Galaatiyon 2

paulus aur deegar rasool

¹chaudah saal kay baad main dubaara yarooshalam gaya. is dafa barnabaas saath tha. main titus ko bhee saath lay kar gaya. ²main ek mukaashfay kee vajah say gaya jo allaah nay mujh par zaahir kiya tha. meree alaahidagee men un kay saath meeting huee jo asar-o-rasookh rakhtay hain. is men main nay unhen vah khushkhabaree pesh kee jo main ghairyahoodiyon ko sunaata hoon. main naheen chaahata tha ki jo daud main daud raha hoon ya maazee men dauda tha vah aakhirkaar befaaida niklay. ³us vaqt vah yahaan tak meray haq men thay ki unhon nay titus ko bhee apna khatna karvaanay par majboor naheen kiya, agarchi vah ghairyahoodee hai. ⁴aur chand yahee chaahatay thay. lekin yah jhootay bhaaee thay jo chupkay say andar ghus aaay thay taaki jaasoos ban kar hamaaree us aazaadee kay baaray men maaloomaat haasil kar len jo hamen maseeh men milee hai. yah hamen ghulaam banaana chaahatay thay, ⁵lekin ham nay lamha bhar un kee baat na maanee aur na un kay taabay huay taaki allaah kee khushkhabaree kee sachchaaee aap kay darmiyaan qaaim rahay.

⁶aur jo raahanuma samjhay jaatay thay unhon nay meree baat men koee izaafa na kiya. (asal men mujhay koee parva naheen ki un ka asar-o-rasookh tha ki naheen. allaah to insaan kee zaahiree haalat ka lihaaz naheen karta.) ⁷ba-har-haal unhon nay dekha ki allaah nay mujhay ghairyahoodiyon ko maseeh kee khushkhabaree sunaanay kee zimmaadaaree dee thee, bilkul usee tarah jis tarah us nay patras ko yahoodiyon ko yah paighaam sunaanay kee zimmaadaaree dee thee. ⁸kyoonki jo kaam allaah yahoodiyon kay rasool patras kee khidmat kay vaseelay say kar raha tha vahee kaam vah meray vaseelay say bhee kar raha tha, jo ghairyahoodiyon ka rasool hoon. ⁹yaaqoob, patras aur yoohanna ko jamaaat kay satoon maana jaata tha. jab unhon nay pahechaan liya ki allaah nay is naatay say mujhay khaas fazl diya hai to unhon nay mujh say aur barnabaas say dahena haath mila kar is ka izhaar kiya ki vah hamaaray saath hain. yoon ham muttafiq huay ki barnabaas aur main ghairyahoodiyon men khidmat karengay aur vah yahoodiyon men. ¹⁰unhon nay sirf ek baat par zor diya ki ham zarooratmandon ko yaad rakhen, vahee baat jisay main hamesha karnay kay liyay koshaan raha hoon.

antaakiya men paulus patras ko malaamat karta hai

¹¹lekin jab patras antaakiya shaher aaya to main nay roo-ba-roo us kee mukhaalafat kee, kyoonki vah apnay ravayyay kay sabab say mujrim thahera. ¹²jab vah aaya to pahelay vah ghairyahoodee eemaandaaron kay saath khaana khaata raha. lekin phir yaaqoob kay kuchh azeez aaay. usee vaqt patras peechhay hat kar ghairyahoodiyon say alag hua, kyoonki vah un say darta tha jo ghairyahoodiyon ka khatna karvaanay kay haq men thay. ¹³baaqee yahoodee bhee is riyaakaaree men shaamil huay, yahaan tak ki barnabaas ko bhee un kee riyaakaaree say bahekaaya gaya. ¹⁴jab main nay dekha ki vah us seedhee raah par naheen chal rahay hain jo allaah kee khushkhabaree kee sachchaaee par mabnee hai to main nay sab kay saamnay patras say kaha, “aap yahoodee hain. lekin aap ghairyahoodee kee tarah zindagee guzaar rahay hain, yahoodee kee tarah naheen. to phir yah kaisee baat hai ki aap ghairyahoodiyon ko yahoodee rivaayaat kee pairvee karnay par majboor kar rahay hain?”

yahoodee aur ghairyahoodee eemaan say najaat paatay hain

¹⁵beshak ham paidaaishee yahoodee hain aur ‘ghairyahoodee gunaahgaar’ naheen hain. ¹⁶lekin ham jaantay hain ki insaan ko shareeat kee pairvee karnay say raastbaaz naheen thaheraaya jaata balki eesa maseeh par eemaan laanay say. ham bhee maseeh eesa par eemaan laaay hain taaki hamen raastbaaz qaraar diya jaaay, shareeat kee pairvee karnay say naheen balki maseeh par eemaan laanay say. kyoonki shareeat kee pairvee karnay say kisee ko bhee raastbaaz qaraar naheen diya jaaega. ¹⁷lekin agar maseeh men raastbaaz thahernay kee koshish kartay kartay ham khud gunaahgaar saabit ho jaaen to kya is ka matlab yah hai ki maseeh gunaah ka khaadim hai? hargiz naheen! ¹⁸agar main shareeat kay us nizaam ko dubaara taameer karoon jo main nay dha diya to phir main zaahir karta hoon ki main mujrim hoon. ¹⁹kyoonki jahaan tak shareeat ka taalluq hai main murda hoon. mujhay shareeat hee say maara gaya hai taaki allaah kay liyay jee sakoon. mujhay maseeh kay saath masloob kiya gayaa ²⁰aur yoon main khud zinda na raha balki maseeh mujh men zinda hai. ab jo zindagee main is jism men guzaarta hoon vah allaah kay farzand par eemaan laanay say guzaarta hoon. usee nay mujh say muhabbat rakh kar meray liyay apnee jaan dee. ²¹main allaah ka fazl radd karnay say inkaar karta hoon. kyoonki agar kisee ko shareeat kee pairvee karnay say raastbaaz thaheraaya ja sakta to is ka matlab yah hota ki maseeh ka marna abas tha.