Hizqeeel 8
rabb kay ghar men butparastee kee royaa
1jilaavatanee kay chhatay saal kay chhatay maheenay kay paanchven din [a] 17 sitambar. main apnay ghar men baitha tha. yahoodaah kay buzurg paas hee baithay thay. tab rabb qaadir-ay-mutlaq ka haath mujh par a thahera. 2roya men main nay kisee ko dekha jis kee shakl-o-soorat insaan kee maanind thee. lekin kamar say lay kar paaon tak vah aag kee maanind bhadak raha tha jabki kamar say lay kar sar tak chamakdaar dhaat kee tarah tamatma raha tha. 3us nay kuchh aagay badha diya jo haath sa lag raha tha aur meray baalon ko pakad liya. phir rooh nay mujhay uthaaya aur zameen aur aasmaan kay darmiyaan chaltay chaltay yarooshalam tak pahunchaaya. abhee tak main allaah kee roya dekh raha tha. main rabb kay ghar kay androonee sahen kay us darvaazay kay paas pahunch gaya jis ka rukh shimaal kee taraf hai. darvaazay kay qareeb ek but pada tha jo rabb ko mushtail karkay ghairat dilaata hai.
4vahaan israaeel kay khuda ka jalaal mujh par usee tarah zaahir hua jis tarah pahelay maidaan kee roya men mujh par zaahir hua tha. 5vah mujh say hamkalaam hua, “ai aadamzaad, shimaal kee taraf nazar utha.” main nay apnee nazar shimaal kee taraf uthaaee to darvaazay kay baahar qurbaangaah dekhee. saath saath darvaazay kay qareeb hee vah but khada tha jo rabb ko ghairat dilaata hai. 6phir rabb bola, “ai aadamzaad, kya tujhay vah kuchh nazar aata hai jo israaeelee qaum yahaan kartee hai? yah log yahaan badee makrooh harkaten kar rahay hain taaki main apnay maqdis say door ho jaaoon. lekin too in say bhee ziyaada makrooh cheezen dekhega.”
7vah mujhay rabb kay ghar kay bairoonee sahen kay darvaazay kay paas lay gaya to main nay deevaar men sooraakh dekha. 8allaah nay farmaaya, “aadamzaad, is sooraakh ko bada bana.” main nay aisa kiya to deevaar kay peechhay darvaaza nazar aaya. 9tab us nay farmaaya, “andar ja kar vah shareer aur ghinaunee harkaten dekh jo log yahaan kar rahay hain.”
10main darvaazay men daakhil hua to kya dekhta hoon ki deevaaron par chaaron taraf butparastee kee tasveeren kanda huee hain. har qism kay rengnay vaalay aur deegar makrooh jaanvar balki israaeelee qaum kay tamaam but un par nazar aaay. 11israaeelee qaum kay 70 buzurg bakhooradaan pakday un kay saamnay khaday thay. bakhooradaanon men say bakhoor ka khushboodaar dhuaan uth raha tha. yaazaniyaah bin saafan bhee buzurgon men shaamil tha.
12rabb mujh say hamkalaam hua, “ai aadamzaad, kya too nay dekha ki israaeelee qaum kay buzurg andheray men kya kuchh kar rahay hain? har ek nay apnay ghar men apnay buton kay liyay kamra makhsoos kar rakha hai. kyoonki vah samajhtay hain, ‘ham rabb ko nazar naheen aatay, us nay hamaaray mulk ko tark kar diya hai.’ 13lekin a, main tujhay is say bhee ziyaada qaabil-ay-ghin harkaten dikhaata hoon.”
14vah mujhay rabb kay ghar kay androonee sahen kay shimaalee darvaazay kay paas lay gaya. vahaan aurten baithee theen jo ro ro kar tammooz devtaa [b] tammooz masoputaamiya ka ek devta tha jis kay pairokaar samajhtay thay ki vah mausam-ay-garma kay ikhtitaam par hariyaalee kay saath saath mar jaata aur mausam-ay-bahaar men dubaara jee uthta hai. ka maatam kar rahee theen. 15rabb nay savaal kiya, “aadamzaad, kya tujhay yah nazar aata hai? lekin a, main tujhay is say bhee ziyaada qaabil-ay-ghin harkaten dikhaata hoon.”
16vah mujhay rabb kay ghar kay androonee sahen men lay gaya. rabb kay ghar kay darvaazay par yaanee saamnay vaalay baraamday aur qurbaangaah kay darmiyaan hee 25 aadmee khaday thay. un ka rukh rabb kay ghar kee taraf naheen balki mashriq kee taraf tha, aur vah sooraj ko sijda kar rahay thay.
17rabb nay farmaaya, “ai aadamzaad, kya tujhay yah nazar aata hai? aur yah makrooh harkaten bhee yahoodaah kay baashindon kay liyay kaafee naheen hain balki vah pooray mulk ko zulm-o-tashaddud say bhar kar mujhay mushtail karnay kay liyay koshaan rahetay hain. dekh, ab vah apnee naakon kay saamnay angoor kee bel lahera kar butparastee kee ek aur rasm ada kar rahay hain! 18chunaanchay main apna ghazab un par naazil karoonga. na main un par taras khaaoonga, na rahem karoonga. khwaah vah madad kay liyay kitnay zor say kyoon na cheekhen main un kee naheen sunoonga.”