Hizqeeel 9
yarooshalam tabaah ho jaaegaa
1phir main nay allaah kee buland aavaaz sunee, “yarooshalam kee adaalat qareeb a gaee hai! aao, har ek apna tabaahakun hathiyaar pakad kar khada ho jaaay!” 2tab chhah aadmee rabb kay ghar kay shimaalee darvaazay men daakhil huay. har ek apna tabaahakun hathiyaar thaamay chal raha tha. un kay saath ek aur aadmee tha jis ka libaas kataan say bana hua tha. us kay patkay say kaatib ka saamaan latka hua tha. yah aadmee qareeb a kar peetal kee qurbaangaah kay paas khaday ho gaay.
3israaeel kay khuda ka jalaal ab tak karoobee farishton kay oopar thahera hua tha. ab vah vahaan say ud kar rabb kay ghar kee daheleez kay paas ruk gaya. phir rabb kataan say mulabbas us mard say hamkalaam hua jis kay patkay say kaatib ka saamaan latka hua tha. 4us nay farmaaya, “ja, yarooshalam shaher men say guzar kar har ek kay maathay par nishaan laga day jo baashindon kee tamaam makrooh harkaton ko dekh kar aah-o-zaaree karta hai.” 5meray suntay suntay rabb nay deegar aadmiyon say kaha, “pahelay aadmee kay peechhay peechhay chal kar logon ko maar daalo! na kisee par taras khaao, na rahem karo 6balki buzurgon ko kunvaaray-kunvaariyon aur baal-bachchon samet maut kay ghaat utaaro. sirf unhen chhodna jin kay maathay par nishaan hai. meray maqdis say shuroo karo!”
chunaanchay aadmiyon nay un buzurgon say shuroo kiya jo rabb kay ghar kay saamnay khaday thay. 7phir rabb un say dubaara hamkalaam hua, “rabb kay ghar kay sahenon ko maqtoolon say bhar kar us kee behuramtee karo, phir vahaan say nikal jaao!” vah nikal gaay aur shaher men say guzar kar logon ko maar daalnay lagay. 8rabb kay ghar kay sahen men sirf mujhay hee zinda chhoda gaya tha.
main aundhay munh gir kar cheekh utha, “ai rabb qaadir-ay-mutlaq, kya too yarooshalam par apna ghazab naazil karkay israaeel kay tamaam bachay huon ko maut kay ghaat utaarega?” 9rabb nay javaab diya, “israaeel aur yahoodaah kay logon ka qusoor nihaayat hee sangeen hai. mulk men qatl-o-ghaarat aam hai, aur shaher naainsaafee say bhar gaya hai. kyoonki log kahetay hain, ‘rabb nay mulk ko tark kiya hai, ham usay nazar hee naheen aatay.’ 10is liyay na main un par taras khaaoonga, na rahem karoonga balki un kee harkaton kee munaasib saza un kay saron par laaoonga.”
11phir kataan say mulabbas vah aadmee laut aaya jis kay patkay say kaatib ka saamaan latka hua tha. us nay ittila dee, “jo kuchh too nay farmaaya vah main nay poora kiya hai.”