Hizqeeel 7

mulk ka bura anjaam

¹rabb mujh say hamkalaam hua, ²“ai aadamzaad, rabb qaadir-ay-mutlaq mulk-ay-israaeel say farmaata hai ki tera anjaam qareeb hee hai! jahaan bhee dekho, poora mulk tabaah ho jaaega. ³ab tera satyaanaas honay vaala hai, main khud apna ghazab tujh par naazil karoonga. main teray chaal-chalan ko parakh parakh kar teree adaalat karoonga, teree makrooh harkaton ka poora ajr doonga. ⁴na main tujh par taras khaaoonga, na rahem karoonga balki tujhay teray chaal-chalan ka munaasib ajr doonga. kyoonki teree makrooh harkaton ka beej teray darmiyaan hee ug kar phal laaega. tab tum jaan logay ki main hee rabb hoon.”

⁵rabb qaadir-ay-mutlaq farmaata hai, “aafat par aafat hee a rahee hai. ⁶tera anjaam, haan, tera anjaam a raha hai. ab vah uth kar tujh par lapak raha hai. ⁷ai mulk kay baashinday, teree fana pahunch rahee hai. ab vah vaqt qareeb hee hai, vah din jab teray pahaadon par khushee kay naaron kay bajaay afra-tafree ka shor machega. ⁸ab main jald hee apna ghazab tujh par naazil karoonga, jald hee apna ghussa tujh par utaaroonga. main teray chaal-chalan ko parakh parakh kar teree adaalat karoonga, teree ghinaunee harkaton ka poora ajr doonga. ⁹na main tujh par taras khaaoonga, na rahem karoonga balki tujhay teray chaal-chalan ka munaasib ajr doonga. kyoonki teree makrooh harkaton ka beej teray darmiyaan hee ug kar phal laaega. tab tum jaan logay ki main yaanee rabb hee zarb laga raha hoon.

¹⁰dekho, mazkoora din qareeb hee hai! teree halaakat pahunch rahee hai. naainsaafee kay phool aur shokhee kee komplen phoot niklee hain. ¹¹logon ka zulm badh badh kar laathee ban gaya hai jo unhen un kee bedeenee kee saza degee. kuchh naheen rahega, na vah khud, na un kee daulat, na un ka shor-sharaaba, aur na un kee shaan-o-shaukat. ¹²adaalat ka din qareeb hee hai. us vaqt jo kuchh khareeday vah khush na ho, aur jo kuchh farokht karay vah gham na khaaay. kyoonki ab in cheezon ka koee faaida naheen, ilaahee ghazab sab par naazil ho raha hai. ¹³bechanay vaalay bach bhee jaaen to vah apna kaarobaar naheen kar sakengay. kyoonki sab par ilaahee ghazab ka faisla atal hai aur mansookh naheen ho sakta. logon kay gunaahon kay baais ek jaan bhee naheen chhootegee. ¹⁴beshak log bigal baja kar jang kee tayyaariyaan karen, lekin kya faaida? ladnay kay liyay koee naheen niklega, kyoonki sab kay sab meray qaher ka nishaana ban jaaengay.

¹⁵baahar talvaar, andar muhalak vaba aur bhook. kyoonki deehaat men log talvaar kee zad men a jaaengay, shaher men kaal aur muhalak vaba say halaak ho jaaengay. ¹⁶jitnay bhee bachengay vah pahaadon men panaah lengay, ghaatiyon men faakhtaaon kee tarah ghoon ghoon karkay apnay gunaahon par aah-o-zaaree karengay. ¹⁷har haath say taaqat jaatee rahegee, har ghutna daanvaandol ho jaaega.

¹⁸vah taat kay maatmee kapday odh lengay, un par kapkapee taaree ho jaaegee. har chiharay par sharmindagee nazar aaegee, har sar mundavaaya gaya hoga. ¹⁹apnee chaandee ko vah galiyon men phaink dengay, apnay sonay ko ghilaazat samjhengay. kyoonki jab rabb ka ghazab un par naazil hoga to na un kee chaandee unhen bacha sakegee, na sona. un say na vah apnee bhook mita sakengay, na apnay pet ko bhar sakengay, kyoonki yahee cheezen un kay liyay gunaah ka baais ban gaee theen. ²⁰unhon nay apnay khoobsoorat zevraat par fakhar karkay un say apnay ghinaunay but aur makrooh mujassmay banaaay, is liyay main honay doonga ki vah apnee daulat say ghin khaaengay.

²¹main yah sab kuchh pardesiyon kay havaalay kar doonga, aur vah usay loot lengay. duniya kay bedeen usay chheen kar us kee behuramtee karengay. ²²main apna munh israaeeliyon say pher loonga to ajnabee meray qeemtee maqaam kee behuramtee karengay. daakoo us men ghus kar usay naapaak karengay. ²³zanjeeren tayyaar kar! kyoonki mulk men qatl-o-ghaarat aam ho gaee hai, shaher zulm-o-tashaddud say bhar gaya hai. ²⁴main deegar aqvaam kay sab say shareer logon ko bulaaoonga taaki israaeeliyon kay gharon par qabza karen, main zoraavaron ka takabbur khaak men mila doonga. jo bhee maqaam unhen muqaddas ho us kee behuramtee kee jaaegee.

²⁵jab dahshat un par taaree hogee to vah amn-o-amaan talaash karengay, lekin befaaida. amn-o-amaan kaheen bhee paaya naheen jaaega. ²⁶aafat par aafat hee un par aaegee, yakay baad deegray buree khabren un tak pahunchengee. vah nabee say roya milnay kee ummeed karengay, lekin befaaida. na imaam unhen shareeat kee taaleem, na buzurg unhen mashvra day sakengay. ²⁷baadshaah maatam karega, raees haibatzada hoga, aur avaam kay haath thartharaaengay. main un kay chaal-chalan kay mutaabiq un say nipatoonga, un kay apnay hee usoolon kay mutaabiq un kee adaalat karoonga. tab vah jaan lengay ki main hee rabb hoon.”