiya. shareeat jo 430 saal kay baad dee gaee is ahd ko radd karkay allaah ka vaada mansookh naheen kar saktee. 18kyoonki agar ibraaheem kee meeraas shareeat kee pairvee karnay say miltee to phir vah allaah kay vaaday par munhasir na hotee. lekin aisa naheen tha. allaah nay isay apnay vaaday kee bina par ibraaheem ko day diya.
19to phir shareeat ka kya maqsad tha? usay is liyay vaaday kay ilaava diya gaya taaki logon kay gunaahon ko zaahir karay. aur usay us vaqt tak qaaim rahena tha jab tak ibraaheem kee vah aulaad na a jaatee jis say vaada kiya gaya tha. allaah nay apnee shareeat farishton kay vaseelay say moosa ko day dee jo allaah aur logon kay beech men darmiyaanee raha. 20ab darmiyaanee us vaqt zarooree hota hai jab ek say ziyaada paartiyon men ittifaaq karaanay kee zaroorat hai. lekin allaah jo ek hee hai us nay darmiyaanee istemaal na kiya jab us nay ibraaheem say vaada kiya.
shareeat ka maqsad
21to kya is ka matlab yah hai ki shareeat allaah kay vaadon kay khilaaf hai? hargiz naheen! agar insaan ko aisee shareeat milee hotee jo zindagee dila saktee to phir sab us kee pairvee karnay say raastbaaz thahertay. 22lekin kalaam-ay-muqaddas farmaata hai ki pooree duniya gunaah kay qabzay men hai. chunaanchay hamen allaah ka vaada sirf eesa maseeh par eemaan laanay say haasil hota hai.
23is say pahelay ki eemaan kee yah raah dastayaab huee shareeat nay hamen qaid karkay mahfooz rakha tha. is qaid men ham us vaqt tak rahay jab tak eemaan kee raah zaahir naheen huee thee. 24yoon shareeat ko hamaaree tarbiyat karnay kee zimmaadaaree dee gaee. usay hamen maseeh tak pahunchaana tha taaki hamen eemaan say raastbaaz qaraar diya jaaay. 25ab choonki eemaan kee raah a gaee hai is liyay ham shareeat kee tarbiyat kay tahet naheen rahay.
26kyoonki maseeh eesa par eemaan laanay say aap sab allaah kay farzand ban gaay hain. 27aap men say jitnon ko maseeh men baptisma diya gaya unhon nay maseeh ko pahen liya. 28ab na yahoodee raha na ghairyahoodee, na ghulaam raha na aazaad, na mard raha na aurat. maseeh eesa men aap sab kay sab ek hain. 29shart yah hai ki aap maseeh kay hon. tab aap ibraaheem kee aulaad aur un cheezon kay vaaris hain jin ka vaada allaah nay kiya hai.