Hizqeeel 6

bulandiyon par mazaaron kee adaalat

¹rabb mujh say hamkalaam hua, ²“ai aadamzaad, israaeel kay pahaadon kee taraf rukh karkay un kay khilaaf nubuvvat kar. ³un say kah, ‘ai israaeel kay pahaado, rabb qaadir-ay-mutlaq ka kalaam suno! vah pahaadon, pahaadiyon, ghaatiyon aur vaadiyon kay baaray men farmaata hai ki main tumhaaray khilaaf talvaar chala kar tumhaaree oonchee jagahon kay mandiron ko tabaah kar doonga. ⁴jin qurbaanagaahon par tum apnay jaanvar aur bakhoor jalaatay ho vah dha doonga. main teray maqtoolon ko teray buton kay saamnay hee phaink chhodoonga. ⁵main israaeeliyon kee laashon ko un kay buton kay saamnay daal kar tumhaaree haddiyon ko tumhaaree qurbaanagaahon kay ird-gird bikher doonga. ⁶jahaan bhee tum aabaad ho vahaan tumhaaray shaher khandaraat ban jaaengay aur oonchee jagahon kay mandir mismaar ho jaaengay. kyoonki laazim hai ki jin qurbaanagaahon par tum apnay jaanvar aur bakhoor jalaatay ho vah khaak men milaaee jaaen, ki tumhaaray buton ko paash paash kiya jaaay, ki tumhaaree butparastee kee cheezen nest-o-naabood ho jaaen. ⁷maqtool tumhaaray darmiyaan gir kar paday rahengay. tab tum jaan logay ki main hee rabb hoon.

⁸lekin main chand ek ko zinda chhodoonga. kyoonki jab tumhen deegar mamaalik aur aqvaam men muntashir kiya jaaega to kuchh talvaar say bachay rahengay. ⁹jab yah log qaidee ban kar mukhtalif mamaalik men laaay jaaengay to unhen mera khayaal aaega. unhen yaad aaega ki mujhay kitna gham khaana pada jab un kay zinaakaar dil mujh say door huay aur un kee aankhen apnay buton say zina kartee raheen. tab vah yah soch kar ki ham nay kitna bura kaam kiya aur kitnee makrooh harkaten kee hain apnay aap say ghin khaaengay. ¹⁰us vaqt vah jaan lengay ki main rabb hoon, ki un par yah aafat laanay ka elaan kartay vaqt main khaalee baaten naheen kar raha tha’.”

¹¹phir rabb qaadir-ay-mutlaq nay mujh say farmaaya, “taaliyaan baja kar paaon zor say zameen par maar! saath saath yah kah, israaeelee qaum kee ghinaunee harkaton par afsos! vah talvaar, kaal aur muhalak beemaariyon kee zad men a kar halaak ho jaaengay. ¹²jo door hai vah muhalak vaba say mar jaaega, jo qareeb hai vah talvaar say qatl ho jaaega, aur jo bach jaaay vah bhookon marega. yoon main apna ghazab un par naazil karoonga. ¹³vah jaan lengay ki main rabb hoon jab un kay maqtool un kay buton kay darmiyaan, un kee qurbaanagaahon kay ird-gird, har pahaad aur pahaad kee chotee par aur har haray darakht aur baloot kay ghanay darakht kay saay men nazar aaengay. jahaan bhee vah apnay buton ko khush karnay kay liyay koshaan rahay vahaan un kee laashen paaee jaaengee. ¹⁴main apna haath un kay khilaaf utha kar mulk ko yahoodaah kay registaan say lay kar dibla tak tabaah kar doonga. un kee tamaam aabaadiyaan veeraan-o-sunsaan ho jaaengee. tab vah jaan lengay ki main hee rabb hoon.”