Galaatiyon 1

¹yah khat paulus rasool kee taraf say hai. mujhay na kisee guroh nay muqarrar kiya na kisee shakhs nay balki eesa maseeh aur khuda baap nay jis nay usay murdon men say zinda kar diya. ²tamaam bhaaee bhee jo meray saath hain galtiya kee jamaaaton ko salaam kahetay hain.

³khuda hamaara baap aur khudaavand eesa maseeh aap ko fazl aur salaamatee ata karen.

⁴maseeh vahee hai jis nay apnay aap ko hamaaray gunaahon kee khaatir qurbaan kar diya aur yoon hamen is maujooda shareer jahaan say bacha liya hai, kyoonki yah allaah hamaaray baap kee marzee thee. ⁵usee ka jalaal abad tak hota rahay! aameen.

ek hee khushkhabaree

⁶main hairaan hoon! aap itnee jaldee say usay tark kar rahay hain jis nay maseeh kay fazl say aap ko bulaaya. aur ab aap ek farq qism kee “khushkhabaree” kay peechhay lag gaay hain. ⁷asal men yah allaah kee khushkhabaree hai naheen. bas kuchh log aap ko uljhan men daal kar maseeh kee khushkhabaree men tabdeelee laana chaahatay hain. ⁸ham nay to aslee khushkhabaree sunaaee aur jo is say farq paighaam sunaata hai us par laanat, khwaah ham khud aisa karen khwaah aasmaan say koee farishta utar kar yah ghalat paighaam sunaaay. ⁹ham yah pahelay bayaan kar chukay hain aur ab main dubaara kaheta hoon ki agar koee aap ko aisee “khushkhabaree” sunaaay jo us say farq hai jisay aap nay qabool kiya hai to us par laanat!

¹⁰kya main is men yah koshish kar raha hoon ki log mujhay qabool karen? hargiz naheen! main chaahata hoon ki allaah mujhay qabool karay. kya meree koshish yah hai ki main logon ko pasand aaoon? agar main ab tak aisa karta to maseeh ka khaadim na hota.

paulus kis tarah rasool ban gayaa

¹¹bhaaiyo, main chaahata hoon ki aap jaan len ki jo khushkhabaree main nay sunaaee vah insaan kee taraf say naheen hai. ¹²na mujhay yah paighaam kisee insaan say mila, na yah mujhay kisee nay sikhaaya hai balki eesa maseeh nay khud mujh par yah paighaam zaahir kiya.

¹³aap nay to khud sun liya hai ki main us vaqt kis tarah zindagee guzaarta tha jab yahoodee mazhab ka pairokaar tha. us vaqt main nay kitnay josh aur shiddat say allaah kee jamaaat ko eeza pahunchaaee. meree pooree koshish yah thee ki yah jamaaat khatm ho jaaay. ¹⁴yahoodee mazhab kay lihaaz say main aksar deegar hamumr yahoodiyon par sabqat lay gaya tha. haan, main apnay baapdaada kee rivaayaton kee pairvee men hadd say ziyaada sargarm tha.

¹⁵lekin allaah nay apnay fazl say mujhay paida honay say peshtar hee chun kar apnee khidmat karnay kay liyay bulaaya. aur jab us nay apnee marzee se ¹⁶apnay farzand ko mujh par zaahir kiya taaki main us kay baaray men ghairyahoodiyon ko khushkhabaree sunaaoon to main nay kisee bhee shakhs say mashvra na liya. ¹⁷us vaqt main yarooshalam bhee na gaya taaki un say miloon jo mujh say pahelay rasool thay balki main seedha arab chala gaya aur baad men damishq vaapas aaya. ¹⁸is kay teen saal baad hee main patras say shanaasa honay kay liyay yarooshalam gaya. vahaan main pandrah din us kay saath raha. ¹⁹is kay ilaava main nay sirf khudaavand kay bhaaee yaaqoob ko dekha, kisee aur rasool ko naheen.

²⁰jo kuchh main likh raha hoon allaah gavaah hai ki vah saheeh hai. main jhoot naheen bol raha.

²¹baad men main mulk-ay-shaam aur kilikiya chala gaya. ²²us vaqt sooba yahoodiya men maseeh kee jamaaaten mujhay naheen jaantee theen. ²³un tak sirf yah khabar pahunchee thee ki jo aadmee pahelay hamen eeza pahuncha raha tha vah ab khud us eemaan kee khushkhabaree sunaata hai jisay vah pahelay khatm karna chaahata tha. ²⁴yah sun kar unhon nay meree vajah say allaah kee tamjeed kee.